Khuapau dohthlennak chungah Demoso PDF chungtel 39 nunnak a liam cang
=================
Khuapau dohthlennak chungah Demoso tualchung hriamtlai phu PDF in minung 39 nunnak a liam cang tiah theih a si. Karenri ramkulh, Demoso peng tualchung hriamtlai phu DMO-Local PDF le SAC ralkap kar ah kahdohnak voi 156 a chuak i, kaphnih kar kahdoh a chuah hramthok in August thla tiangah tualchung hriamtlai phu chungtel minung 35 nunnak a liam cang tiah theih a si.
Cun September 9 in September 25 tiang ni 16 chungah tualchung hriamtlai phu minung 4 an nunnak a liam ṭhan caah, nunnak liammi dihlak hi 39 an si. Nunnak liammi tualchung hriamtlai phu hna chungkhar nih an tuar i an ngaihchiat bantuk in, kan in tuarpi ve hna, SAC ralkap an hram a cahkhawhnak ding caah nunnak petu mipi ralkap dihlak upatnak kan in pek hna tiah Demoso peng hriamtlai phu DMO – Local PDF nih cathanh an chuah.
Relchap, Gangaw peng ah SAC ralkap nih an khangmi khua 8 ah pengkulh zatlang ukhruainak phu nih sing 80 bawmhnak an pek hna, Magway ramṭhen, Gangaw pengchung ah SAC ralkap nih inn an khangmi khua 8 in ralzaam mipi hna caah tiin,Gangaw pengkulh zatlang ukhruainak phu nih nizaan September 24 chun suimilam 11:00 hrawngah bawmhnak an va pek hna tiah theih a si.
Thaehlaw(ထယ်လှော်) khua, Mauk(မောက်) khua, Mauk Lin(မောက်လင်း) khua, Kyaw(ကျော်) khua, Shwetaung(ရွှေတောင်) khua, Myinza(မြင်းဇာ) khua Lapuh(လာပို့)khua le Yuasi(ရွာစည်) khua in ralzaam hna caah sing 80ks leng kan bawmhchanh tiah Gangaw pengkulh zatlang ukhruainak phu in chim phuannak nawl ngeitu nih a chim.
“Khuachung inn khanghpiak an tonnak kong pehtlaiin anmah he aa pehtlaimi vuanci zungah theihternak kan tuah, kan hmuhmi phaisa in bawmhnak kan pek hi a si. A voikhatnak mei khanghpiak a tongmi khua 4 cu chungkhar pakhat ah 35,000ks cio bawmhchanh an si, bawmchantu dang an um rih caah 10,000ks cio chap ṭhan an si.
Cun a dang khuali cu chungkhar pakhat ah 30,000ks cio bawmhchanh an si” tiah a chim. Cu lengah Chiti cuai 67 le Facang zong bawmhnak pekmi an um tiah a chimchap. A tutiang ah cu ka khua hna in cun ralzaam dirhmun a phanmi dihlak 3,000 tluk hrawng an si i, eidin le umnak thilpuan kongkau ah harnak an tong ngai tiah theih a si.
Ukraine Buainak Cu Palai Ton In Daihnak Kawl Dingah China Nih A Fial Hna!, Russia le Ukraine ramhnih kar i tuknak cu a zual lei a panhnak hnga lo palai i ton in daihnak kawl dingah UN General Assembly biachimnak ah China ramleng minister Wang Yi nih cun a chim.
Ukraine buainak cu hi nak in a zual lei a panhnak hnga lo ramhnih hna nih palai tonnak ngeih i daihnak kawl ding, ramhnih chawlehnak zong tluang tein a kal khawhnak hnga ai pehtlaimi ram paoh nih daihnak kawlpi dingin i zuam cio dingah le Ukraine le Russia ramdaihnak ser khawhnak ding ahcun zeibantuk thil tuahmi poah thazang kan pek tiah, China ramleng minister nih cun a chim chap. UN meeting ah a kaimi China ramleng minister Wang Yi cu Ukraine ramleng minister Dmytro Kuleba he zong a dang tein tonnak an ngei i, mah hi Russia nih Ukraine a tuk hnu ah a voikhatnak bik China le Ukraine tonnak an ngeih a si.
Insein thonginn in ramkhel lei thongtla 250 hmundang ah an ṭhial hna, Yangon, Insein thonginn ah ramkhel leiin thong a tlami minung 250 cu nizaan, September 24 zinglei ah Bago ramṭhen Tharyawaddy thonginn ah an ṭhial hna tiah Yangon economic university siangngakchia(Yuatarkyi hmunram) phu nih nizaan September 24 ah cathanh an chuah. Cu thongtla thialmi hna chungah cun pa 200 le Yangon economic university siangngakchia phu(Yuatarkyi hmunram) in phaisa tlaitu Ma Yin Myat Noe Oo telhin nu 50 hrawng an i tel tiah an langhter.
