Arakan Ram Kan Dirh Khawh I, Vawleicung Nih Cohlan Mi Cozah Kan Si Tikah Muslim Buainak Kan Phisin Lai-ULA/AA
==================================
AA lei in Vawleicung ram (Internaltional) hna nih cohlan mi cozah pakhat siding ah kan i zuam i, vawleicung ram hna he phung ningin bia i ruah khawhnak caan a phak tikah cun Musilim kongkau he pehtlai in phisin hnga ding policy pawl cu phung ningin chim le phuan a si lai tiah, tuni September ni 19 ah tuah mi thawngzamh thiantlimhnak ah Khaing Thukha nih a chim.
“A tu sining ah AA/ULA cu vawleicung ram hna nih cohlan mi Arakan ram (country) cozah pakhat siding ah kan i zuam cuahmah lio caan a si. Cu ruangah vawleicung ram hna he phung ningin bia i ruah khawhnak dirhmun kan phak tik ah cun kan mah AA/ULA lei in Musilim kong he pehtlai in policy cu zeitindah kan phisin lai.
UN telin Internatinal ram phu pawl, innpa Bangaladesh ram he tanti in (i bom in) zeitindah tuanvo kan laak ti khawh lai, timi cu tlukruannak he daihnak, , Harmoniousness dirhmun in kan mah lei nih phung ning tein chimphuan ding a um. A tu cu a caan tlawmpal te a tuan deuh vak rih.” tiah a chim.
“ULA/AA nih, mah buainak a phisin a si ah cun a si kho mi a pakhatnak bik ah Internaltional ram le Bangaladesh cozah nih ULA/AA cu mah buainak phisin nak hmun ah Main Stakeholders ( A bik in aa pehtlai mi) pakhat in cohlan ding a herh. A pa hnih nak ah cun UN le Bangaladesh ram telin vawleicung ram thawng hna nih bomhchanhnak tling peek in ULA/AA he dirti a herh.
Cu bantuk ni le caan a phak khawh ni ah cun ULA/AA ralzaam, hartong cohlan nak le, mah le umnak cio ah thutum khawh thannak policy (Resettlement Policy) cu ULA/AA nih phung ningin theihternak kan tuah lai i, Tlukruannak le daihnak dirmun in zungzal a hmun mi dai tein hmunkhat te ah thutum dirti khawh nak , kap hnih in cohlan hnatlak khawh mi phisin nak phun he phisin a si lai, tiah ruahchannak kan ngei’ ti zongin a chim.
Rakhine ram lawng si loin Myanmar ram pumpi ah sualnak pehzulh in a tuah peng mi SAC ralhrang cu Vawleicung ram hna nih hriamnam zuarh loding le sualnak, thatlonak a phunphun in an tuah mi pawl cu kham piak dingin ULA/AA in chimphuan ngeitu Khaing Thukha nih tuni September ni 19 ah tuah mi thawngzamh thiantlimhnak ah vawleicung ram hna sinah theihter nak a tuah tiah kan theih.
A tu ah ral buainak a karh chinchin nak Mawngdaw penglulh chungah SAC ralhrang ralkap thazaang minung 9000-1000 karlak an um nak kong cu tuni September ni 19 ah tuah mi thawngzamh thiantlimhnak ah ULA/AA in chimphuan ngeitu Khaing Thukha nih a chim chap.
Mipi humhimtu ralkap PDF phu hna he ral lei in riantuantinak kan ngei lo, nain Social (nuntual) kongkau ah cun riantuantinak kan ngei ko tiah, tuni ah tuah mi thawngzamh thianhlimnak ah Khaing Thukha nih a chim. Rakhine ram ah PDF an um lo nain, kan mah he aa pehtlai mi Chin ramkulh, Magawy ramthen hna ah PDF phu pawl colcangnak an ngeih nak kong zong a chim.
“Kan mah Rakhine ramah PDF phu pawl an um lo. A si nain kan mah he aa pehtlai mi Chin ramkulh lei, Magway lei hna ah cun Local PDF hna cu an mah tein colcanghnak an ngeih mi cu hmuh khawh a si.
Cheukhat humhman ah cun nuntual, ngamdamnak kongkau ah cun ULA/AA nih an va bomhchanh mi hna zong a um. Ral lei in bomhnak vaa peek timi cu a um tuk lo.Lay Myo Chaung lei ah a um mi Chin PDF hna he cun pehtlainak tha kan ngei ko nain ral lei in riantuantinak dirhmun tiang cu a um lo.” tiah a chim.
