A Poi Tuk E; Thawngpangchia Theih A Si E!!

Ram Pumpi In Ralzaam Dirhmun A Phanmi 860,000 leng An Um Cang Tiah UNOCHA Nih A Thanh
=================================================
SAC ralkap nih nawlngeihnak an lak kumkhat le cheu chung ah ralzaam dirhmun a phanmi cu minung 860,000 leng an um cang, tiah United Nation’s Office for the Coordination of Humanitarian Affairs(UNOCHA) nih July 31 ah cathanh an chuah. Ralzaam dirhmun a phanmi 866,400 chung ah a tambik hi Sagaing ramṭhen in an si i, minung 470,000 tiang ralzaam dirhmun an phan. A changtu cu Karen ramkulh an si i ralzaam dirhmun a phanmi minung 82,400 an um.

UNOCHA cazin ning ah Magwe ramṭhen chung in ralzaam dirhmun a phanmi 79,200 an um i, Karen ramkulh chung ah mahle umnak hmun kaltak in ralzaam dirhmun phanmi 74,500 an um. Cazin ah langhter loin a taangmi ralzaam hna cu Karen ramkulh, Kachin ramkulh, Shan ramkulh chaklei le thlanglei, Bago ramṭhen nichuah lei, Tanintharyi ramṭhen le Mon ramkulh hna in an si tiah UNOCHA nih a langhter.

SAC ralkap nih uknak an lak hlan le uknak an lak hnu in ralzaam dirhmun phanmi dihlak cu sing 12 an si nain, atu tiang ah US dollar 106 million lawng kan bawmh khawh hna, tiah UNOCHA nih a langhter.

Relcahp, Salingyi Peng SAC Ralkap Umnak Cu MRDA Nih An Kah I Ralkap 9 An Thi: Salingyi (ဆားလင်းကြီး) pengchung ah ummi SAC ralkap le Wampaung(ဝမ်ပေါင်) campany palik gate hngahnak hmun cu tualchung hriamtlai phufonh nih an kahdoh hna i cu kahdohnak ah cun SAC ralkap 9 an thi, tiah Bo Naga hruaimi Myanmar’s Royal Dragon Army (MRDA) nih nihin August 1 ah cathanh an chuah.

Kahdohnak cu July 29, zaanlei suimilam 3:00 hrawng ah a chuak i, Salingyi(ဆားလင်းကြီး) peng Pepinkan(ပေပင်ကန်) khua ah a ummi SAC ralkap hna cu tualchung hriamtlai phufonh nih hriamngan le hriamhme in an kah hna. Kahdohnak chung ah cun SAC ralkap 9 an thi, tiah MRDA nih cun an langhter.

Cu bantuk in July 30 zaanlei suimilam 5:14 hrawng ah MRDA le One Star Task Force phufonh nih Salingyi(ဆားလင်းကြီး) pengchung Pathein – Monywa lamkam ummi Wampaung(ဝမ်ပေါင်) campany palik gate hngahnak hmun cu 40 mm in an kah ṭhan hna caah palik bawi le palik 4 nih hliamhma an tuar, tiah theih a si.

Yaw Tualchung Hriamtlai Phu Nih Palik 3 An Tlaih Hna! Magwe ramṭhen, Gangaw palik sakhan in YDF hmunram chung ah ngaitthlainak tuah ding in July 31 ah a phanmi palik 3 cu kan tlaih hna, tiah Yaw tualchung hriamtlai phu YDF nih cathanh an chuah. YDF hmunram chung ah a lut mi palik nu Khine Za Kyi Lwin, Pa Phyo Tat Kyaw le a nau pa Ngyi Naing Win Htun cu YDF nih tlaih ding in an dum hna lio ah palik nu Khine Za Kyi cu cycle he a zaam caah an fimhlawm, tiah theih a si.

Mandalay Ah SAC Nih Mipi Ralkap Min Putter In Hriamtlai Phu An Ser, Hriam An Tlaihter Hna! Mandalay khuachung ah a luancia ni tlawmpal ahkhan SAC ralkap nih anmah lei ṭanhtu micheukhat cu hriam tlaihter in mizapi venghimtu phu min an putter hna, tiah theih a si.

