April thla Ain May thla chung tiangah Myanmar ram chung pumpi ah Tek tlaknak voi 32 a chuak ii minung 31 an nunnak a liam ii minung 9 nih hliamfak an tuar tiah theih a si. ” A tu ah April thla in May thla chung tiangah voi 32 tiang Tek tlaknak a chuak tiah theih asi.
Mah chungah minung 31 an nunnak tiang a dih ii hliam a tuar mi hi minung pa 9 an si. Tek a tlah lio ah(Tek nih a tlak mi chungah) a nunnak tiang a dih mi le hliam tuar mi hi an tam deuh ngai. Inn le loo a rawk timi cu a um tuk lo, a tlawm deuh ngai ngai. Kokek harnak a tongmi , Tek nih a tlak mi pawl hi Kokek harnak he pehtlai in zung lei nih bomhnak a peek mi hna zong an um.” tiah Kokek harnak lei kong he pehtlai in taunvo ngeitu Daw Phyu Lele Htun nih a chim.
Tuanbia a duhmi caah relchap, NGATAINU , Hlan lio ah khua pakhat ah nufa an rak um. A fanu cu a min ah Nga Tai tiah a auh. Nga Tai cu aa dawh tuk ah hin a hmumi paoh a duh lomi an um lo, zoh an rak cim hrimhrim lo. Mikip nih an dawt, a pumrua that le a tungtai rem lengah a hmaithlak hrim hi a rak I dawh tuk ti a si. A mitmu hrimhrim hi thipum fang dawh in aa dawh I a mit-au nih zing niceu bang a rak I dawh ti a si. A samthlai nih le aa rem i a ziaza le tha kaw, nu sinak a tlinh lengah a aw a nem i a pawngkam a ummi paoh nih an lawmh dih tawn.
Kum khat cu ruahpi a sur ciammam i a han kho ti lo. A fak chin lengmang i ti a lian thluahmah. Cucaah an inn le an lo zong a phum thluahmah. Mi vialte cu an inn an lo chuah tak in ti nih a phak rih lomi tlangcung ah an kai dih. A kai kho lomi cu ti nih a phum hna i an thi len cang. Ti cu a thang chin lengmang i tlang cu phum dih a timh cang. Saram pawl zong tlangsannak cu an panh cio. Minung le satil saram hna cu tlang a sannak bik ah cun an i sual len hna. “Zeidah a cang hna?” tiin zapi cu khuaci mui in an tap, an ai, an hram len.
Ti cu a thang chin lengmang i “Tai, Tai, Tai” tiah Nga Tai min chim pah in tlangpar cu a hun naih chin lengmang. Ti awthawng cu an theih tikah “Ti nih hin Nga Tai hi a duh caah a si ko,” tiah an ruah. A sam pakhat an phawi i ti lak ah an thlak. “Tai” a ti i ti cu tlawmpal a vung zor. Asinain a rauh hlan ah a hung thang than. A angki an thlak than. “Tai” a ti i ti cu a vung zor deuh nain “Tai, Tai” a ti i a hung thang than lengmang. Cuticun Nga Tai sam le thilri le a hnipuan cu an thlak dih cang.
Ti cu “Tai, Tai” a ti i tlang ah a hung kai chin lengmang. Khuakhan awk an hngal ti lo i a donghnak ah mi vialte thihnak cha cun minung pakhat thih a tha deuh lai, an ti i Nga Tai cu thlak an timh. Asinain a nu nih, “Kanmah sual ruangah kan tonmi a si tung lo, zeiruangahdah ka fanu theng cu kan thlak in kan thither lai,” a ti i a siang lo. A fanu cu fekte in aa tlaih I zapi he an i chut len, a donghnak ah an chuh khawh i Nga Tai cu a tah a ai bu in tilian ahcun an vun paih. Tilian chungah cun Nga Tai cu a vung pil zuahmah. A nu nih a tahbu le a hrambu in, “Ka fa dawt sian lo, Nga Tai aw… nang ngami ah vung i cang law,” tiah a cah ta, ti a si.
Nga Tai cu a nu bia bang ngami ah aa cang taktak. Cucaah ngami cu minung bantuk in hnuk a ngei I taw zong aa ngeih venak a si an ti. Nga Tai nu cu a lung a leng tuk. A fanu zun in a zaw zungzal, ti a si. A fanu zung cu a tuar i ei le din zungzuam lo le tuan zaang tlung lo in a um. Mi thil he fing le tlang kip a cult awn. Aa chokvak lengmang i tlangsang kip hin khua za a cuan tawn. A umhar le a lunglen celh loah thiam tal ka bang lai a ti I thiam tial baannak dingah tlangsang le tlangdawh a kawl I a donghnak ah tlangdawh ngai pakhat a hmuh i cuka cun thiamtah aa thawk. Thantlang peng Khualhring tlang chungah tlangsang ngai pakhat a um i, cu tlang cu “Ngatai nu tlang” tiah atu tiang auh a si. Pupa chan ah cun Nga Tai nu thiamruak zong a rak um, an ti. Nga Tai nu tlang ah cung thiam a tak i Falam peng Ramthlo khualu Zinghmuh tlang ahkhin a thiam tlang a rak sih.
