A Turu Ko; Russia nih Nitlaklei ram pawl cu a nek bak ko hna hih!!

Russia President Hlun: “Nuclear Ral Thawh ding kan Ti mi hi a Sawhsawh a si lo. Nuclear in Ukraine kan Kah tikah NATO ai Thlak ngam te lai lo”
========================================================================================================
Russia nih nuclear in Ukraine kan kah tikah NATO hi ai thlak ngam te lai lo, tiin Russia president hlun Dmitry Medvedev nih nehsawh ngaiin a chim. Dmitry hi a tu ah cun Russia security council lubik a si i, Biden, UK PM Truss le NATO pawl cu an min char in a cem hna len hna. Russia nih nuclear a hman ah cun a tuar cawk lai lo, tiin mah hi hruaitu pawl nih hin tu le tu an kan hrocer. Truss le bang nih cun khat le khat nuclear in kan i kap lai cu, ti tiangin a kan hrocer, tiin an thang a chiat hna.

Russia kan nuclear phung ningah cun, ramdang nih nuclear in maw, siloah a conventional hraimnam in an kan kah ah si ah cun kan nuclear hmangin lehrulhnak kan tuah ve lai, a ti. “Ukraine hei ti bantuk, kan raminnpa hna kut tiang i nuclear hriamnam a phanh ding hi cu Russia nih kan zoh sawh lai lo; a si khawh chungin kan kham lai. Russia nan kan hrocernak hi rii kan chiahmi tiang an lonh a si ah cun, lehnak kan in tuah hna a hau ko lai. Mizei sin hnatlakpinak hmanh kan hal ta lai lo, cun ruahnak zong sau kan hal ti lai lo. Tutan kan i hrocermi bia hi kan chim sawhsawhmi an si lo”, tiin Dmitry nih a chim.

Cun Russia nih Ukraine hi nuclear in kan kah ah cun, ai rawk cuahmah cangmi Ukraine va khamh len nak cha in cun NATO nih hin amah le mah runvennak tu a tuah deuh te lai, tiin a chim. Russia Cu Afak Chin Lengmang Cang, Putin nih nuclear a hman a si ah cun, a tlak zau nak a si te lai, tiin Security expert Prof. Michael Clarke nih a chim ve. A nuclear hriamnam kong vawleipi theih cawngia hi Putin le a palai pawl nih an tuah zungzal mi thil a si.

February lio tein khan Putin nih nuclear kong a chim, cun March in khan nuclear hriamnam hmannak nawl an ngeihnak kong Dmitry nih a chim ve. Asinain, nai tan i fak ngaiin nuclear min chal in ai hrocernak a ruangbik cu, Nitlak ram nih Ukraine hi hriamnam le chawva in bawm ti hna hlah seh, ti a duh caah a si. Putin hi le tartahak in a um cang fawn, tiin Clarke nih a chim. Cun nai i ralkap hlun a auh thanmi hna zong nih hin Ukraine an thawn deuh cang, ti a langhter, a ti.

Nai cikua in cun a ramdanghawi Turkey, India le China tiang zong nih Russia hi zeiah an reltuk ti lo. Putin hi a zo ai langh ko cang, tiin Clarke nih a chim. Putin hi a tuang ai thin sawhsawh bia maw a si ko hnga? Nuclear hriamnam na hman citcet ah cun na tuar cawk lai lo, tiin White House nih ralrin a pek colh hna. Putin hi aI hrocer sawhsawh lai cu ka zum lo. I biatak dawhdang a si, tiin Sunday ah khan Zelensky nih a chim.

Russia ai hrocermi hi ai hrocernak menmen a si, tiin kan zumh. Asinain Nitlak ram pawl nih Russia biaka pawl hi biataktein an lakpiak cu a hau lai, tiin Clarke nih a chim. “Minung hi biaka lawng in an i hrocer, kan ti ko hmanh ah, hnuhmai i mernak hmun le hma an i ngeih ve ti lo pingpang ah cun, tuah an i timh lo mi pi tiang khin thil an tuah theu tawn,” tiin Clarke nih a chim.

“Nuclear hriamnam hmangin raltuk a hram na thok fatin te, i palh sual, asiloah i tuaktan palh hi hrial awk tha lo thil an si zungzal. Cuaah, mah kong hi Nitlak ram nih thatein an tuaktan a hau” tiin a chim. Putin ai hrocernak hi biaka sawhsawh a si in ka zumh. A ruang bik cu Nitlak ram nih Ukraine hi dirpi ti hna hlah seh, ti a duh caah a si ko lai, tiah ka ruah, tiin Russia raminnpa Latvia i an defense minister nih a chim ve. Crd-Chelsea Bawi

Relchap, Myanmar ramchung ah nikhat chungah minung 350 leng nih Covid zawtnak an i chawnh, Myanmar ramchung ah Covid zawtnak i chawnhning a karhṭhan i nizaan September 27 ni khat chung ah Covid-19 zawtnak aa chawnhmi minung 356 an si tiah SAC ralkap kuttang um ngandamnak vuanci zung nih cathanh an chuah. Ngandamnak zung nih September 27, zaan suimilam 8:00 tiang cathanh an chuahning ah minung 12903 checkhlatnak an tuah hna i, cu chungah minung 356 sinin Covid-19 zawtnak an hmuh caah zatuak 2.76 nih cu zawtnak an ngei.