SAC ralkap nih thawngthanhnak an tuah ning ah Maharaungmay (မဟာအောင်မြေ) peng GAD zung ah biaruahnak tuah in hriam an tlaihter hna i, Seinpan (စိန်ပန်း) sang mizapi runvennak rian ṭuan ding in meithal tawi 10 le kuan 70 cio an pek hna, tiah an thanh.
Sagaing ramṭhen le Magwe ramṭhen ah SAC ralkap nih pyi-tuh-sit phu dirh in Mandalay khuachung le hmun dangdang tiang cawlcanghnak an tuah, tiah theih a si.

Karenni Ramkulh Ah Kan Hnu July Thla Chung Ah Kahdohnak Voi 48 A Chuak! Karenni ramkulh ah a luancia July thlakhat chung ahkhan kahdohnak voi 48 a chuak i, cu kahdohnak chung ah cun SAC ralkap 88 an thi, tiah KNDF nih nihin August 1 ah cathanh an chuah.

SAC ralkap nih July thla chung ah van lei kahdohnak voi 21 an tuah i, hriamngan kahnak ruangah tualchung mi 2 nunnak a liam, inn pakhat cu mei in an khangh, tiah an thanhmi ah an langhter. July thlachung a chuakmi kahdohnak ah Karenni hriamtlai phufonh nih meithal 21 an lak, tiah theih a si.

KNDF ralkap lei in Demoso peng, Dawkhami (ဒေါခမီး) kahdohnak ah ralkap pakhat a nunnak a liam ve, tiah an cathanh chuahmi ah cun an langhter. Phyu Peng Siangsangrun Cachimtu Nu Cu Kum 11 Thong Tla Ding In Biaceihtu Nih Biakhiahnak An Tuahpiak: Bago ramṭhen, Phyu (ဖြူး) peng siangsangrun cachimtu Daw Win Lay Phyo Oo cu Taungoo(တောင်ငူ) thong inn biaceih zung nih kum 11 thong thlak ding in biakhiahnak an tuahpiak.

Daw Win Lay Phyo Oo cu nikum September 18 ahkhan Phyu (ဖြူး) khuachung i a nu le pa inn ah SAC ralkap nih an rak tlaih i, phungrelnak cang 50(J) in taza an rak cuai. July 21, 2022 ah Taungoo thonginn biaceih zung nih Daw Win Lay Phyo Oo cu kum 11 thong thlak ding in biakhiahnak an tuahpiak. Daw Win Lay Phyo Oo cu siangsangrun no.2, Kangyutkun(ကညွတ်ကွင်း) ah cachimtu pakhat a si.

Phyu Peng Siangsangrun Cachimtu Nu Cu Kum 11 Thong Tla Ding In Biaceihtu Nih Biakhiahnak An Tuahpiak, Bago ramṭhen, Phyu (ဖြူး) peng siangsangrun cachimtu Daw Win Lay Phyo Oo cu Taungoo(တောင်ငူ) thong inn biaceih zung nih kum 11 thong thlak ding in biakhiahnak an tuahpiak.

Daw Win Lay Phyo Oo cu nikum September 18 ahkhan Phyu (ဖြူး) khuachung i a nu le pa inn ah SAC ralkap nih an rak tlaih i, phungrelnak cang 50(J) in taza an rak cuai. July 21, 2022 ah Taungoo thonginn biaceih zung nih Daw Win Lay Phyo Oo cu kum 11 thong thlak ding in biakhiahnak an tuahpiak. Daw Win Lay Phyo Oo cu siangsangrun no.2, Kangyutkun(ကညွတ်ကွင်း) ah cachimtu pakhat a si.

Panglong Peng Wamkung Khuami 31 Cu SSPP Nih An Tlaih Hna! Shan ramkulh Panglong(ပင်လုံ) peng Nawnglai (နောင်လိုင်) khuakomh, Wamkung(ဝမ်ကုန်း) khuami 31 cu Shan State Progress Party(SSPP) nih nihin August 1, zinglei suimilam 5:00 hrawng ah khuachung ah lut in an tlaih hna tiah, Panglong(ပင်လုံ) khua lei ah a zaam mi hna nih an chim.