Relchap, (Crd-The Chin Post) Moebae kahdohnak ah PDF chungtel 2 nunnak luam, tualchung mi 100 leng ralphaw caah tlaih an tong, Shan ramkulh, Moebae ah nihin September 19 zinglei ah SAC ralkap le tualchung hriamtlai phu kar fakngai in kahdohnak a chuak tiah theih a si. Minung thazaang 100 leng he rallam sialtu SAC ralkap hna nih September 19, deilei suimilam pakhat ah hriamngan an thlah, rallam hmunthum ah sial in deilei suimilam 6:00 hrawng ah tualchung hriamtlai phu hna he kaphnih kar kahdohnak a chuak.
“Hmunkip in hriamngan an hman, Pekhon zong in hriamngan an kah, Moebae le Hpalai zong in hriamngan an kah, hriamngan tamtuk an hman” tiah tualchung hriamtlai phu chungtel pakhat nih a chim. Kap hnih kar fakngai in kahdohnak a chuah ruangah Moebyle PDF chungtel minung 2 an nunnak a liam, a dang ralkap pakhat zong nih fak ngaiin hliamhma a tuar tiah theih a si.
SAC ralkap hna nih cun Moebyle khuachung Satṭawya(စက်တော်ရာ) phung-ki sianginn le Muaitaw(မွေတော်) sianginn ah umhmun khuarmi tualchung mi 100 leng cu tlaihkhih in ralphaw ah an hman hna caah tualchung hriantlai phu lei nih kahdoh dingah harsatnak kan tong tiah tualchung hriamtlai phu chungtel nih cun a chimchap. Ni khat chungah SAC ralkap chungtel 60 an thi, 18 nih hliam an tuar, Nizaan September 18, ni khat chung a cangmi kahdohnak ah SAC ralkap chungtel 60 an thi , minung 18 nih hliamhma an tuar tiah NUG nih cathanh an chuah. Atu ah langhtermi cathanh nak in a tak ah a cangmi hi an tamdeuh kho tiah an langhter chih tiah theih a si.
A tu ah nawlngeihnak latu SAC ralkap hna nih mipi cung i hramhram thilsual an tuahmi le, mipi hna cung i hremnak an tuahmi vialte i khamnak, mah tein ii runven in cawlcanghnak cu mipi lei zong nih an tuah ve. Myanmar ramchung ah mipi hna nih SAC ralkap uknak cu a hram cah tiang doh ding in le federal democracy ngahkhawhnak ding caah, duhlonak langhter in cawlcanghnak cio a si i ramṭhen le ramkulh hmunkip ah tuahcio a si caah tualchung hriamtlai phu, tlangcung hriamtlai phu hna le SAC ralkap kar fakngai in kahdohnak a chuak.
NUG nih D-Day a thanh kum khat chungah SAC ralkap lei in minung 20,150 leng an thi cang i minung 7,000 leng nih hliamhma an tuar tiah NUG caan karlak president Duwa Lashi La nih a chim. A luancia September 7, D-Day thawk kum khat tlin philhlonak biachimnak ah, kum khat chung ah PDF le tualchung hriamtlai phufonh lei in minung 1,500 leng hrawng an nunnak a liam cang tiah caan karlak president Duwa Lashi La nih cun a chim.
Thapeikkyin Peng Chaungkyi khua Pawngah Humhimnak Latu Ding SAC Ralkap Kahdoh an Tong, Ralbawi Telhin SAC Ralkap 3 An Thi, Sagaing ramṭhen Thapeikkyin peng Chaungkyi khua pawngah humhimnak lading in a ra mi SAC ralbawi pakhat le ayakhanbu (အရာခံဗိုလ်) telhin minung 3 hna cu kan kah hna i an thi, cun hriamnam zong kan lak tiah Thapeikkyin peng Bo Lin Yone hriamtlaiphu nih cathanh an chuah.
Cu kahdohnak ahcun MA-3 meithal zuun 2 , MA-1 zuun 1, 5.56 kuan 413, 9mm kuan 13 , Bomb lung 8, 5.56 kuanbawm 2 an lak tiah theih a si. Cu chung ahcun MA-3 zuunkhat le MA-1 zuunkhat cu kuan khen nak in an rawk tiah theih a si. Nihin september ni 19 zinglei suimilam 7:30 hrawng zongah Singu (စဥ့်ကူး) peng in FAW mawtaw 2 in rallam sialmi SAC ralkap cu bomb lung 10 kan puah hnawh hna i SAC 8 hrawng an thi tiah an cathanh ah cun an langhter.
