Afganistan Khuapi Ah Bomb A Puak, Minung 30 Leng An Thi, 50 Leng Hliam An Tuar

Afganistan ram khuapi Kabul i nu sianginn pawng ah May 8 (niruk ni) ah a tha a cak ngaimi bomb a puak i minung 30 leng an thi, 50 leng hliam an tuar.

A puahnak hmun hi Kabul khuapi i Shia Muslim tam deuh an umnak Dasht-e-Barchi veng ah a si. A thimi le hliam a tuarmi tam deuh cu siangngakchia an si tiah Afganistan ramchung vuanci zung chimnak nawlngeitu Tariq Arian nih a chim. A thimi an karh kho ti zongah a chim fawn. Hliam a tuarmi 52 hna cu a rannak in siizung ah an tlikpi colh hna.

Cuka sianginn ah a kaimi siangngakchia nu Zahra nih cun “Sianginn kan dih i ka hawinu he kan vun chuah bak ah bomb a puah hi a si. A puah hnu minute 10 ah voihnih a puak than” tiah a chim.

Mipi runvennak tha tein a tuah kho lomi Afganistan cozah cu veng chung mi hna nih thinhun in an mawhchiat i hliamtuar hna phurtu Ambulance mawtaw zong an kham i an buai ngai tiah theih a si.

Mi pakhat nih thihpi in a puahmi maw a si? Asiloah an hmenhmi bomb dah a si ti theihfian a si rih lo. Zeibantuk bu nih dah an puah ti zong theih a si rih lo.

Taliban nih cun hi bantukin mipi cungah thil tuah hi hruh a si tiah mawhchiatnak bia an chim i hi bomb puahnak ah kannih cu tuanvo kan ngei lo tiah an thanh.

Hi bomb puahnak kongah Afghanistan i UN zung nih mawhchiatnak cathanh a chuah colh. Afghanistan i US palai Ross Wilson zong nih tuk a sum tukmi thiltuah a si tiah a chim ve.

Tutan bomb puah hi Afghanistan in US le NATO ralkap an chuah hnuah a voikhatnak a si. US le NATO ralkap nih Afghanistan an chuahtak ahun ralhrang pawl an lor tuk te lai tiah mipi nih an rak phan tukmi cu a voikhatnak an ton taktak cang. Cred : The Chin Post

Be the first to comment

Leave a Reply

Your email address will not be published.


*