Nihin November 8, 2021, zong ah Mindat ah kahnak aa pehtlai rih. Nihin he cun Mindat pengkulh chung kahnak a ni(6) nak pehtlai in a chuah a si than cang. Nihin kahnak ah CDF-Mindat lei nih SAC ralhrang (27) an thah hna i a dang tampi nih hliam an tuar chap tiah Salai Naing Hung timi nih a langhter.
Nihin kahnak chung ah SAC ralhrang lei nih khuami inn (7) an khangh ti a si fawn. Atu tiang zong ah kahnak pehtlai in a um rih, kaphnih karlak kahnak a faak ngai rih tiah Salai Naing Hung nih cun a langhter.
Nihin Mindat i kah nak ah Ralhrang 10 hrawng an thi, Tuthla chung Kahdoh nak ah Ralhrang 86 tluk an thi, November 8, Zaan lei 1:00 PM hrawng ah Meng 19 ah Ralhrang le Mindat-CDF i kah nak ah Ralhrang 10 tluk an thi. An tank motor zawng a dir kan hmuh, a ke a kuai i asi men lai. Mipi lei hliam a pu mi an um lo tiin kan theih.
November 1 in November 8 tiang Mindat-CDF le Ralhrang i kah nak ah Ralhrang lei in 86 hrawng an thi cang. Mindat-CDF lei in Pakhat a nunnak ram caah a pek. Mindat Khuapi ah Nihin ni tiang i kah nak pehzulh in a tho. Ralhrang zawng nih mipi inn an hrawh, thil an lak piak hna, an sattil an thah piak hna. Mindat peng khuami hna le Mindat-CDF nih ngeih mi hriamnam poh in pehzulh in an doh hna tiin theih asi.
Congress Party Siangngakchia Bu NSUI (Mizoram) nih Myanmar leiin Mizoram ah aa dormi hna ca ah bawmhnak bawm an donhmi cu November 6, 2021 Zarhteni ah khan Congress Bhavan ah Myanmar Refugee Relief Committee (MRRC) sin ah an pek hna. Bawmhnak pekchanhnak caan hi NSUI (Mizoram) president Pu RB Lalmalsawma nih a hruai.
MRRC kut ah bawmhnak a petu Congress Party MLA Pu Lalrindika Ralte nih biatawi chimnak angeih i ,” Hi bantuk caan hi lawmh ding a um lo nain, bawmh hau in a ummi kan unau hna bawm kho ding in kan rak um hi kan van a tha tuk, kan i bochanmi hi minung ah siloin Pathian ah sisehlaw ka duh,” tiah a chim.
MLA Lalrindika nih cun, mah pumpak zawn lawng ruah lo in ram hruai ahcun ram nuam a si kho lai lo, hi bantuk in mipi nih an intuar zong poi a tilomi ram hruaitu an ngei cu an vanchia hringhran, tiah a chim. Myanmar ralzam bawmhnak ah hin NSUI nih MRRC sin ah facang bag 30, thilri zeimawzat le sii-ai Rs 30,000 man hrawng,
Tangka Rs 20,000 le thilri phurhnak motor hman man Rs 30,000 an peh hna, tiah thawng kan theih. Mizoram cozah le NGO hna cinkenning ahcun atu tiang Mizoram ah ralzam minung 13,500 hrawng an um lio. By Tluang Aa Zathang
Leave a Reply