UN humhimtu phu hna nih North Korea cungah dantat phihkham nak a that khawh nak hnga ding caah American nih chim phuan mi biachahnak cu mee in biachahnak an tuah nak ah Russia le China hna nih V2 Power hman in duhlonak mee an thlak tiah theih a si. A dang a tang mi phu a si mi Britain, American, France, Albania , Brazil, Gabon, Ghana,
Ireland, Kenya, Mexico, Norway le UAE hna nih cun cohlan lungtlinnak mee an thlak tiah theih a si. Norh Korea khualipi a si mi Pyongyang khuapi ah March thla ni 24 ah kahthlah a si mi Dungci le a rauh hlan tuan deuhah a serchuah mi Dungci test nak cu American nih duhlonak a langhter.
American i dantat biachahnak ah North Korea lei ah Crude oil le petroleum products serchuah bomhnak pawl zong aa tel tiah theih a si. Mah biachahnak cu ral a si mi Cyber-hatred dohnak hna ah telin pehtlaihnak a ngei tiah timi North Koraea phu zong dantat phihlkhamnak chungah an i tel tiah theih a si. Source: TASS
SAC ralkap nih hramhram uknak an lak hnu ah mipi umnak inn 580 nak tlawmlo cu an hrenhpiak hna tiah ISP Myanmar nih May 27 an a thanh. Mipi hna an umnak inn, hlutdaw palai hna le NLD party chungtel hna i an inn cu SAC ralkap nih anmah ngeihmi tiin an chuh hna tiah an thanhmi ah an langhter.
Hramhram uknak lak hnu ah a chuakmi CRPH, NUG, PDF hna he pehtlaihnak nan ngei tiah a ruang langhter in SAC ralkap nih cun inn cu an hrenhpiak hna. Fakngai in kahdohnak a chuahnak Sagaing ramtthen chung hi tambik hrenhpiak an tong i mipi umnak inn 195 an hrenhpiak hna, Yangon ah inn 122 le Mandalay ah inn 88, Magway ah inn 48 le Ayarwady ramthen ah inn 47 nak tlawmlo cu SAC ralkap nih an hrenhpiak hna tiah theih a si. SAC ralkap nih hrenhmi inn hna cu zuar ding in kan timh tiah hna Zaw Min Tun nih April 27 ah a chim.
Kachin ramkulh Myitgyina peng ah SAC ralkap kuttang um education department nih sianginn onnak an tuah nikhatnak May 26 ah sianginn ai ap mi minung 6000 leng an si tiah Myitgyina peng education department in tuanvo ngeitu nih a chim. “Catlap le cauk man cu a umlo, May 26 nikhat chungah sianginn ai ap mi 6000 leng an si” tiah a chim. Covid zawtnak le uknak laknak ruangah sianghngakchia hna cu kum 2 tluk an i dincang. Ngakchia an kum le an catang aa tluk ruanlotuk caah nu le pa nih an fa le caah sianginn apnak an tuah hi a si tiah a chimchap.
“Sianginn aa ap mi nih zeihmanh phaisa pek a um lo, ka fa cu KG a dihmi a si. Zawtnak ruang le uknak ruang ah kum 2 aa din, tang 3 cawng ding kha a tu ah cun Grade 1 lawng a cawngkho, ngakchia fim cawnnak ah a tlaituk lai ka phang, zeidang i ruahchihmi cu a um lo” tiah Myitgyina high school no. 1 sianginn ah Geade 1 kai ding in a apmi hringtu nu pakhat nih a chim. Tukum 2022-2023 ca cawn kum cu May 26 in June 1 tiang apnak caan pek a si lai i, June 2 in sianginn kai hramthok a si lai tiah SAC ralkap kuttang um education department nih an thanh.
Myanmar ramkhel lei kong hi thil fawi cu a si lo, a herhtukmi a si tiah prime minister Hun Sen nih Myanmar ramkhel lei UN special Envoy Noeleen Heyzer cu a chimh. Cambodia ram nih a tuahding cu pehzulh in tuah a si ko lai tiah Switzerland ram Davos khuachung ah tuahmi World Economic Forum ton biaruahnak ah Cambodia prime minister nih a chimmi bia cu The Phnom Penh Post nih a langhter.
Myanmar ramchung buaibainak ngolding ah buaibainak chung ah aa telmi kar biaruahnak a umkhawhnak ding le minung hawidang cung bawmhnak pekkhawhnak ding caah Cambodia ram nih dirpi in tawlrelnak kan tuah lai tiah prime minister Hun Sen nih a chim tiah media hna nihcun an langhter. Myanmar ramchung mipi hna cungah hramhramthil sual tuahnak a zorkhawhnak dingah lam kawl a biapi tiah UN special Envoy Noeleen Heyzer nih a chim tiah an langhter. Cun Myanmar ram Min Aung Hlaing nih sawmnak a tuah tiah The Phonom Pent Post nih vun a langhter.
UN special Envoy nih Myanmar ram tlawnding timhtuahnak a um na in, kal hlan ah Cambodia prime minister hmuhning theih ka duh tiin a chim. Prime minister Hun Sen cu Min Aung Hlaing he hmaitonh tonak voikhat, online chungin voi 2 ton biaruahnak an rak ngei balcang. Cu biaruahnak ah cun Myanmar ramchung ah a cangmi buaibainak kong ah thinphang a si tiah Cambodia prime minister nih a chim cun, ASEAN ton biaruahnak ah lungtlinnak tuahmi phun 5 cu a tak in tuan le langhter ding ah biaruahnak an ngei tiah The Phnom Pent Post ah an langhter.
Leave a Reply