Falam Sizung ah Covid zawtnak ngeimi 5 tlopbul an si, Chin ramkulh, Falam khua sizung ah Covid-19 zawtnak a ngeimi mizaw minung 5 kan thlopbul cuahmah hna tiah sizung uktu nih a chim. A luancia zarh chungah khan SAC ralkap kuttang um ngandamnak lei vuanci zung nih Chin ramkulh, Falam ah Covid zawtnak a ngeimi mizaw pakhat, Tedim ah Covid zawtnak a ngeimi minung 3 an um tiah thawng thanhnak an rak tuah.
“Zawtnak a um tiah thanh a si caah leng nan chuah tikah Mask i bunh ding le mi bu in um tibantuk nan hrial lai i nan kut a tu le tu nan thaing tein nan i ṭawl lai” tiah sizung uktu nih forh fialnak a chim. Covid-19 zawtnak aa chawnhmi hna chungah 80% hi Covid rai khamsi aa chunlo mi an si, 15.9% hi Covid raikham si voi khat aa chunmi an si, 4% hi Covid raikham si tlamtling in aa chunmi an si, 0.1% hi raikham si tlamtling tein i chunh hnu ah aa chun nolhmi an si tiah SAC ralkap kuttang um ngandnak lei vuanci zung nih cathanh an chuah.
PDF Zeirel Loin A Ummi Kyaukyit Palik Sakhan Drone In Bomb An Thlak Hnawh, Sakhanhmu Telh In 5 Nak Tlawmlo An Thi, Sagaing ramṭhen Myaing peng Kyaukyit hmunram sakhan pakhat cu nihin september ni 19 zinglei ah drone in bomb kan thlah tiah Myaing tualchung hriamtlaiphu CDSOM in tuanvo ngeitu pakhat nih a chim.
Kyaukyit palik sakhanhmu nih “PDF pawl nih drone in bomb a kan thlah hnawh ahcun an caah kirnak lam um ti lai loh” tiah tualchung hriamtlaiphu pawl a kan hrocel caah a tuban tukin drone in bomb kan thlah hi a si tiah a chim chap. Cu lahdohnak ahcun sakhanhmu telhin palik 5 leng an thi tiah palik chungkhar he aa neihniam mi tualchungmi pakhat nih a chim tiah kan theih. Cu kahdohnak cu Wing of the Irrawaddy, Chaung U Revolutionary Army, CDSOM, Young Fighter le tualchung hriamtlaiphu fonh hna nih kan tuahmi si tiah Wing of the Irrawaddy nih cathanh an chuah.
Masein palik sakhan kahdoh an ton caah minung 9 an thi, taantakmi chungkhar pakhat ah 30,000ks an pek hna, Sagaing ramṭhen, Kalaywah peng Masein Sanpiah (မစိန်စံပြ) khua palik sakhan cu nizaan zinglei ah luhhnawh in kahdoh an ton caah palik 9 an thi. A thimi hna i an tantakmi chungkhar pakhat ah SAC nih 30,000ks cio a bawmhchanh hna tiah theih a si.
September 18, zinglei suimilam 5:00 Masein Sanpiah(မစိန်စံပြ) khua palik sakhan kahdohnak ah a thimi palik 9 hna i an chungkhar sin ah Kalay pengkomh caan karlak palik bawi U Kyi Win nih thazaang peknak le hnemhnak bia a chim khawh hnu ah chungkhar pakhat ah kyats 30,000 a va pek hna tiah theih a si. Masein Sanpiah khua palik sakhan luhhnawh in kahdoh an ton lio ah, palik phu lei nih an duhnak hmun paoh an kah caah khuami Daw Myo May cu kuan hliamhnak in a nunnak a liam tiah theih a si.
Matupi khuachung ah SAC ralkap nih an zuarmi eidin hna cu dawr ngeitu lila nih an cawk bik hna, Chin ramkulh, Matupi Sanbaung sang ah SAC ralkap nih eidin thilri man fawi tein nihin September 19, zinglei ah mi vengtu i chiah in thil an zuar. Cu an thil zuarmi cu dawr tuahtu hna nih a bik in an cawk lila hna tiah theih a si. Chiti(Sa-ung-si) cuaikhat ah a len ah thonghra in cawk a si nain, SAC ralkap nih thongriat in an zuarpiak hna tiah theih a si.