Ma Yin Myat Noe Oo cu phungrelnak caang poh-mah 505(a) in sual puhnak pahnih caah Insein thonginn biaceih zung nih 2022, March thla ah rianhrang ṭuan le kun 6 thongthlak dingin biakhoahnak an rak tuahpiak. A luancia August 14 ni zong ah khan Insein thonginn in ramkhel lei thongtla minung 105 cu Magway ramṭhen, Tayat thonginn ah a rak ṭhial cang hna.
SAC ralkap nih hramhram uknak an lak hnu ah Insein thonginn in hmundang thonginn ah ramkhel lei thongtla an ṭhial hna hi a voili nak a si cang tiah Yangon economic university siangngakchia phu(Yuatarkyi hmunram) nih an langhtet. 2021, February 1 hnu in SAC ralkap uk dohnak ruangah tlaihkhih a tongmi hi minung 15,607 an si cang tiah AAPP nih September 23 ah cathanh an chuah.
Palik motor le SAC ralkap motor hmaitonh in an i pah caah palik nu telh in palik 2 an thi, Training kai dingin Yamethin ah private motor he a kalmi palik phu motor pakhat cu Mandalay-Lashio lampi ah SAC ralkap motor pakhat he hmaitonh in an i pah caah palik nu pakhat telhin palik 2 an thi tiah theih a si. Nizaan, September 24 ah Shan ramkulh Kyaukme(ကျောက်မဲ) pengkulh palik phu in nu palik Hnin Wat Yee Win le palik uktu Aung Cho Lyin nih zulhmi motor cu Mandalay-Lashio lampi Naungcho peng Bantboikone(ဘန့်ဘွေးကုန်း) khuapawng ah SAC ralkap motor he i pahnak a cang.
“Yamethin palik training school ah an kal, PDF ral an ṭih caah mi sawhsawh bantuk in a thli in an kal, lampi ah SAC ralkap he an i pah caah nu palik Hnin Wat Yee Win le palik Aung Cho Lyin an pahnih in an thi, an motor zong a sop dih” tiah Naungcho palik phu hna he naihniam in a ummi pakhat nih a chim.
Nu palik Hnin Wat Yee Win cu Yamethin palik sianginn ah training kai dingin kal aa timh caah palik bawi Aung Cho Lyin nih motor in a thlah lio ah a tubantuk thil an ton hi a si. Palik Hnin Wat Yee Win cu chungkhar he khuasa mi a si i, a pasal zong palik chungtel a si. Motor i pahnak a can lio ah motor chuugah ngakchia 2 zong an i tel tiah theih a si nain, an nun dam kong ah thil sining fiang tein theih a si rih lo. Crd-The Chin Post
Relachp, (Photo dang) Ngeih A Herh Mi Lungput by Zung Lian Hlawnching, Stanford sianghleirun ah psychologist department i professor asimi Dr. Carol S. Dweck (Ph.D) nih “Nunnak kha fa bantuk ah a cantertu cu lungput hi a si” tiah a ti. Cun “Thaizing ah zeibantuk minung dah kan si te lai ti cu nihin kan lungput ah aa hngatmi a si” tiah Chinmi caṭial thiam Salai Joel Ling (Muko Editor) nih a von nolh tikah lungput hi zeitluk in dah a rak biapit tihi a hong fiang ngaingai. Zeibantuk lungput nih dah ram le miphun a ṭhanchoter timi ruah le siamremh hi a biapi tuk hringhran. Lungput ahhin hmuhning phun tampi in a um kho. Ram le miphun ṭhanchonak ah a herh ko tiah biapi deuh in ka ruahmi tu ka von char.
Lungput ahhin a ṭhami le a chiami tiin an um. Cucu Herod le Jesuh hmanthlak nih a fianter ngai. A chiami Herod lungput nih thah nawnnak tiang a chuahpi. A ṭhami Jesuh lungput nih thihnak chung hmanh khan luatnak a chuahpi. Lungput ṭha nih a ngeihmi sining cu; a ṭuanvo ai hngalh, cu a ṭuanvo cu dinnak le teimaknak le dingrep (discipline) ngei tein midang zawnruahnak le upatnak he a nunnak a hman. Cucaah ram le miphun rian kan domh hlan ah kan lungput hi a ṭhami lungput ah sersiam hmasa a herh.
