Hakha-Thantlang kar Kahdohnak ah SAC Ralhrang Mithi/Hliampu an Tam -Nizaan (September 6) zaanlei sml. 5:00 le sml. 6:00 karlak ah Hakha le Thantlang karlak ah CDF le SAC ralhrang karlak kahdohnak a chuak i SAC ralhrang lei hliampu/mithi an tam, tiah thawng kan theih.
Hakha le Thantlang karlak ramlak Nengrang timi hmun ah SAC ralhrang pawl riahbuk an sual lio ah CDF nih an kah hna i ralhrang 15 cung hliampu le mithi an um lai, tiah an zumh. CDF lei in hliampu/mithi an um lo. Nizaan kahdohnak kong he pehtlai in CDF nih thawngthanhnak an tuahmi a um rih lo. The Chin Journal September 7, Hakha
NUG nih dothlennak a tuah mi mizapi ralkap bu vialte nih zulhding phunglam thanh. 2021 September 7 ah National Unity Government, Defense Ministry nih dothlennak a tuah mi hriamtlai bu hna nih zulhding phunglam pawl an thanh. Dothlennak a tuah mi mizapi ralkap bu vialte nih a tanglei langhter mi zulhphung hna zulh ding in an thanh.
1. Cunglei nih nawlpek mi zulh ding. 2. Mah le hriamtlai bu/ ralkap bu cung ah dawtnak ngeih ding. 3. Mah le hriamnam cu mah pumpak nunnak bantuk in ruah ding. 4. Poipang herhhai ruang ah mizapi thilri hman caan ah a man zat in pek hna ding. 5. Tlaih mi ral hna hrem le thah lo ding, aa tlaknak hmun ah chiah hna ding. 6. Nu ralkap le mizapi nu a si mi hna cung ah nupa sualnak he pehtlai in hnahnawhnak pek lo ding.
7. Ral sin in hmuh mi hriamnam le thilri hna cu tuanvo ngei mi ralbawi sin ah cazin he ap ding. Dothlennak a tuah mi mizapi ralkap bu hna vialte nih hi zulhphung an zulh cio nakhnga tuanvo a ngei mi ralbawi hna nih mah le ralkap bu sin cio ah theihter le forhfialank tuah cio ding zong in an tial chih. The Hakha Times
Taiwan nih nuclear cahnak a hman in bomb thlak nak China raltuk vanlawng 19 cu Taiwan nitlak thlanglei ah a lut tiah a thanh. Taiwan ministry of National Defence nih cathanh a chuahnak ah China raltuk vanlawng 19 cu an ram chungah a lut. Nuclear bomb a keng khi mi vanlawng hna hi Taiwan nih defence identification zone (ADIZ) tiah an ri an khiahmi chungah a lut mi a si tiah a langhter.
Nizaan September 6 ah Taiwan ah a lut mi China air force ah nuclear a phor kho mi H-6 bomber 4 le anti-submarine air craft a tel tiah Taiwan defence ministry nih a chim. ADIZ hi national airspace a si i, ram venhimnak caah ramdang vanlawng hna cu zohfel tawn an si.Taiwan nih China vanlawng hna an luhnak map hna a chuah pin ah China vanlawng hna ralrinnak pek dingin combat aircraft hna cu a fial cawlh ve.
Hi kong he pehtlaih in China nih zeihmanh cathanhnak a tuah lo.China nih Taiwan hi an ramchungah a rel chih mi a si i, Taiwan nih mah hi a duh lo ngai mi a si. China nih ralkap vanlawng hna cu Taiwan ramchungah hin voi zeimawzat a fial cang hna. June thla ah hin raltuknak vanlawng 28 cu ADIZ ahhin a rak fial cang.
January thla zong ah vanlawng 15 le April thla ah vanlawng 25 an lut cang tiah Taiwan nih a ti. China le Taiwan hi 1940 hrawngah ramchung i dohnak ruangah then a si hnuah Taiwan nih anmah phunghram dang tein a uk mi an sinain, China cozah nih Taiwan cu a si khawhnak lam in lak than a timh peng mi a si. Ref; The Chin Post
Leave a Reply