“Nihin zinglei in SSPP pawl cu khuachung ah lut in khuami an tlaih hna i, khuachung ah um ngam lo in an zaam hna caah atu hi khuachung ah minung an um ti lo, a himnak hmun ah an zaam cio hna,” tiah Panglong (ပင်လုံ) khua lei ah a zaam mi Wamkung (ဝမ်ကုန်း) khuami pakhat nih a chim.

Wamkung(ဝမ်ကုန်း) khuami 31 hna cu SSPP nih an motor in an kalpi hna caah SSPP headquarter umnak hmun ah an kalpi hna lai, tiah Wamkung khuami nih cun an chim. Tlaih a tongmi hna cu zaanlei tiang ah an thawngpang theih a si rih lo. SAC Ralkap Nih July Thlachung I Sualnak Ngei Lomi An Thahnawnnak Kong Ah NUG Nih Cathanh An Chuah!: SAC ralkap kuttang um battalion 77 ralkap le phyosawhti 100 hrawng nih pale (ပုလဲ) peng i khuami minung 29 an rak thah hna nak kong cu NUG nih cathanh a chuah. Sagaing ramthen, pale (ပုလဲ) peng thlanglei i minung 29 thah an tonnak ahhin kum 15 nu pakhat zong ai tel.

“Kan ram a dai ko” tiah vawleipi theih ah a chim lengmangtu SAC ralkap pawl nih Myanmar ram laifang i Sagaing ramkulh ah dongcat loin mithah lainawnnak an tuah rih ko, ti in NUG cozah Ministry of Human Right lutlai U Awng Myo nih a chim. A luancia July 10 zinglei suimilam 9 lio zong ahkhan nu pathum hna nih cun SAC ralkap pawl cu khua ah an um ti lo tiah ruat in inn an va hlam i, sinain meithal puah thawng an theih ṭhan caah thinpang ngai in zunput chung ah an lut i culio ah cun SAC ralkap nih zunput chung ah luhhnawh in an thah hna, tiah an cathanh ah cun an langhter.

Cupinah SAC ralkap pawl nih cun khuami hna inn chung ah thilri an hmuh mi poh cu an i laak i, Innzuat saṭil-arva hna zong an thah hna. A luancia July thlachung ahkhan Sagaing ramthen chung ummi khuami zeimawzat cu SAC ralkap nih an thah hna nak kong an langhter i, khuate lei ah mithah lainawnnak cu an tuah thiamthiam rih ko, ti in NUG Cozah Ministry of Human Rights nih cathanh a chuah.

Tharsi ah LPDF Sakhan Cu SAC ralkap Nih An Luhhnawh I, Sakhan Chung Kahdohnak Ah SAC ralkap 12 An Thi! Mandalay ramṭhen Tharsi (သာစည်) peng Myatkhain (မျက်ခါးအင်း) khua pawng i Black Brother, LPDF SINTGAING le Future Star PDF nih hriamthil an sernak sakhan cu SAC ralkap nih an luhhnawh caah kahdohnak a chuak. Cu kahdohnak ah cun SAC ralkap 12 hrawng an thi i, cu sakhan cu kan kaltak, tiah LPDF in chimphuannak nawlngeitu Joeka nih Media ah a chim.

SAC ralkap nih LPDF sakhan cu a luancia July 25 le July 29 ahkhan luhhnawh in an rak kahdoh hna. Kaphnih kahdohnak cu a fah deuh caah SAC ralkap nih thazaang an chap i tualchung hriamtlai phufonh lei cu hnu an tolh, tiah theih a si. LPDF sakhan an luhhnawh hnu ah SAC ralkap hna cu Kyaukpachoh(ကျောက်ပချုပ်) khua le Myatpain(မျက်ပါးအင်း) lei ah kal in khuami inn 4 cu meikhangh in an hrawhpiak hna, tiah theih a si.