Covo hi kanmah le sining cio in ngeih dih a si. Covo hi ṭuanvo nih a zulh. Kan ṭuanvo ihngalh le ṭuan tikah kan covo kha co khawh si. Tampi kan ṭuan le tampi kan co lai. Tlawmte kan ṭuan le tlawmte kan co lai. Ṭuanvo nih covo a chuahpi bantukin ṭuanlo nih colo a chuahpi ve. Ṭuan loin hmuh lei lawng toh cu uico lungput a si. Cucaah zeibantuk thil kan tuah hmanh ah ṭuanvo ngeimi le ṭuanvo lak duhnak lungput ngeimi si a herh. Miphun pakhat kan sinak ah siseh rammi pakhat kan sinak ah siseh kan ngeihmi covo kan co khawh nakding ahcun kan ṭuanvo ihngalhnak le ṭuanvo lak duhnak kha kan ngeih awkah a herh taktakmi lungput a si.
Dinnak le teimaknak hi ram le miphun ṭhanchonak ah a herh ngaite. “Miphun a lianngantertu cu dinnak a si” (Phungthlukbia 14:34). Caminpuai ah kan thiamnak tein awn i tim ko usih. Phaisa kan hawlnak ah kan ṭuanmi man te hmuh i tim ko usih. Hruaitu cu hruaitu ah ai tlakmi te nih ṭuan ko hna seh. Kan tuhning le kan sining bantuk tein theipar zuun i tim ko hna usih. Cucu pei cawnnak, ṭuannak le kawlhawlnak ah teirialmi hna nih an teirial man an hmuhmi theipar a si fom cu.
I hleng hlah usih. I titer hlah usih. Sining lo piin i siter cu sau a nguh lo pinah tha zong a di tuk. Ral zong a chiatter. Dinnak tu nih cun ral a ṭhatter. Kan pupa hna hi an dinnak nih an ral a ṭhatter hna. Dinlonak hi chambaunak chung in a chuakmi si. Chambaunak chung in luatnak ding ah kan ṭuanvo le rian ah teimami kan si a herh. “Teimaknak ah hlawhtlinnak a um i, chambaunak kha a phihkhar khawh zungzal.
Cun teimaknak cu zeitik hmanh ah ai sonhtarh (excuse) bal loh” tiah Shobhit sianghleirun cachimtu Michael Sanjev nih a ti. Zeibantuk thil kan tuahmi hmanh ah a teimami si usih. I hne ṭualmal ko usih. Chin miphun hi nihin ahcun kan ṭhangcho tuk e tiah hla tiang in phuah le sak a si i, kan i lunghmuih ngai hna. I lunghmuih ding a si ko. I lawmh ding si ko. Amahbelte a za ti hlah usih. A dongh tiang thiamnak le thil ti khawhnak tiangin teimak chuah ko hna usih.
Dingrep hi mirang nih discipline a timi khi si. Discipline ti cu mah le mah i uk khawhnak, a ṭha timi kha tuah i zuam peng i, a chia timi kha tuah lo i zuam peng tiah Rev. Dr. David Van Bik dictionary ah a um. Cu dingrep cu ram le miphun ṭhanchonak ah a biapi ngaite. Minung kan man tahnak cu dingrep ahhin a si tiah kan mifim hna nih an kan chimh lengmang. Minung hi nu paw chung in kan hong chuah bakte ah cun kan i khat dih nain kan ṭhannak tu ah kan i dang lulh hna.
Cuti kan vai idan lulhmi ah dingrep ṭha tein ai tlaihmi paoh an ṭhangcho. Zei ca’h tiah minung cu zeidang he i khat loin Pathian nih Amah muisam keng in a kan sernak ruangah a si. Ni fatin kan nunnak ah dingrep (discipline) ṭha tein i tlaih usih. Chin miphun pakhat kan sinak nunphung, caholh le thil thuam hna hi man ngeite le limhang ngei tein hman thiam le cawisan i zuam hna usih. Dingrep ngeilo buin kan hman ahcun kan nunphung le caholh lila nih siarem loin an kan tuah. A man kan tlakter. A limhang kan zorter. Kan nunphung le caholh cu Chin miphun sinak mit in cuanh le cawisan a herh.
