Hakha Biaceih Zung Nih Nu Pakhat Telh In Minung 9 Cu Kum 5 Thong Thlak Ding In Bia An Khiah!
================================================
Chin ramkulh, Hakha biaceih zung nih nu pakhat telh in minung 9 cu sual tuahnak upadi in thong an thlak hna, tiah CHRO sin in theih a si. Minung 9 hna cu Hakha palik camp in palik bawi chang Ṭin Kyaw nih taza a cuai hna i, a luancia July 29 ah minung 8 cu sualtuah dohnak upadi Section 51 in kum 5 thong thlak ding in bia an khiah piak hna. A dang pakhat cu Section 52 in kum 3 thong thlak ding in bia an khiah, tiah CHRO ṭuanvo ngeitu nih a chim.
“Annih hi Febuary le March thla ah an tlaihmi hna an si. Atu hi cun thla 5 a tling cang lai. An tlaihmi hna hi tualchung mi an tam deuh. An phone ah lunghrinhmi hmanthlak an hmuh i, CDF he pehtlaihnak nan ngei tiah an tlaihmi hna an tam deuh,” tiah a chimchap. “Hi dohthlennak hi a tam deuh cu mino lawngte an si caah SAC nih mizei poh ka ral an si tiah a hmuh hna. Cuchungah mino an hmuh hna ahcun an tlaih hna. Tualchung mi sawhsawh hi cu ṭha tein an kan chawnh awk a si. A dik lo in thongthlak le biakhiahnak an tuah ding a si lo,” tiah CHRO ṭuanvo ngeitu nih an chim.
Kum 5 thong thlak ding in bia khiahpiak mi chung ah nu pakhat aa tel ve. Anih hi Kalay thonginn ah an kuat lai, tiah theih a si. Atu ah SAC ralkap nih Hakha ah an tlaihmi hna hi 30 hrawng an tang rih, tiah theih a si. SAC ralkap nih sualnak ngei lo mipi kahdoh, innlo hrawh piak le khangh piak ti bantuk an tuahmi vialte hi ralkap sualnak nganpi a si, tiah CHRO nih an langhter.
SAC ralhrang nih Hakha ah tlaih mi hna hi Rungtlang (266) leiah ramkhel le CDF nan si tiah puhmi hna le zumh lo mi cu an kuat hna tiah kan theih. Hakha ah tlaih mi pakhat luatmi nih, ” An kan tlaih i Hakha palik sakhan ah zohfelnak an kan tuah. Ka phne chung cu an hlet hlai i CDF he aa pehtlai mi pakhat khat an hmuh cun Rungtlang lei ah an kan kuat. Lamzah lio le ramkhel kong he aa pehtlai mi an si zong ah an kuat hna. A sinain tlaih mi chungah cheukhat cu phaisa in an hlam ter hna i kuat manh lomi zong an um. Cu pinah Kalay le Monywa lei ah kuat mi zong an um pah.” tiah a chim.
Monywa, Ye Oo Le Yesagyo Kahdohnak Ah SAC Ralkap 35 An Thi!: Sagaing ramṭhen, Monywa, Ye Oo le Yesagyo kahdohnak ah SAC ralkap a thimi an tam, tiah PDF nih cathanh an chuah. Sagaing ramṭhen, Ye Oo peng Ṭinṭingyan khua cu, July 28 in SAC ralkap 140 hrawng nih an khangh i, DRPA, FRF, Shwebo pengkomh Battalion 12, le PDF ṭangṭi phu hna nih July 28 in 30 tiang ah SAC ralkap 25 kan thah hna, hliamhma pumi zong an tam, tiah Dictatorship Revolution People’s Army(DRPA) nih cathanh an chuah.
Magwe ramṭhen, Yesagyo peng ah August 1 zing sml 11:30 hrawng ah Kyaukhlekha(ကျောက်လှေခါး) khua pawng um, Gold Power datsii dawr hmai ah bomb deu le bomb tak kan hmanh, tiah PDF nih an langhter. PDF nih an hmanhmi bomb deu cu SAC ralkap nih meithal in voi 50 hrawng an kah hnu, an kir lei ah bomb ṭhami nih an puahhnawh hna i ralkap 3 an thi, tiah theih a si.
Cu kahdohnak ah cun Yesagyo Revolution Group-YRG, Urban Underground Revolution Force -UURF / Shwe Nyar Myae – PDF le Zarmani Blood Guerilla Army – Myaing hna i bawm in an kah hna, tiah theih a si.
Cupinah August 1 ah Sagaing ramṭhen Monywa peng Kanpia khua le Teykyikone(တဲကြီးကုန်း) khua karlak ah kahdohnak a chuak i, SAC ralkap cu bomb in kan puahhnawh hna caah ralkap 10 leng an thi, tiah PDF nih an langhter.
