KNLA Nih SAC Ralhrang Sakhan Pa 5 An Laak
===========
KNU, Nyaung Lay Pin peng komh, Mong ukmi humram chung ah a um mi SAC ralhrang sakhan cheukhat cu KNLA in an laak khawh cang tiah KNU nih tuni ah cathanh a chuah. KNU-Nyaung Lay Pin peng komh, Mong pengkulh ukmi ram chungah a um mi SAC ralhrang sakhan cheukhat cu Tatmaha-3 KNLA le phufonh hna nih JUly ni 2 zinglei suimilam 4:45 ah KNU-Mong pengkulh chungaha um mi SAC ralhrang sakhan a si mi Kyaung Pyaar (ကြောင်ပြ) sakhan, Aung Laung Sein (အောင်းလောင်းစိန်) sakhan, Kyun Pin Seih (ကျွန်းပင်ဆိပ်) sakhan, Kaw Pyin (ကော့ပြင်း) sakhan le Kyaung Suu (ကျောင်းစု) sakhan hna cu voi coikhat ah KNLA phu fonh hna nih an laak tiah theih a si.
Zaw Me Lung nih Upadi ning in ati lengmang le khua tampi a ka ruah ter. Upadi ning in ti ko ahcun mi dinfel mi hna le mipi thiamcoter kan si ko hnga. Ralhrang Rallokap sin ahcun; Mi dinfel rual le mipi cu thiamlo coter kan si. Upadi hi rak ngeih hlah usihlaw, upadi hi rak um hlah sehlaw, kan caah ṭha deuh lai ti tiang in khuaza ka ruat tawn. Kan Pi Suu Tazacuai nak cu thiamlo coter mi lawng te, lih le hrawkhrawl lawng te an si. Zaw Me Lung nih Upadi ning in a ti lengmang fawn. Asikun ah Upadi hi LIH le Hrawkhrawl cu maw asi tak tak hnga. Lih Le Hrawkhrawl hi pei Upadi asi ko hi tiah min thlen ka duh can a tam pi.
A hnu ka lung piang mi cu: Upadi ning in ti poah ah Dinfelnak le Justice asi lo ti hi asi. Upadi he aarup mi poah Dinfelnak, Dingthlu Lairelnak asi lo ti hi Vawlei tuanbia ah hmuh khawh asi. Upadi ning in asi mi poah Dinfelnak asi lo mi tampi hmuh khawh asi. Colony chan kha an chan lio Upadi ning in asi. Saal zuat phung zong an chan lio Upadi ning in asi ve. South Africa ram ah miphun thleidannak le tuksapur I Thahnawn nak zong kha Upadi ning in asi. American ah Dr. Martin Luther King Jr nih I Have A Dream tiah a rak au pi, mi kha miphun thleidan nak ruang ah asi. Negro cu saal in an luat ko nain, thleidan nak in an luat khawh lo caah Martin Luther King nih Dohthlennak atuah.
Cu hnu ah thleidannak a tlau I, Barack Obama cu US President tiang asi khawh cang. Negro timi biafang hmang hi Upadi ning in asi lo. Upadi ning cun African ti ding asi. Zo le Lai tiah thleidan nak hi Upadi ning in asilo. Upadi ning cun CHINMI ti lawng aum. Hitler nih Judah miphun nuai 60 a thah mi (Holocaust) kha Upadi ning in asi ti hi asi.
Ralhrang lawng nih ukpen zungzal mi ram ah Upadi ṭialtu hi aho te dah an si timi hi abiapit deuh. Mipi khumzual awk ah le mipi siṭhatnak caah, a lamkip in mipi le ram ṭhanchonak caah an suai in sersiam mi Upadi an si maw ti hi a poi mawh mi cu asi. Mipi khumzual awk le humhim awk ah tuah mi Upadi asi maw? Uktu hna khumzual awk le an pennak hmun zungzal awk ah suai mi upadi dah timi a biapi bik mi asi.
Cikrik kaih hmang, Ṭuanṭuang ei hmang, Pualpuak ei hmang le lungsil le Antahmui in a khat mi Upadi, Biaceihnak le khuakhan Lairelnak ah Zalonnak a um bal ve lo dakaw. Nawl buar, Upadi vialte buar, Aum lai ding mi Upadi zong a buar cia mi, Lohtlau fapa, Lohral fapa, Darso serthiampa, Lih tinthiampa, Thih lam tlawn thiam pa, Camh le doih thiam pa, Misual Lainawng pa kut ah aphan mi Upadi cu: tuak ko uh. Cu bantuk Biaceihnak hmun in Dinfelnak cu a um khawh reng lai maw? Dingthlu Lairelnak a um khawh ti lo.
Upadi vialte Hrintu Sunghno nu timi Dotlami Phunghrampi a um lo ahcun: Upadi ning in an ti zong ah a dik lo mi lawng te an si. Lih le hrawkhrawl lawng te an si tawn. Dinfelnak le Justice aum lo mi Phunghrampi aa ngeih ballo mi kawlram asi. Upadi ah Ngakṭah Kingro asi zungzal mi kawlram kan si. Rule Of Law aum ballo nak kawlram asi. Rule Of Law timi cu Upadi cung ah ahohmanh an um lai lo ti asi. Kawl ram Luban cu Upadi cung ah aum lomi an um lo. Ralhrang Rallokap zong an um I, Civil Luban zong Upadi cung ah an um dih ve. NLD chan ah Rule Of Law aum ve bak lo.
