Hakha Khuachung Dawr Poh Ah Mahle Pumpak In CCTV Bunh Cio Ding In Si-pin Ni Nawl An Chuah
==========================
Chin ramkulh Hakha khuachung i dawr pawl ah mahle pumpak in CCTV bunh cio ding in si-pin nih July 26 ah cathanh an chuah. Cathanh ning ah cun a tlai bik August 31 chung ah CCTV cu bunh cio ding a si lai, tiah theih a si. Si-pin lei cathanh ning ah cun atu lio Myanmar rambuai lio hi caanṭha ah i laak in,
mihrokhrol pawl nih khuapi chung ah dawrthil mansung pawl fir le suam piak thawng a um lengmang caah Hakha khuapi dawrngeitu hna nih i runvennak; dawrthil le a hngaktu himnak ding ah CCTV cu mahpumpak tein Aungust 31 chung ah bunh cio ding in le bunh dih tikah hmanthlak he zung ah report pe cio ding in an thanh.
Dawrngeitu hna nih CCTV bunh ding in harsatnak an ngeih ahcun zung ah chim ding a si lai i, zung lei nih tawlrelpiak ding a si lai, tiah an langhter. Ramchung hmundang ah cun dawr suam thawng theih ding a um nain Chin ramkulh chung ah cun atu tiang cu bantuk thawngpang theih ding a um rih lo, tiah theih a si.
Hriamtlai Phufonh Hna Nih ‘Lehrulhcham’ Min Putter In Kahdohnak Kan Tuah Lai! Tiah Hriamtlai Phufonh Nih An Thanh! , SAC nih U Jimmy Le midang 3 an thah hna caah ‘Lehrulhcham Kahdohnak’ min putter in SAC le a bawmtu poh cu kan doh hna lai, tiah khuapau dohthlennak tuahtu, hriamtlai phufonh nih nihin July 29 ah an thanh. July 24 ah SAC nih hrithlai in Ko Jimmy, Ko Phyo Zeyar Thaw, Ko Hla Myo Aung le Ko Aung Thura Zaw cu an thah hna caah dohthlennak tuahtu phufonh, chungkhar le ram pumpi mizapi cu kan ngaihchia tuk hringhran, ram ca ah nunnak a petu 4 hna cu upatnak zong kan pek hna, tiah an cathanh ah an langhter.
Min Aung Hlaing hruai mi SAC ralkap nih uknak an laak i, thahnawnnak an tuahmi le innlo an khangh mi vialte hi nuhrin covo buarnak a si. 88 rambuai lio hruaitu Ko Jimmy, mizapi nih thim mi Palai (MP) Ko Phyo Zeyar Thaw le midang 2 hrithlai in an thah hna hi mizapi zei rellonak a si, tiah an cathanh ah an langhter chih. Cucaah dohthlennak tuahtu phufonh nih ‘Lehrulhcham Kahdohnak(Operation)’ kan tuah lai i, SAC hruaitu le anmah bawmtu dalan pawl lengah chawlehthalnak ah a bawmtu vialte zong kan doh hna lai, tiah an langhter.
Myanmar ram ah uknak ṭha lo a tlau i tlangcung mi dihlak i tluk rual tein a kal mi Federal Democracy a chuah khawh tiang kan doh hna lai, tiah an langhter i nunnak a pe cang mi vialte hna ca ah zumhawktlak kan si lai, tiah an ṭial. Lehrulhcham kahdohnak kan tuah lai tiah aa funtom mi hna hi hriamtlai phu tampi an si, tiah theih a si.
Thlahlawh A Hlamtu Ralbawi Pakhat Cu Hriamtlai Phu Pakhat Nih An Thah I, Phaisa Zeimawzat An Zaampi: Yangon ramṭhen, Hleku (လှည်းကူး) peng SAC ralkap hna ca ah thlahlawh a hlamtu Phawngkyi(ဖောင်ကြီး) khah-mah-yiah 709 in ralbawi pakhat cu nihin July 29 ah hriamtlai phu pakhat nih an kahthah i, a kutcung ummi phaisa sing 200 leng cu amah thattu hna nih an i kalpi, tiah Yangon ramṭhen SAC headquarters nih an thanh.