Mataya Kahdohnak Ah SAC Ralkap 10 An Thi, Gangaw Ah Mingiatu Palik Nu Pakhat PDF Nih An Thah: Mandalay ramṭhen, Mataya(မတ်တရာ) peng ah July 27 in August 1 tiang kahdohnak a chuak i, SAC ralkap 10 hrawng an thi, tiah Walet PDF sinin theih a si.
July 27 in Mataya peng Yelaykywin(ရေလယ်ကျွန်း) khua ah a lutmi SAC ralkap pawl cu Pah Kah Pha ṭangṭi phu hna nih an kah hna. July 27 in August 1 tiang an i kap i SAC ralkap 10 an thih lengah 30 hrawng hliamhma an pu, tiah theih a si. Cu kahdohnak ah cun Walet peng PDF, Shwebo pengkomh No.18 Battalion le No. 15, 17 Battalion, Shwebo Battalion 5(ABC), Mataya Pah Kah Phah le a dang hriamtlai phu hna i bawm in an kah hna, tiah theih a si.
Magwe ramṭhen, Gangaw palik camp in palik nu pakhat Khine Zar Kyi telh in mi pathum cu July 31 ah Yaw Defense Force(YDF) nih kan tlaih hna. Palik nu cu a zam caah kan kah thah. A dang pahnih cu ralkap upadi ning in dan kan tat hna lai, tiah YDF nih cathanh an chuah.
July 30 zanlei sml 6:30 hrawng ah Tanintharyi ramṭhen, Yephyo(ရေဖြူ) peng ah SAC ralkap motor cu PDF nih bomb an puahhnawh hna, tiah theih a si. Cu kahdohnak ah SAC ralkap motor a rawkmi a um i, ralkap 7 hliamhma an pu. A thimi le hliamtuarmi an um le um lo kan fehter kho lo, tiah PDF nih an langhter.
SAC Ralkap Dirpi Lamzawhtu Hna Humhimnak Lakpiaktu Ralkap Cu Bomb Puah An Ton Caah 4 An Thi: Magwe ramṭhen, Myaing peng August 1 zinglei ah SAC ralkap dirpi in lam zawhtu pawl humhimnak lakpiaktu ralkap cu bomb puahhnawh an tong, tiah theih a si. SAC ralkap pawl cu Myaing in meng khat le cheu hrawng aa hlatnak Uyinma(ဥယာဥ်မ) khua ah, ralkap dirpi in lamzawhtu humhimnak an lakpiak hna lio ah, bomb in kan puahhnawh hna, tiah PDF in chungtel Bo Let Ya nih a chim.
“Zing sml 9:45 hrawng ah Myaing in Mandalay kalnak lam lei ah kan puahhnawh hna. Ralkap 20 leng an si. Lamzawhtu an phanh hlan ah Myaing peng khuate hna cu an kulh dih. Cu ah cun bomb kan puahhnawh hna hi a si. Cu kahdohnak ah SAC ralkap 4 an thi i, 3 hliamhma an pu. Pakhat cu a mitcaw,”
tiah a chimchap.
A luancia July 31 lio ah Myaing peng chung ah sentari cawngh ding ah a kalmi PDF ralkap pahnih cu SAC ralkap he an i kah caah an pahnih in an nunnak a rak liam. SAC lei in ralkap pahnih an thi ve. Oakpho Peng Bomb Puahnak Ah SAC Ralkap 3 An Thi, Tam Ngai Hliamhma An Pu!: Pago ramṭhen, Oakpho(အုတ်ဖို) peng Pago Roma aa pehnak(ramri) ah hmunhma humhimnak tuah ding in a kalmi SAC ralkap motor cu nizan August 1 ah PDF nih bomb an puahhnawh caah ralkap 3 an thi i, hliamhma pu mi zong an tam, tiah theih a si.
Oakpho peng ni chuahlei um, Kantni khua ah rallam a sialmi SAC ralkap motor 3 cu nizan chun sml 1:30 hrawng ah bomb puahhnawh an tong, tiah theih a si. “An motor cu cung lei ah aa hlorh dih. SAC ralbawi pakhat le ralkap dang 2 an thi i, hliamhma pu mi zong an tam. A thimi cu mizaw phorhnak motor nih a lak hna,” tiah Tharyarwaddy PDF in ṭuanvo ngeitu nih a chim.
SAC ralkap hna cu humhma humhimnak a tuahmi an si i, Innma ah umhmun khuarmi Ṭatma 66 kuttang Oakpho peng Kha La Ya 6 Battalion in an si, tiah theih a si. Cu kahdohnak ah cun Tharyarwaddy PDF Battalion 3802, Company 4 le Kyupinkauk(ကြို့ပင်ကောက်) Hero Guerrilla phu hna i bawm in an kah hna, tiah theih a si. Battalion 3802, Company 4 phu nih, SAC ralkap kuttang rianṭuantu Tharyarwaddy pengkomh Letpaṭan peng Electric zung zong July 30 zing sml 3:00 hrawng ah bomb puah in ralrinnak an rak pek cang hna.
Leave a Reply