” SAC ralkap hruainak in an zuarmi a si. Palik le ralkap he tiin minung tampi nih Security an hngah. An thil zuarmi cu a leng man he tampi aa thlau lo, 1000/2000 hrawng lawng aa thlau. Thil phuntling in an.zuar ve i facang, choti, cite, cini, khachuan-sen, khachuah-rang, facang tiin an zuar.
A cawtu hi mipi nak in dawr ngei le dawr a tuahmi lila nih anmah zuarchin dingah an cawk deuh caah SAC ralkap nih an zuarmi cu an manh dih” tiah tualchung mi pakhat nih a chim. SAC ralkap nih man fawi tein Hakha khuachung ah September 10, Falam ah September 12 le September 14 ah Tedim ah an tuah. Cun Mindat le Paletwa zobg ah thil mandeng tein zuar dingah timh tuahnak an ngei tiah theih a si.
Sagaing ramthen, Pale khuachung ah, kahdohnak a chuak, SAC ralkap 6 an thi, Sagaing ramthen, Pale khua chungum, Pale palik sakhaan le General Administration zung cu, PDF phufonh 16 renglo nih September 17 zaanlei ah, kan kah hna i, SAC ralkap 6 an thi tiah PDF tangrual phu hna nih media ah an chim.
September 17, zaanlei sml 5:45 hrawngah, Pale khua chungum, Pale palik sakhaan le General Administration zung cu, PDF tangrualphu nih an kahdoh hna ii, kaphnih kar kahdohnak sml 1 chung hrawng a chuak. Cu kahdohnak ah cun Pale General Administration zung zawn ah SAC ralkap 6 an thi i, palik sakhaan in palik 3 nih hliam an tuar tiah theih a si.
Cu kahdohnak cu, God Of Myaing People’s Defence Force, Pale Bataillon 1, Pale hrambunh, Pale pengkomh Bataillon 8, 2,4,6, MPL, Thein Hnget Ni, Shwe Hin Thar, TKGF, Nagani, Angiamay(အညာမြေ), PCM, Angiadaung(အညာဒေါင်း), Khine Lay, Ever Freedom, MVRF, Saga Piohcia(စကားပျောက်ကြား) le Pale tualchung hriamtlaiphu hna i bawm in an tuah mi a si tiah kan theih.
Pathein Peng Shwe Thaung Yan Khua Lei A Kalmi Rohingya 31 Tlaih An Tong, Ayeyarwaddy ramṭhen, Pathein peng Shwe Thaung Yan(ရွှေသောင်ယံ) khua ah nizan September 8 ni ah Rohingya 31 cu SAC nih an tlaih hna, tiah tualchung mi hna siin theih a si. Tlaih a tong Rohingya 31 hi nu 12 le pa 19 an si i, Shwe Thaung Yan palik sakhan ah biahalnak le checkhlatnak an tuah hna, tiah palik he aa naihniam mi hna nih a chim.
“Tilawng in a rami an si ṭheo lai, a ruang cu Shwe Thaung Yan, Nwengiochaung(နွယ်ညှိချောင်း) khua kam ah a bu in an tlaih hna,” tiah tualchung mi pakhat nih a chim. A luancia July 23 zan sml 12:00 hrawngah Shwe Thaung Yan khua a hnulei rili ah SAC ti ralkap tilawng pakhat nih Rohingya 48 cu, tilawng pakhat chung an um lioah an rak tlaih bal cang hna. Ayeyarwaddy ramṭhen ah thla 6 chungah Rohingya 500 leng SAC nih an tlaih hna i, 100 leng cu thong kum 2 thlak ding in bia an khiahpiak hna, tiah theih a si.
Sagaing Ramṭhen Kanbalu Pengah SAC Ralkap Nih Ngakchia Kum 5 Tluk Pakhat An Thah, Sagaing ramṭhen, Kanbalu peng MithaLinkone(မိဿလင်းကုန်း) khuami kum 5 tluk ngakchia Aung Myint Myat cu September 17 ni ah SAC ralkap nih a ṭaang ah an kah caah a nunnak a liam, tiah Kyunhla(ကျွန်းလှ) cawlcangtu phu nih nihin September 19 ah cathanh an chuah.