Nga Tai nih a nu thiam a tah le a lunglen kha a theih tikah minung in a hun i langh i a nu cu a hung veh tawh, ti a si. A nu sin a phanh tikah a taitang cu nga a si i a tai cungcu minung a si. Minung bantuk in minung sin ah um awk a that lo caah caansau um lo in ti chungah a kir than tawn. A nu a thih hnu zongah Nga Tai cu tlang ah a kai tawn i a nu um tawnnak kha lungleng le ngaihchia in a rak cult awn. Kha ti tlang i a kai kha minung nih an hmuh tawn i ngaknu dawh tuk a si fawn, a tai tang nga a si fawn tikah a hmumi kip an khuaruah a har i a min ah Ngatainu tiin an auh colh ti a si.
Tuanbiadang pehchap, Utlak te, Hlan lio ah siangpahrang a rak um. Fanu panga a ngei. An khua pawng ahhin nuhmei nu nih fapa pakhat a rak ngeih ve. A min ah Utlak a si. Utlak te nih cun ka nu siangpahrangpa fanu rak ka halpiak tiah a fial. A nu nih cun ka fa zeitin dah siangpahrang fanu cu ka hal ngam hna lai kanmah hmanh kan sifah he, nisawh le serhsat ah an ruat lai i kanmah hmanh an kan tthat lai lo maw? tiah a nu nih cun a ti. A fapa nih cun a duh lo, ka halpiak ko ti in a ngiar lengmang. A donghnak ah siangpahrang inn ah cun hmai chia ngai in aa thawh.
Siangpahrang inn ah cun a lut i siangpahrang hmai ah cun a tthu. Siangpahrangpa nih cun zei ko dah a si rak ka chim tuah tiah a hal. Siangpahrang pa, na hmai hmanh khah a si lo nain ka fapa nih na fanu a duh tuk i rak ka halpiak tiah a ka ti lengmang caah ka rak in hal ko tiah a ti. Siangpahrangpa nih cun na fapa cu a min ahodah a si tiah a vun hal. Utlak a si tiah a chimh. Siangpahrangpa nih cun, a cu Utlak ca i ka fanu hal cu dah ngai tiah a ti i a thinhun tukah an tuah kho lo ding kha serhlaih in tuah a fial hna.
Khah a si ah cun, ka inn velchum dihlak hi tuzan hrimhrim ah samit (kattaza) nan phah dih lai. Nan phanh (phah) khawh lo ahcun, nan nufa in kan thah colh hna lai, a ti. Nuhmei nu cu hmai chia le ngaihchia taktak in a tin. Ka ti ttheo lo maw, kanmah thihnak tu a si lai kan ti na duh lo a ti i a fapa cu siangpahrang chimmi vialte cu a chimh dih. A fapa nih, ka nu na tha chia hlah kaa zuam lai a ti.
A zan ah cun Utlak nih siangpahrangpa a chimningte in an in velchum le an inn lam vialte tleu lak in a phah piak dih. Athaizing ah siangpahrangpa cu zingkate in a tho i an inn lam le an velchum cu a tleu in a tleu kha a hmuh tikah a khuaruah a har ngaingai. Nuhmei nu a rak tiammi kha a vun hngalh tthan. Utlak nih a nu cu a voihnihnak siangpahrang inn ahcun a kalter tthan. Siangpahrangpa cu ka biakam a si bantuk in kan pek ko hna lai tiah a ti hna. Siangpahrangpa nih cun a fanu le kha a auh hna. Ka biakam a si bantuk in nanmah lakah pakhat paoh nih Utlak nan vaat lai, a ti hna.