Upadi cung ah an um dih. Kan Pi Suu hrim zong Rule Of Law ati lengmang ko nain, Upadi cung ah amah aum ve. Anaasin sullam cu Uknak, Upadi sernak le Biaceihnak nawl pathum kha mi pakhat kut ah aum dih tikah / kan chiah dih tik ah/ amah pakhat Khuakhan Lairelnak lawng in kalpi tikah asi. Cucu dakaw, Anaasin kan ti mi hna le Anaasin ukpennak cu asi. CDF hi Anaasin an si maw si lo ti cu; hi tah Fung in tah kan si ve a herh I, cuaithlai kan herh. Bu pakhat hi Upadi le Bylaw cu hrawk khawh asi lo kan ti ahcun; Kan upadi ning in asi kan ti ahcun: Ralhrang kan hluan khawh ve.
CDF, CDCJ le ZZLMS, CDF Senthang, CNDF vs CDF Haulngo, CDF Mindat, CDF Mara, MDF, CDF Zotung le Zotung Supreme Council, tbk ah kan buaibai lengmang mi hi Rule of Law aum lo caah asi. All inclusive ti asi I, ahohmanh kal tak loin, zapi tein I teltum khawh mi Upadi le Bylaw kan ngeih lo ti nak asi. Dotla mi Bylaw le Constitution kan ngeih lo. Kan upadi ah aum mi asi tiah mihrut zemlo tlaih in kan I tlai caah Kan karlak ah piatana le buaibai nak a um zungzal.
Cu kan upadi cu bible le Pathian bia Bantukin a dik mi le a rawk khawh lo mi kan ruah I, Dingthlu Lairelnak ah kan hmang lengmang hna caah bu khat le khat, pakhat le khat karlak ah buaibai nak le I theihhngalh thiamlo nak relcawk lo aum tawn mi hi asi. Bianabia ah CDF Hakha policy le Upadi ah aum cang, Biachahnak ah a um cang tiah CDF Senthang hlawnh te hna hi, Dinfelnak aa tel mi Upadi cu asi lo. Mah duhnak zawn lawng siter duh mi Upadi asi.
CNF nih CHINLAND ti hmang ko mi cu Mindat nih CHIN lawng te hman, CNF thantar hmang ko ding mi cu: Cozah chin thantar hmang tbk in kan upadi le bylaw lawng kan in tlaih cio hna. Ralkap a ṭuan ballo mi cu CDF Ralbawi le Hotu asi khawh lo timi Upadi kan ngeih hei ti hna khi asi awk asilo. Ralhrang upadi asi. CDF Upadi hi Dotla bak, UN Charter le Geneva law bantuk in nan ti sual ahcun; apoi ngai ngai lai. Mipi lung a dong ahcun kan dih ve lai ti hi nan hngalh ko, biatak tein khua nan tuak bal rua lo.
CDF Upadi le Bylaw ruang ah Ramdang bawmhtu he kan i remh lo ahcun, cu upadi cu aran nak hlawt a herh ve lai. Atamtuk. CDF Policy le Mumal kan ti riang mang I Upadi cung ah aum mi Ralbawi le Luban kan tam tuk cang. Dotla mi upadi ngeih kan herh, Rule of law aum khawh nak hnga Upadi cung ah ahohmanh um lo ding. Rule Of law ngeih khawh lo ahcun Ralbawi le Luban in I phuah ding. Khuami nih celh lo mi CDF le Upa luban kan tam tuk.
SAC siseh, CDF siseh, CNDF siseh, aho bu kan ah siseh, Kan policy le kan bylaw lawng kah adik bik, a tlingbik, tiah thlak ti loin, I tlaih ding asi lai lo. Kan Policy le Bylaw hi Vawleipi ah Dotla mi asi maw (နိုင်ငံတကာ စံချိန်စံညွှန်းနဲ့ညီသလား) ti le Nuhrin Covo a hnursuan lo I amahkhan mi asi maw (လူ့အခွင့်အရေးကို အာမခံသလား) Rule of Law a si maw? Rule Of Law a um maw? Check hmasat hnu lawng ah fek ter ding.
Rule Of Law aum ahcun: Upadi cung ah kan um lai lo, Upadi nih sual phawt khawh mi, dantat khawh mi, phuah khawh mi, mi dang in thlen khawh mi, kan si a herh ko. Ralhrang Rallokap Bantukin mah nih siter duh mi lei kap lawng in Upadi ser, mah nih uk khawh mi hna lawng he rian ṭuan ṭi duh, kanmah an kan cohlan lo tu vialte Dalaan na si hei ti tbk hna hi Upadi cung ah kan um nak tehte asi. Na palh lo kho, nain Rule Of Law aum lo I Upadi cung ah na um ti cu Tehte dang a herh ve ti lo. Mipi nih CDF cung ah an lungdong lo abiapi ngai. Mipi an lung dong ahcun Dohthlennak ah TEINAK kan hmuh bal lai lo.
Ralhrang hi Dictionary ning in a sullam leh asi ahcun; Rule Of Law um loin le, A Dotla mi Policy le Mumal um loin, Code Of Conduct a SMART lo buin, Hriamnam aa tlaih mi hna cu; a dongh nak ah Ralhrang ah an I chuah tawn ti hi asi. Ralhrang doh buin Ralhrang ziaza le muisam kan ken lo nak hnga abiapi ngai. Anaasin thluk cuahmah lio ah Anaasin si a fawi te caah kan I ralrin ngai a herh bak ko. Mifir le Damiah thluk awh ral kan doh lio ah mah nih Eihmur le mi firkhut si lo a biapi ngai fawn. Mah Credit le popular lawng te a kawl mi kan si ahcun I ngawl ko usih, Miphun le ram damnak asi lai, ral kan tei tuannak tu asi deuh men lai.
Leave a Reply