“Chatkone(ချပ်ကုန်း) khua ah umhmun khuarmi SAC ralkap pawl nih MithaLinkone khuami Aung Myint Myat, kum 5 tluk cu a ṭaang ah an kah caah a nunnak a liam hi a si. PDF he kahdohnak zeihmanh a chuak lo nain SAC ralkap nih hriamngan he hriamhne he MithaLinkone khua cu an kah, tiah theih a si.
A luancia September 15 lio zongah MithaLinkone khuami Kyaw Hein, kum 13 le khuami pakhat cu SAC ralkap nih meithal in an rak kah hna caah hliamhma an rak pu. Khua chungah hriamngan he hriamhme he a kaptu hi SAC ralkap Tatma 99 kuttang Khah Mah Yah 113 Battalion an si i, ralkap 80 hrawng an um, tiah theih a si. SAC Ralbawi Pahnih Nih An Meithal An Thlau Ruangah Tualchung Mi 30 Tluk An Tlaih Hna, Yangon ramṭhen, Teikkyi(တိုက်ကြီး) peng Uhkan khua ah umhmun khuarmi No. 2017 SAC van ralkap phu chungin an meithal a tlaumi an um caah tualchung mi 30 tluk an tlaih hna, tiah theih a si.
Kyuntawkone(ကျွန်းတောကုန်း) khuakomh electric zungah umhmun khuarmi SAC ralkap ralbawi(major) pakhat le sergeant pakhat an meithal an tlau ruangah an tlaih hna hi a si. Cuti an meithal zun 2 a tlau ruangah an umnak hmunin meng 4 a hlatnak Kalakone le Tinin(ကုလားကုန်းရွာနဲ့သင်းအင်း) khua karlak a ummi zu dawr ngeitu nuva telh in tualchung mi 30 tluk cu SAC ralkap nih an tlaih hna, tiah tualchung mi pakhat nih a chim.
“An meithal a tlau le cangka zu an din tawnnak zu dawr ngeitu nuva an tlaih colh hna i, an hrem hna. Cu hnuah tualchung mi 30 tluk cu an tlaih chap hna. Nihin tiang a hohmanh an thlah rih hna lo,” tiah Uhkan khuami pakhat nih a chim. An meithal a tlaumi cu Pistol MA 5 zun 1 le MA 3 Rifle zun 1 a si i, an meithal a tlaunak hi ni 5 a si cang. Khuachung zong an kawl dih ko nain atu tiang an hmu rih lo, tiah theih a si.
China Nih Taiwan A Tuk Ahcun US Ralkap Nih Taiwan Kan Bawmh Lai- Biden, China nih Taiwan a tuk a si ahcun, US Ralkap nih Taiwan kan bawmh lai tiah, US president Biden nih cun a chim tiah theih a si. Cu kong he pehtlai in China cu a thin a hung ngai lai tiah, ramkhel lei minung nih un an chim cio. September 18, CBS media biaruahnak thlahmi pakhat ah China nih Taiwan ram hi a luhhnawh i a tuk ahcun, US nih cun a zoh sawh lai lo i Taiwan lei dirin kan bawmh hna lai tiah, Biden nih cun a chim hi a si. Media biahalnak pakhat ah cun,”Ukraine kahdohnak zongah hriamnam lawng bawmh si loin ralkap thazang zongin maw na bawmh hna lai ti na chim duhnak a si” tiah an hal i “a si kho” tiah a leh fawn hna.
Ukraine Tuknak Ah Russia Nih Thongthla A Hman Hna!, Ukraine ram chaklei Bakhmut khua kahdohnak ah Russia ralkap pawl cu ralkap tak silo in thongthla an si lai tiah, Ukraine ralkap pawl nih an zumh tiah, NewYork Time nih a tial. Russia ralkap a bawmtu The Wagner Group nih cun Russia thongtla pawl cu Ukraine ramah thlaruk chung ral nan va tu lai i cu hnu cun kan in thlah hna lai tiah bia an kamh hna tiah, NewYork Times nih cun a langhter.
Bakhmut khuapi lak khawh cu Ukraine ram lak khawhnak dingah a biapi ngaimi pakhat a si tiah, President Putin nih a rak chim bel. US President Biden zong nih Putin cu Ukraine kahdohnak ah Weapons of Mass Destruction (WMD) hriamnam pawl hman lo ding in ralrinnak a pek ve.