A tu ah Covid-19 zawtnak a ngei tiah langhtermi zat hi SAC ralkap kuttang um siizung, sii-khan ah aa zohtermi hna chungin hmuhmi a si caah a tu langhtermi nak in a lengah zawtnak ngeimi an tam deuh kho tiah mibawm chantu phu hna le ngandamnak lei rianṭuantu hna nih an chim.

Yangon, Dawpone peng tualchungmi pakhat nih “sangchung sii khan ah aa zohtermi mizaw an karh ngai, cu mizaw hna chungin a tam deuh cu Covid-19 zawtnak an si lai tiah ka zumh, an tak a sa, an khuh, a taksa fak mi an tam Covid-19 zawtnak check ah cun cu zawtnak a ngeimi an tam lai” tiah a chim. SAC ralkap kuttang um ngandamnak lei vunci zung nih mibupi umnak siangin le training kainak, zung cheukhat ah minung tampi zawtnak i chawnhnak a cang tiah September ni 15 ah media ah an rak chim.

Chin ramkulh chung ah, SAC nih onmi sianginn ah a kaimi siangakchia hna i nichiar an kaizat cazin cu SAC nih an lak!! Chin ramkulh chungah, SAC nih onmi sianginn ah a kaimi siangakchia hna i an min cazin le nichiar an kaizat cazin cu khuachung um SAC ralkap nih an lak tiah theih a si.

Nizaan September 27 thokin, Chin ramkulh, Matupi khua chung ah, cu sianginn kaimi min cazin cu an lak i, class chungah siangakchia zeizat dah um? tuni minung zeizat dah a kai kho? minung zeizatdah an bau? zeiruang ah dah an bau? ti mi pawl tiangin a kan hal dih.
Nichiar zongin cu cazin cu an kan lak te khawh men tiah siangcachim saya pakhat nih a chim.

Cu bantuk thiam in, Chin ramkulh Falam khua chung zongah, siangakchia hna nichiar an kaizat cazin cu, Tat-Yin-Hmu sinah an pek tawn tiah theih a si.

Falam khuachung lawng si lo, SAC nih sianginn an on nak hmun poah ah cu cazin cu an lak i, a baumi an um a si ah cun zeiruangah dah an bau tiin cachimtu saya/mah te cu an kan hal. Nichiar ti awkin, cu cazin cu an lak caah, cheukhat nu le pa cu zeiruangah dah si hnga tiah thinphang in an um ko tiah siangcachim sayamah pakhat nih a chim.

Chin ramkulh chungah, tualchung hriamtlaiphu(CDF) le CDM saya/mah hna i bawmin an onmi sianginn ah a kaimi siangakchia an tam caah, SAC nih an onmi sianginn ah a kaimi siangakchia hi mi tlawmte lawng an si tiah theih a si.

Kawlram Ramri Kong He Pehtlaiin Bangladesh Nih Tuluk He I Bawmin Kan Kalpi Lai, Kawlram ramri kongkau he pehtlaiin Bangladesh ram nih Tuluk ram he i bawmin kan kalpi lai tiah Bangladesh lei nih thawng an thanh tiah theih a si.

Kawlram cungah Tuluk hipkhawhnak a um ko caah ramri hrawnghrang i a cangmi thil he pehtlaiin Tuluk bawmhnak laak in kalpi an timh hi a si tiah theih a si. Ramri kongkau ah hin Bangladesh hi a lungre a theih pah caah Bangladesh Ambassador nih Tuluk cozah sinah a tubantukin bawmh a hal hi a si. SAC ralkap le AA hriamtlai kar lakah kahdohnak a zual chin lengmang caah ramri kongkau ah Bangladesh nih a tubantukin a kalpi hi a si tiah theih a si.

SAC cozah tangum remdaihnak phu le UWSP, NDAA, SSPP hriamtlaiphu tonnak an ngei, SAC cozah tangum ramdaihnak phu le WA hriamtlai UWSP, NDAA le Shan hriamtlai SSPP hna cu Naypyidaw zung pakhat ah September 27 ni ah tonnak an ngei tiah theih a si. Tonnak hmun ahcun SAC cozah tangum ramdaihnak phu hruaitu Bochoh Ya Pyae le UWSP in vice Chairman an i tel I biachimnak an ngei hna tiah theih a si.

SAC cozah phu leinih an duhmi le an duh ningin thil kalpi ding kong an chim hnu ah UWSP, NDAA le SSPP hriamtlai aiawh a kaimi hna nih an duh mi chimnak an ngei, cun ceihhmainak tlawmpal an ngei i a nikhatnak meeting an dih ter tiah theih a si. A nihnihnak tonnak cu September 28 ni (nihin) ah an tuah than lai tiah theih a si. Crd=The Chin Post

Be the first to comment

Leave a Reply

Your email address will not be published.


*