A Poi Tuk Hringhran E; Khuaci A Mui Ko E!!

Irrawaddy Ramthen Ah SAC Ralhrang Nih Mipi Minung 30 An Tliah Hna!
==========================================
Irrawaddy ramthen chung Maubin khuapi le Pyapon khuapi, Khuate hna ah June thla ni 1 in 25 tiangah SAC ralhrang nih mipi sual ngeilo minung 30 an tliah hna tiah tlaihkhih a tong mi he aa neihniam mi pakhat nih a chim. Maubin khuapi chungah a um mi khuate hna ah khuami minung 20 le Pyapon khuapi ah a um mi khuate hna ah khuami minung 12 an tlaih hna ii an mah pawl cu chungkhar nih a tu tiang pehtlai khawh an si lo tiah theih a si.

Mah tlaih a tong mi pawl cu SAC ralhrang nih mithah lainawn he pehtlai in tiin minung pa 2, PDF he pehtlai nak nan ngei tiin minung 20, Bomb puahnak kong he pehtlaiin tiin minung 6, zaan ah a leng chuak mi minung pa 2, NUG bomhnak nan peek tiin minung pa 2 an tlaih hna tiah theih a si.

Mah an tliahmi hna kong he pehtlaiiin tuanvo ngeitu pakhat nih,” An tlaih hna timi cu a si ko. Sual nak a tuah mi pakhat hmanh an um lo. Sualnak a ngei mi an si ah cun Upadi ningin dan an peek hna lai aa techiami a si ko. Cheukhat an tlaih mi hna zong zumh loin ruahdawmh in hlethlainak tuah dingah an tlaih hna.” tiah a chim.

Tlaihkhih mi hna chungah nu zong an i tel ii kum hngakchia mino le kum upa zong an i tel tiah theih a si. Ramkhel kong zong zeihmanh a thei lomi zong an i tel tiah theih a si. Mah tlaihkhih a tong mi he pehtlai in tazacuaimi zong an um pinah ralphaw ah an hman mi zong an um tiah theih a si.

Chin ramkulh, Kanpelet peng chung June 9 CDF-Kanpetlet le SAC Ralkap kahdohnak a chuah hnu in, khua 11 in khuami mizapi hna cu a himnak hmun ah an zaam hna. Kahdohnak a daih hnu tualchungmi hna anmahle khua cio an rak tlun ṭhan tikah SAC Ralkap nih an innchung thilri vialte an rak laakpiak dih hna pinah inn lo an hrawhpiak hna caah ralzaamnak in a rak tlungmi hna nih harsaknak an tong, tiah theih a si.

Kanpelet tualchungmi pakhat nih cun, “Kan pawngkam khua dihlak ti awk in ral kan zaam hna i, kan zaam karah kan innchung thilri vialte an laak dih, innlo zong an hrawh hna, a rawkmi innlo thuamhṭhatnak le an firmi thilri zalh ṭhannak ding ah phaisa kan kawl cuahmah,” tiah a chim. Inn hrawhpiak a tongmi khua hna cu, Ze-laung-Pan,(ရဲလောင်းပန်း)Kyut Ttaw(ကျော့တော်), Am Pung (အမ်ပုံ) khua le khua dang dang hna an si.

Chaung U Peng Ah SAC Ralkap Mawṭaw Bomb Puah An Tong I, Ralkap 7 An Thi: Sagaing ramṭhen Monywa in a kal mi SAC ralkap mawṭaw 2 cu Chaung U peng, Kuipintaw(ဂွေးပင်တော) khua pawng ah Myaing Revolution Army(MRA) batallion 5 nih nihin June 28 zaanlei Sml 5 hrawng ah bomb an puah hna i ralkap 7 an thih lengah hliam tuar zong an tam ngai, tiah MRA nih an thanh. Bomb puahnak ah cun SAC ralkap mawṭaw pakhat a kaang, tiah theih a si.

Myaing peng dohtlennak a tuahtu Myaing Revolution Army (MRA) nih a thlithup in kahdohnak an tuah cuahmah lio a si i, mipi hna zong SAC ralkap cawlcanghnak lakah ralring tein um ding in theihter an tuah.

