Rakhine ram ah kahdohnah pawl chuahter tthan lo dingah kap hnih in ceihhmainak ngeih a herh tiah cathial thiam Way Hein Aung nih CNI ah a chim. Rakhine ralkap AA in Rakhine ram ah kap hnih kahdohnak pawl caan rikhiah loin a chuah kho nak kong cu May thla ni 15 ah chuah a si.
Wah Hein Aung nih , ” A biakin kan hmuh ningah ceihhmainak ngeihter hi duh a si. AA lei nih an herh mi an chuah pi zongah SAC ralhrang lei nih an mah an duh mi chuahpi a herh mi a si. Mah chuahpi mi ah khan ceihhmai a si lai cu. Ceihhmainak ceih ter hi duh mi a si. Si duh ter mi cu zei a si ti ah cun khi lei ah ralzaam har tong pawl zong tampi an um.
Minung 90000 hrawng inn ah a kir kho rih lo mi an um rih. Hi hna pawl zong hi ruah a sur hlan ah inn ah kir ter an herh. Mah sining buah kahdohnak a chuah tthan ah cun hinak in a har deuh a cian deuh lai i, a tha lo. Cu ruangah kan mah nih kaphnih in ceihhmainak , i theihthiamnak negih ka duh piak hna” tiah a chim.
Relchap, Finland le Norway ram hna cu North Atlantic Treaty Organisation (NATO) ah lunglawm tein lakluh an si lai, tiah Berlin i NATO hruaitu tobiaruahnak nih an thanh. Sinain, NATO chungtel Turkey nih cun anmah dohkalh lei in bia a chim. Turkey nih cun hi Nordic(Norway, Finland etc) ram hna nih hin kan ca ah hna a hnok ngai mi thil an tuah tawn tiah a chim i, Turkey ramchung i hriamtlai phu hna cu hriamnam an rak pek tawn, tiah a chim.
Hi kong he pehtlai in Finland president nih cun Turkey lei biachim cu a hngalhthiam lo kong a chim ve i, a luancia thlakhat ah Turkey president he phone in i chawn in, Turkey president cu Finland nih NATO a fonh khawh nak ding in thazaang chuahtu a forhfialtu a si kong a chim. Atu tan Turkey nih an chim mi bia hi NATO an luhnak ah donkhantu a si lai lo ruahchannak a ngeih kong zong Finland president nih cun a chim. Turkey foreign minister zong nih, Nordic ram hna nih Turkey ramchung hriamtlai phu an rak bawmh tawn hna kong a chim i, cubantuk an tuah tawn mi cu tuah ti hna hlahseh, tiah an duhnak a langhter.
Russia president Vladimir putin nih cun Europe ram hna nih NATO an luh cu an ca ah thinphang a sinak le an duhlonak voi tampi a rak chim cang. Sinain, Finland leng ah Norway zong nih NATO sinah luh halnak a tuah cang. Hi bantuk in Finland nih NATO luh a hal tik ah, Russia nih cun UK le Finland sinah hrocernak aw-aan a chuah colh i, second 10 chung ah Finland cu vutcam ah an canter khawh i, Second 200 chung ah UK zong an ciamhter khawh dih kong a chim.
Russia nih hrocernak bia a chim len ko nain Sweden zong nih NATO a fonh ve lai, tiah ruah a si. Hi Nordic ram hna nih hin caan saupi cu ṭanhlei ngei lo in dai tein an rak um tawn nain, Kum 2014 ah Russia nih Crimea a laak hnu le tutan a cawlcanghnak zoh tikah NATO fonh cu an ca ah a him bik lai, tiah Europe chaklei um Nordic ram hna nih cun an ruah. Crd: the chin post
Leave a Reply