Ramri Um SAC Ralkap Sakhan Hna Cu An Chuah Tak Cang Tiah AA Nih Cathanh An Chuah, SAC nih nawlngeihnak an lak hnuin AA he kahdohnak atu le atu a chuak i SAC ralkap sakhan tam ngai zong kan lak khawh pinah sakhan cheukhat zong lak dingin kan i timtuah, tiah AA nih nizan September 18 ah cathanh an chuah.
Rakhine ramkulh-Bangladesh ramri mengtung No.40 pawngah a ummi SAC ralkap sakhan cu thlakhat chung kan helhum hnuah August 31 ah kan lak khawh. September 10 lio zongah Khah Mah Yah 352 Battalion sakhan zong kan lak khawh, tiah an langhter. Cu pinah SAC ralkap Thandaung sakhan zong thlathum chung kan helhum hnuah AA nih kan lak khawh. SAC ralkap ramri an sakhan pawl cu an chuah tak cang, tiah AA nih cathanh an chuah.
SAC ralkap an sakhan cheukhat zong AA nih phihkhamnak an tuah hna i, cu chungah India-Bangladesh-Myanmar ramri pawng ummi Meik sakhan zong aa tel, tiah theih a si. Rakhine ram chung le Paletwa hmunram ah umhmun khuarmi SAC ralkap pawl cu, kan kulh cang hna. Cu kan kulhmi hna riahcaw chanhnak le a dangdang thilri chanhnak ding caah SAC ralkap nih an i zuam cuahmah. Vanlawng, le hriamngan in ni fatin an kan kah, tiah AA nih an langhter.
Nizan September 18 ah SAC ralkap Jet Fighter 3 in bomb le roket voi 11 an thlak. Pehtlaiin suimilam cheu chung an kah hnuah Helicopter 2 nih suimilam 1 chung hrawng an kan kah, tiah AA nih an langhter. SAC ralkap nih Miwa(မီးဝ) sakhan in hriamngan in kah an bawmh hna caah cuka hmun cu AA nih hriamngan in kan kah ve hna. SAC ralkap nih hriamngan, vanlawng le ke in voi 7 an kan kah cang, tiah AA nih an thanh.
PDF Nih Pyusawhti Traning An Tuahnak Hmun Drone In Bomb An Thlak Caah 3 An Thi, Sagaing ramṭhen, KhinOo khua penguk zung chungah SAC ralkap nih Pyusawhti pawl traning an pek hna lioah ah PDF nih September 16 ah bomb an thlakhnawh hna i, 3 an thi tiah theih a si.
Penguk zung cu FUTURE HERO၊ Electric Thunder, ARF le LPDF phu in Dragon Urban Guerrilla Force hna i bawm in nizan September 18 chun sml 12:00 hrawng ah drone in bomb kan thlak hna caah SAC ralkap le Pyusawhti 3 an thi, 5 nak tlawm lo hliamhma an pu, tiah FUTURE HERO nih an langhter. Sagaing ramthen hi Kawlram pumpi chungah kahdohnak fak ngaingai a chuaknak ramthen pakhat a si i a pahnihnak cu Magwe ramthen a si. Hmundang ramthen chungah cun kahdohnak thawngpang tampi theih awk a um lo.
Hriamtlai Phu Nih Kalaywa Peng Palik Sakhan An Kah Caah Palik 5 An Thi, Hriamnam An Chuh Hna, Sagaing ramṭhen, Kalaywa peng Maseinsanpiah(မစိန်စံပြ) khua um palik sakhan pakhat cu, nizan September 18 zing sml 5:00 hrawngah hngalh lomi hriamtlai phu nih an kah caah sakhan hmu fapa le palik 4 an thi, tiah tualchung mi hna sinin theih a si. September 18 zing sml 5:00 hrawngah Maseinsanpiah palik sakhan cu hriamtlai phu nih an kah caah palik 4 le sakhan hmu fapa an thi, an sakhan zong mei in an khangh. Cu hnu caan tlawmpal ah palik le ralkap an phan, tiah tualchung mi pakhat nih a chim.