Nihin July 29, zaanlei suimilam 3:30 hrawng ah Yangon ramṭhen sah-kah-khah 4 kuttang um, Phawngkyi(ဖောင်ကြီး) khah-mah-yiah 709 in ralbawi pakhat le ralkap(ṭaṭ-kyat-kyi) pakhat cu cycle pahnih in Hleku (လှည်ကူး) bank ah thlahlawh an hlam i, an kir lei Hleku(လှည်ကူး) le Phawngkyi (ဖောင်ကြီး) kar i dat-si an rawn lio ah, aho si hngalh lo mi hriamtlai phu nih an kah hna. SAC ralkap ralbawi pa cu a thi i, phaisa sing 200 leng zong an i kalpi, tiah Yangon ramṭhen SAC zung in ralbawi pakhat nih Khit Thit Media ah a chim.
Monywa Ah Mino Pakhat SAC Ralkap Nih An Tukvelh Hnu Ah A Hliamhma He An Hlonh!: Monywa ah SAC ralkap nih faak ngai in an tukvelh hnu ah an hlonh mi mino pakhat cu nihin July 29, chunhnu ah tualchung hriamtlai phu nih an hmuh i, an thlopbul lio, tiah theih a si.
“SAC ralkap nih faak ngai in an hrem i, an tukvelh hnu ah an hlonh mi mino pakhat cu kan hmuh i kan bawmh. A lung a fim rih lo caah zei bia hmanh a kan let kho lo, a hliamhma a zual deuh caah thlopbul zong ah a har ngai,” tiah tualchung hriamtlai phu chungtel pakhat nih a chim.
Hliam a pu mi mino cu kum 15 hrawng a si i, a Hmai ah faak ngai in hliamhma a pu, tiah theih a si. Hi mino chungkhar cingla hna nih thawngthanhnak an tuahmi nan hmuh ah cun tualchung hriamtlai phu sin ah pehtlaihnak kan tuah uh, tiah cathanh an chuah.
Pathein Ah Mino Zeimawzat Cu SAC Ralkap Nih An Tlaih Hna!: Ayarwady ramṭhen, Pathein ah SAC ralkap nih social media (Facebook) ah dohthlennak kong a taartu mino hna cu an kawl hna i an tlaih hna, tiah tualchung mi nih an chim. SAC kuttang um Pathein pengkulh uktu nih social media in SAC ralkap kuttang um sianginn a kai mi hnahnawhnak a petu PU Social Punishment Admin cu an tlaih lai i, dantatnak kan tuah lai, tiah July 27 ahkhan cathanh an rak chuah.
”PU Social Punishment group Admin kawl ding ah phaisa phalhnak zong an tuah i, nizaan July 28 ah minung 20 hrawng an tlaih cang hna, a tam deuh cu mino an si. Hriamtlai phu hruaitu hna he Facebook ah pehtlaihnak a ngei mi zong an tlaih hna,” tiah Pathein khuami pakhat nih a chim.
Tlaihkhih a tongmi mino tam deuh cu an Facebook account hnu zulh in an dawi hna i an tlaih hna, tiah theih a si. SAC ralkap nih nawlngeihnak an laak hnu ah ramkhel lei cataar le lamzawh lio hmanthlak an taarmi hna cu dalan nih an khawmhsuat i, SAC ralkap sin ah thawng an thanh tawn hna caah tlaih an si, tiah khuami nih an chim.
“Atu lio Pathein dirhmun cu thinphang ngai a si, tlaihkhih a tong mi hna zong an min le an kum fiang in theih an si rih lo. Tam deuh cu University kai lio mi, CDM cawlcangnak a tuahtu an si lai, tiah zumh a si. Aho theih lo in SAC ralkap nih mino an tlaih tawn hna nak cu zarhkhat hrawng a si cang,” tiah Pathein khuami pakhat nih a chim.