SAC Hriamngan Hliamhnak In Thlakhat Chung Ah Civil Mi 17 Nunnak A Liam!: RFA nih an khawmhsuatmi cazin ning ah Sagaing, Magwe, Chin le Kaya ramkulh le ramṭhen chung in hriamngan kahnak ruangah June 1 in June 28 tiang ah tualchung mi 17 nunnak a liam i, minung 30 leng hliam an tuar, tiah theih a si.

Kahdohnak faak a chuahnak Sagaing ramṭhen in June thla chung ah SAC ralkap hriamngan kahnak in tualchung mi 5 nunnak a liam i, minung 14 hliamhma an tuar tiah theih a si. SAC ralkap lei in chimphuannak nawlngeitu general Zaw Min Htun nih cun tualchung mipi kan kap hna lo, PDF camp lawng kan kah, tiah a chim. Nunnak a liammi hna zong hi PDF an si ko nain, PDF tiah chim duh loin tualchung mi tiin thawngthanhnak an tuah, tiah a chimchap. PDF nih kutser hriamngan le drone an kahnak in tualchung mi nunnak liammi zong an um, tiah general Zaw Min Htun nih cun a chim.

Myanmar ramchung ah SAC ralkap nih nawlngeihnak an laak hnu kumkhat leng chung ah vawlei tang phummi bomb le a puak lomi hriamthil (UXO) ruangah ngakchia 115 tluk nunnak a liam cang, tiah UNICEF nih June 24 ah cathanh an chuah. Ramkhel lei thongtla zohkhenhtu AAPP nih June 27 cathanh an chuahning ah SAC ralkap nih nawlngeihnak a laak kumkhat chung ah SAC ralkap uk duhlo in cawlcanghnak a tuahtu hna le tualchung mi, minung 2,032 nunnak a liam cang i, tlaihkhih a tongmi dihlak cu minung 14,304 an si, tiah an langhter.

SAC Ralkap Tlaih A Tongmi PhawngPin Khuami 7 Cu An Nunnak A Liam!: Sagaing ramṭhen Phawngpin(ဖောင်းပြင်) peng, AuthṬawng(အောက်တောင်း) khuami 7 cu SAC ralkap nih an tlaih hna hnu in an nunnak a liam cang, tiah kan theih tiin PhawngPin(ဖောင်းပြင်) PDF nih an thanh.

AuthṬawng(အောက်တောင်း) khua palik camp cu 2022, January 22 ah PhawngPin(ဖောင်းပြင်) PDF nih luhhnawh in an rak kah hna hnu ah, AuthṬawng(အောက်တောင်း) khuami 9 tlaih an tong i PhawngPin(ဖောင်းပြင်) khuachung battalion umnak hmun ah an hren hna. Tlaih a tongmi minung 9 chung in U Tin Mawng le a tupa cu phungrelnak 505(a) in tazacuai an tong i, kumhnih chung thong thlak ding in biakhiahnak an tuahpiak hna. A taangmi midang 7 kong cu an thawngpang zeihmanh theih ding a rak um lo.

Tlaih an ton thla 4 a rauh hnu ah an thawngpang theih a si ti lo mi minung 7 hna cu May thla chung i SAC ralkap rallam sialnak hmun ah an nunnak a liam cang, tiah theih a si, nain tantakmi chungkhar hna sinah SAC ralkap nih an ruak hlamternak le theihternak an tuah a lo.

Palik camp luhhnawh in kahdoh an rak ton lio ah AuthTawng(အောက်တောင်း) khuami bawmhnak tel lo cun a si thiam lo an ti caah, SAC ralkap nih U Thein Lwin le U Moe Aung telh in khuami 9 an rak tlaih hna, tiah PhawngPin(ဖောင်းပြင်) PDF nih cathanh an chuah.

Post Views: 63

A Poi Tuk Hringhran E; Khuaci A Mui Ko E!!

Be the first to comment

Leave a Reply Cancel reply