Tualchung mi pakhat nih, “Maseinsanpiah khua um palik sakhan cu September 18 zing sml 5:00 hrawng ah hriamtlai phu nih an kah caah palik 5 an thi. An sakhan cu tlang tangah a um i, tlangpar in an kah hna hnuah an ṭumhnawh hna. Cu sakhan cu palik le SAC ralkap 40 hrawng an umnak hmun a si i, an kah hna lioah tlawm te lawng an um. Zing sml 9:00 hrawngah palik le ralkap an phan i, chekhlatnak an tuah hna. Tualchung mi zong an zam dih,” tiah a chim.
SAC Ralkap Nih Inn An Khanghpiakmi Hna Chungkhar Sinah PDF Nih Um-Kheng Pekchanhnak An Tuah, SAC ralkap nih Kalaymyo pengah inn an khangpiakmi hna chungkhar 100 leng cu, PDF Kalay nih um-kheng pekchanhnak kan ngeih hna, tiah PDF Kalay Battalion 4 nih an thanh. Innkhat ah bel pakhat, uhkang pakhat, pakan pathum le darkeu pathum cio kan pek hna. Um-kheng kan cawknak hi mizapi nih nan kan bawmhmi tangka in kan cawk, tiah an langhter. Atu tiang ah Kalay peng chungah SAC ralkap nih inn an khanghmi hi 2,000 leng a si i, ralhrial in a zammi hi 10,000 leng an phan cang, tiah theih a si
Kumkhat chung Meik pengkomh kahdohnak voi 40 leeng a chuak, SAC ralkap 200 hrawng an thi! Tanintharyi ramthen, Meik pengkomh chungah, 2021 D-Day aa thok hnu, kumkhat chung kahdohnak ah, SAC ralkap le tualchung hriamtlaiphu kar kahdohnak voi 41 a chuak i, SAC ralkap 200 hrawng an thi tiah PDF(Meik) pengkomh Bataillon 1 nih nizaan September 18 ah cathanh an chuah.
NUG nih D-Day a thanh September 7 hnuin, tlangcung hriamtlaiphu, EAO, Pah-Kah-Phah le tualchung hriamtlaiphu (LDF) hna i bawmin cu kahdohnak cu an tuah tiah theih a si. D-Day thanh hnu, SAC ralkap he kahdohnak voi 41 a chuak, cu kahdohnak ahcun, SAC ralkap 206 an thi i, 257 nih hliam an tuar tiah an cathanh ah cun an langhter.
“SAC ralkap a tambik an thihnak cu, bomb puahhnawhnak in a si, meithal kahdohnak cu kan hriamnam aa thlau tuk caah cutluk piin, hmual a ngei lo, bomb puahnak nih hin a kan bomh ngai” tiah Meik pengkomh Bataillon 1 in, tuanvo ngeitu pakhat nih a chim. Cu kahdohnak ah cun, tualchung hriamtlaiphu phu fonh lei in ralkap 8 an nunnak a liam i, minung 13 nih hliam an tuar tiah theih a si.
Kanbalu,(ကန့်ဘလူ), Ayardaw le KhinOo kahdohnak ah SAC ralkap 16 an thi! Sagaing ramthen, Kanbalu peng le Tapeikkyin(သပိတ်ကျင်း) peng karlak ah, a luancia September 7 ni ah Ayerwaddy tiva in a rami SAC tilawng 6 cu, PDF phu 3 nih kan kahdoh hna i SAC ralkap 8 an thi tiah Temintamine Meaok Piohcia (သေမင်းတမန် မြေအောက် ပျောက်ကျား) phu hruaitu U Awng Thet Khine Su nih a chim tiah theih a si.
Nizaan September 18 zinglei sml 10 hrawngah Sagaing ramthen, Ayardaw peng, Yechin(ရဲချင်း) khuapawng i rallam a sialtu SAC ralkap 40 hrawng cu PDF tangrualphu nih an kahdoh hna i, SAC ralkap 5 an thi, hliamtuarmi an tam tiah theih a si. Cun, a luancia September 16 chun sml 12 hrawngah, Sagaing ramthen, KhinOo khuachung, Township Office ah, SAC ralkap nih Phyosawhti training an pek hna lio, chun sml 12 hrawngah, FUTURE HERO, လျှပ်စစ်၀ုိင်ယာကြိုး, ARF le LPDF hna nih drone pahnih in bomb kan thlak hnawh hna i, SAC ralkap le Phyosawhti 3 an thi, 5 nih hliam an tuar tiah Future Hero ralkap hna sinin theih a si.
Leave a Reply