Ayarwady ramṭhen media hna nih ramkhel lei kong ca an taarmi ah dawhcah lo in comment a ṭialtu hna cu kherhhlai i, tlaih ding ah SAC ralkap nih timhtuahnnak an ngei, tiah theih a si.
Aung San Generation Monywa nih cun a herh ning in cawlcanghnak kan tuah peng lai, tiah an cathanh ah cun an langhter. Aung San Generation Monywa le tualchung hriamtlai phufonh hna nihhin July 27, zaan suimilam 8:30 hrawng zong ahkhan Butalin(ဘုတလင်) palik sakhan cu kutser bomb an chehhnawh hna i, SAC ralkap 8 hliam an tuar, tiah theih a si.
ThanLyin Khuapi Navy Headquarters In SAC Ralkap Ralbawi Pakhat BawLa Khe PDF Sin Ah CDM A Tuah , Yangon ramțhen, ThanLyin ( သန်လျင်) khuapi Navy Headquarters in SAC ralbawi pakhat cu kan sin ah CDM a tuah tiah BPDF nih nihin July 29 ah cathanh an chuah. ” Job For Kayah” in a rak kan pehtlaih i a rak ra mi a si. Atu ah cun a himnak hmun ah kan kuat cang tiah an langhter.
Yee Khuachung Palik Sakhan An Kah, Palik Pali An Thi, Mon ramkulh, Yee( ရေး) khuapi laifang ah a ummi palik sakhan cu hriamngan, hriamhme hna in kan kah i kan luhhnawh hna tiah Yee Monsters Phu hruaitu sin in theih a si. July 28 zing Dalan kan fimtawl dih hnu kan țin pah zanlei Suimilam 2:30 ah kan kah pah mi a si tiah Monsters phu hruaitu nih a chim.
” Kanmah lei nih ruahlo piin kan kah hmasa hna, anmah lei nih cun an kan kap ve lo i him tein hnu kan tolh kho ” tiah a chim chap. 40 mm le hriamhme hna hmang in kan kah hna caah 4 an thi i 5 hrawng hliam an tuar tiah a chim. A Luancia July 19 zongah SAC ralkap gate pakhat cu kan rak kah i 2 an thi tiah a chim chap.
Pakokko Peng Khuate Pakhat Ah Umhmun Khuarmi SAC Ralkap Kah An Ton Caah 5 Nak Tlawm Lo An Thi Magway ramṭhen, Pakokko peng Ashibungkan(အရှေ့ဘုန်းကန်) khua ah umhmun khuarmi SAC ralkap pawl cu, PDF nih July 28 zanlei sml 5:00 hrawng ah kan kah hna i, ralkap 5 nak tlawm lo an thi, tiah Earthquake People’s Defence Force (UG) sin in theih a si.
SAC ralkap nih umhmun an khuarnak cu Earthquake People’s Defence Force၊ PKU North PDF le Royal Defence Force PKU hna nih an kah hna i, King Cobra People’s Defense Force nih hmunhman humhimnak an lakpiak hna. Cu kahdohnak ah SAC ralkap an i thuhnak(bunker) pakhat le an umnak phungki sianginn an lak khawh. Cun, 60mm lung thum in kah an bawmh hna, Pakokko in bawmtu motor pakhat le Inpin lei in bawmtu ralkap an rak phanh caah hliam tong lo tein PDF cu hnu an kir, tiah theih a si.
Myinmu Peng Ah SAC Ralkap Pawl Drone In Bomb An Thlak Hna I 3 An Thi, 3 Hliam An Tuar. Sagaing ramțhen, Myinmu peng , NgiangPinWin( ညောင်ပင်ဝန်း) palik sakhan hmai ah checking a tuahtu SAC ralkap hna cu nizan July 28 zanlei Sml 4:00 hrawngah Drone in bomb kan thlak hna i 3 an thi 3 hliam an tuar tiah MyinChan pengkomh, Battalion 7 ZERO phu nih cathanh an chuah.