Jesuh Khrih vawlei a rat hi midang zawnruahnak in ai thawk. Zawnruahnak cu ipeknak a si. Zawnruahnak chungah dawtnak a um. Cu dawtnak nihcun thlachiat ruahnak, toidornak le peknak lungthin a ngei. Cu vialte sining he vawlei ah a ra. Cu lungput nih vawlei kha a khupthal a leh (a thlen). “Pathian sinak kha a ngei ko nain Amah lungtho tein sal sinak tu kha aa lak; Minung bantuk ah a cang i minung mui in a lang; Mi toiah aa dor i nawlngaihnak lam kha thih tiang in a zulh” (Fil.2:6-8). Pathian sinak in sal sinak lungput he minung ah a hong i can (thlen) kha zawnruahnak taktak cu a si. Hihi pupa hna zong nih an rak i ngeihmi lunput a si.
Fei le cantiang in ral an rak doh ngam kha zawnruahnak lungput cu a si. Nunphung le caholh pakhat te sungh zong an rak duh loh. Chinram kutpi tia sungh zong an rak duh loh. Paput langcawihnak lungput an ngei. Chiat an ton ah an i tuarpi i, ṭhat an ton ah an i lawmhpi. Lungthin khat tein khua an sa. Sining ai hrawmmi an si. Hawi he ai rem lo i, a dangte ah a ummi cu hawi lawh lo ah an ruah hna. Hi vialte lungput hi zawnruahnak cu a si.
Mithiang Paul nih II Kor 11:28 chung ah a chimmi cu,“…Khrihfabu zawn ka ruahnak nih hin nifate in a nenh in a ka nenh.” tiah a ti. Zawnruahnak cu mi liang cung thilrit kha mah liang cungah von i khinh a si. American nih Vietnam ral an rak teinak hi hriamnam nakin an ral bawipa biachim le lungput ah a si deuh an ti. A chimmi cu, “nan ral bawipa keimah hi ralram ah cun nan hmai ah ka kal hmasa lai. Teinak kan hmuh i America in teinak pangpar ṭhi he an kan don tik tu ah cun nan hnubik ah kai tlarte lai” a ti.
Cucu zawnruahnak in a chuakmi thazaang le teinak hriamnam cu a si. Kawl caṭial thiam Dr. Maung Maung nih “zawnruahnak tlamtling taktak cu a sangbik fimthiamnak, rumnak le ṭhawnnak he zohkhenh, humhak le kilkawi a si” a ti. Cucaah ram le miphun ṭhanchonak caah a sangbik thil ti khawhnak le thiamnak in toidornak, dawtnak, nawlngaihnak le i thlen (i can) duhnak lungput he zohkhenh, humhak le kilkawi kha zawnruahnak taktak cu a si.
Chinmi caṭial thiam Pastor CP Lian Chawn (JMBC Pastor) nih “Minung kan chaak a mertu cu lungput hi a si” a ti. A ṭhami le a ṭhangchomi lam ah kan lungput mer usih. Hngartu si loin hngarmi sinak dingah ṭuanvo i hngalh le lak duhnak lungput hi a herh ngaite. Ram le miphun humhaknak, nunphung le caholh kilvennak ko ah a biapi khun. Cu bantuk ṭuanvo kan laknak le rian ah dinfelnak le teimaknak lungput a rak biapi taktak. Dinfelnak nih ral a ṭhatter i, lianhngannak a hmuh. Teimaknak hi ram le miphun ṭhanchonak phurtu le chambaunak chungin a chanh chuahtu lungput a si.
Nunphung le caholh kilvennak ah dingrepnak lungput nih man ngei le limhang ngeimi ah a canter. Zeibantuk thil kan tuahmi hmanh ah miphun aiawhtu ka si timi lungput ngeih a herh ngaite. Chin miphun kan herh ngaimi cu lungrualnak le fonhnak hi a si. Cucu zawnruahnak lungput nih fawi zaang tein a tuah khawh. Zawnruahnak cu sal sinak in nawlngaihnak lungput he zultu ṭha sinak lungput, dawtnak, toidornak, ithlennak hi an si. Cucaah ram le miphun ṭhanchonak ah ṭuanvo hngalh le lak duhnak, dinfelnak le teimaknak, dingrep ngeihnak le zawnruahnak hna hi a biapi taktakmi lungput cu an si. CRd-The Lairam Times
Relchap, ( Crd-The Chin Post) Pathein Peng Ah Suiṭhi A Fir Hlei Ah Mi A Thattu Pa Cu Thihdan An Pek, Ayeyawaddy ramṭhen, Pathein peng ah pa pakhat nih pitar nu suiṭhi a firpiak pinah a thah caah Yezatatkyi(ရာဇသတ်ကြီး) section 392/320(1)(c) in biaceih zung nih thihdan an pek, tiah theih a si.