A fanu upa bik kha a vun chimh i a duh nemmam lo. A changtu a fial i cu bak, a chang chin a fial i a duh nemmam ve lo. Siangpahrangpa cu a lung a dong tuk cang, nan duh lo ahcun keimah an ka thah cang lai hih a ti i a lung a rawk ngaingai. A donghnak ah a hniang biknu nih ka pa nangmah thihnak cun keimah nih ka vaat ko lai, a ti i a pa cu a thawhpi a hun chuak khawh. Ngaknu cu Utlak vat ding cun aa thawh i lampi ah Utlak nih a duhmi rawl khuangterit le khaubok tepawl a tlaihpah hna i Utlak te inn cu a phan. Utlak te cu um chung te ah cun arak um. Aa putmi rawl cu a hei pek. Cuticun hmun khatte ah cun an um ti in khua an sa. Utlak te a nupi le Utlak ta a nu cu ni fatin lo ah an kal lengmang. Lo lam an tlun pah ah Utlak nupi nih cun an pa rawl ah khaubok le cangcel tibantuk a von kawlpah lengmang.
Voi khat cu Utlak nupi cu amah lawng lo a kal. Tlaitlan cung in khua a cuan i viral ah siangpahrang thuam in a rami tlangval pa a hmuh. Khi pa khi hika ahhin ra seh tiah saduh a thah cuahmah lio ah tlangvalpa cu a sin a rak phan. Ziah siangpahrang fanu na si lo maw, hika ah cun zeidah na tuah a ti. Ngaknu nih cun hi ka hin pei Utlak te he kan i um cu a ti. Siangpahrang thuam in a ummi tlangvalpa nih cun, ra keimah hi i um usih, kan zaam lai a ti. Minu nih cun a si kho lo, Utlak te he kan i um cang cuta, a ti. Tlangval pa cu aa lunghmuih tuk, va le cungah dawtnak na ngei, hihi thilttha si ko a ti a tluntaak. Utlak nupi zong cu inn ah a tlung ve. Lampi ah cangcel a hun kawlpah tlawmpal ah inn a phan. Um chung i Utlak te cu cangcel cu a hei pek.
Nikhat cu Utlak nupi le a nu cu lo ah an kal tthan. Utlak te cu a rak chuak i lengah a rak vaak. A vahnak ah eek inn chungah a tla. Zanlei ah an hung tlung i um chung ah a rak um ti lo. A nupi nih cun hehchet tiah a kawl i a hmu ti lo, a donghnak ah eek-inn ah a cawl len khi a hmuh. Cengceh in a ceh i a khawlh a khawlh hnu ah um chung ah cun a chiah tthan. Ni khat cu rawl ei awk an ngei ti lo. Utlak nupi nih cun, zeipaoh a si ah ka pa le sinah ka va kal lai i rawl ei awk ka va hal hna lai a ti. An khua lei ah cun, kal ah aa thawh. Utlak nupi an khua a tlun kar ah Utlak te cu tlangval mui dawh taktak ah a rak i cang.
An inn zong tlakrawh inn ttha taktak in a rak sak. A nupi cu siangpahrangpa le a mithi lalang pawl nih riahcaw tampi he Utlak sinah cun an rak thlah. Utlak nupi nih an inn a hmu kho ti lo. A hlan an inn a rak simi pher inn chia te umnak ah khan tlakrawh inn dawh tukmi a rak um tikah a khuaruah a har i, an inn cu a kawlpi hna. Inn hmai an phanh ahkhin a nu nih a hei auh hna. Utlak nupi nih cun a thlite in a va caah a kawlpiakmi cangcel cu aa put i um cu a va zoh. A um ti lo i a lau tuk, a nu kha a hei auh zok i ka nu ka va tah, khoika ah dah a kal, asi lo ah eek-inn ah dahra a tlak tthan hi tiah lau ngai khin a hal.
A nu nih cun na pa he aa chawnmi khi pei a si cu a ti. A pa he bia aa ruahmi cu a zoh i lo a kalnak i a rak hmuhmi tlangval dawh tuk kha a si. Thil sining vialte kha a nu nih a chimh tikah siangpahrang fanu cu aa lawm tuk hringhran. Aw Utlak sawhsawh te pei ka rak vaat ka ti, tlangval dawh tuk le mirum taktak pei a si hi a ti i aa lawm tuk hringhran. A va cu midawh le pumrua ttha tuk a si tikah a u le nih an hnahchuah i an nau cu kan hlen lai i ram lakah kan thah lai an ti. Ramlak ah cun an kalpi i an thah. A thilpuan kha upabiknu nih aa hruk i inn ah cun a tlung. Utlak te nih cun a nau a thah kha a theih. Siangpahrangpa sin ahcun ca a hei kuat. Nafa nu nih ka nupi a ka thahpiak. Na thah lo ahcun keimah nih ka thah lai tiah ca a hei kuat. Siangpahrangpa nih cun cu thawngpaang a theih tikah a lung a rawk tuk i a fanu cu a thah hlei ah amah le amah zong aa that ve ti a si.
Leave a Reply