Thantaungkyi Peng Ah SAC Ralkap Motor Cu KNLA Ṭangṭi Phu Nih Bomb An Puah Caah Ralkap 10 Hrawng An Thi, Motor Pahnih Rawk, Karen ramkulh, Thantaungkyi(သံတောင်ကြီး) khua le Palikhi(ပလေခီး) khua karah SAC ralkap motor cu KNLA Brigade 2 nih nizan July 28 zing sml 9:30 hrawng ah bomb an puahhnawh hna caah an motor 2 a rawk. Ralkap 10 nak tlawm lo an thi, tiah theih a si.
Taungngu(တောင်ငူ) in Thataungkyi ah riahcaw a chantu SAC ralkap motor panga cu, KNLA nih bomb in an puah caah ralkap 10 hrawng an thi, 5 hrawng hliamhma an pu. A thimi chungah ralbawi pakhat aa tel. Suimilam cheu chung kan i kap i, a thimi an hriamnam char manh a si lo. Bawmtu an rat caah hnu kan kir tiah KNLA Brigade 2 nih an langhter. Bomb puah an ton hnuah SAC ralkap bawmtu an ra i, pawngkam cu hriamngan in an kah thluahmah tiah KNLA sinin theih a si.
Taze, Intaw Le Kantbalu Kahdohnak Ah SAC Ralkap 23 An Thi, A Nung In Pakhat An Tlaih, Sagaing ramṭhen, Taze peng ah rallam a sialmi SAC ralkap le Kanhtuma(ကံထူးမ) palik camp cu July 27 ah Taze PDF ṭangṭi phu hna nih voithum an kah hna caah SAC ralkap le palik 15 hrawng an thi kho, tiah Taze PDF sinin theih a si.
Taze peng Ye Oo Kone(ရေဦးကုန်း) khua pawng ah rallam a sialmi SAC ralkap pawl cu, July 27 zing sml 10:50 hrawng ah Taze PDF ṭangṭi phu hna nih hriamngan le hriamhme in minutes 10 chung hrawng an kah hna. Ralkap a thimi an tam. PDF ralkap pakhat hriamngan nih a khen caah hliamhma hme a pu, tiah theih a si.
SAC ralkap pawl cu July 27 chun sml 12:00 hrawng ah Chaungsone(ချောင်းဆုံ) khua lei ah an kal i, PDF ṭangṭi phu nih an kah ṭhan hna. Cu pinah Taze peng Kanhtuma palik camp cu July 27 zan sml 10:50 hrawng ah PDF Battalion 6 nih hriamngan in voinga an kah hna i, palik a thimi an tam lai tiah an zumh.
“Nikhat chungah voithum kan i kap. Ralkap pawl cu a thimi an tam caah Kywinlay(ကျွန်းလည်) khua in motor nih a rak don hna. Kanmah lei in ralkap pakhat hliamhma hmete pumi a um ve,” tiah PDF pakhat nih a chim. Taze peng July 27 ah kahdohnak voithum a chuak. Taze PDF, Shwebo Battalion 6,7,8, peng Pah Kah Phah le PDF hna i bawm in an kah hna tiah Taze PDF sinin theih a si.
Cu ṭhiamṭhiam in July 27 zanlei ah Sagaing ramṭhen Intaw peng KTV pakhat ah SAC ralkap pahnih cu KIA le PDF nih an tlaih hna, tiah Indaw Revolution nih a langhter. Intaw peng Mawlu le Naba karlak ummi, KTV ah zu a dingmi ṭatma 88 kuttang Battalion 416 in ralkap Chan Aye le Sergeant Thura Aung cu KIA le PDF nih an kah hna i, Thura Aung cu a thi. Chan Aye cu an tlaih tiah theih a si.
July 28 ah Sagaing ramṭhen, Kantbalu(ကန့်ဘလူ) peng Ongchauklung(အုန်းခြောက်လုံး) khua pawng ah KLPDF B 1, Kawlin peng Pah Kah Phah, Kantbalu pe Pah Kah Phah hna i bawm in zanlei sml 4:30 hrawng ah SAC ralkap cu bomb kan puahhnawh hna caah ralkap 7 an thi, tiah Kawlin Revolution KR nih a langhter.
Leave a Reply