Aung Zaw Ye nih pitar nu Pi Htay Htay cu a luancia 2021 January 15 lioah a inn ah a luhhnawh i a suiṭhi a chuh pinah a thah beh caah biaceih zung nih Aung Zaw Ye cu kum khat le thla 9 a rauh hnuah thihdan an pek hi a si, tiah a chungkhar he aa naihniam mi pakhat nih a chim. SAC nih nawlngeihnak an lak hnu in Pathein khua chungah mi thilri chuh le thah nawnnak voi 3 a chuak cang, tiah tuakchung mi hna nih an chim.
Htilin Peng Kantha Khua Cu SAC Ralkap Nih An Khangh Caah Inn 11 A Ciam, Magway ramṭhen, Htilin peng Kantha(ကံသာ) khua cu SAC ralkap nih an khangh caah inn 11 a ciam, tiah tualchung mi hna sinin theih a si. SAC ralkap cu September 22 zaanlei ah Kantha khua ah rallam an sial i, nizaan September 23 zinglei ah an khangh. Khuami inn zong an bauh hna i, thilri a mansungmi zong an firpiak hna, tiah Yaw PDF ralkap pakhat nih a chim.
SAC ralkap nih Kantha khua an khangh dihin khuami hna cu PDF he pehtlaih lo dingin tlerhnak ca an ṭialhnawh hna, tiah YDF Brigadier Takhin Zaw nih a chim. Htilin peng ah SAC ralkap nih rallam an sial caah tualchung mi hna cu a himnak hmun ah an zam cio hna. Kahdohnak hi zeitik caan paoh ah a chuak khomi a si i, ralring tein um ding in Yaw PDF nih an thanh.
Mindat Peng Ah SAC Ralkap Nih Vanlawng In Bomb An Thlak Caah Ralhrial Mi Hna An Umhmun An I Ṭhial, Chin ramkulh, Mindat pengah SAC ralkap nih September 20 zanlei sml 3:30 hrawngah ralhrial an umnak ah vanlawng in bomb an thlak, tiah CDF Mindat nih cathanh an chuah.
“Mindat peng ah ralhrial an umnak le khuate ah SAC ralkap nih Jet Fighter in timh ciammam tein bomb an thlak. Hliamhma pumi an um lo nain ralhrial mi hna cu an umnak hmun in kadang ah an i ṭhial. Khuate mi hna zong a himnak hmun ah an zam. Khuami hna cu khualtlawn zong an ngamh ti lo,” tiah Mindat khuami pakhat nih a chim. SAC ralkap nih Jet Fighter hmangin Mindat peng Shisadu(ရှိဆာဒူး) khua le Phukhayu(ဖိုးခရိုး) khua karah khualtlawng mi an umkalnak lam ah bomb an thlak ko nain hliamhma pumi an um lo, tiah an langhter.
SAC ralkap nih mizapi an umnak ah vanlawng hmang in bomb an thlakmi le thilman fawi tein an zuarmi duh lo langhternak caah CDF Mindat Comando ralkap nih operation 3 kan tuah, tiah CDF Mindat nih cathanh an rak chuah. Mindat khua hrambunh Khah Lah Yah 274 nih hriamngan an kah caah Mindat peng khuate cheukhat ah hriamngan kuan a tla i, khuami inn le lo tampi a rawk, tiah tualchung mi hna nih an chim.
PDF Kalay Battalion 12 Nih Electric Mei Laknak An Serchuah, PDF Kalay Battalion 12 in mifim thiam hna nih tivate ti an lak i, eletric mei an serchuah, tiah theih a si. PDF Kalay Battalion 12 nih an serchuahmi electric mei tha hi watts 2000 hrawng a si i, an serchuahnak tangka zong tam an dih lo. “Kan herhmi paoh mizapi sinin bawmh kan hal lengmang hna caah an hmai kan khap cawk ti hna lo. Atu bantukin ti hmang in kan sermi hi electric mei hmuh khawhnak caah a si,” tiah PDF Kalay Battalion 12 in ralkap pakhat nih a chim.
Zeiruangah Dah Myanmar Mipi Hna Hi Ukraine Bantukin Nan Bawmh Ve Lo: East Timor President, Tuni, September 23 ah tuahmi UN Meeting ah East Timor President Mr. José Ramos-Horta nih Myanmar mipi bawmhnak kongah fak ngai in bia a chim. President Mr. José Ramos-Horta nih cun “Myanmar mipi hna nih khin ramkip nih an kan hlawt, hnu an kan chit cang tiah an i ruah. Ramkip nih Ukraine cu hriamnam ṭhaṭha le mipi caah minung hawi zawnruah bawmhnak tampi nan pek hna. Myanmar mipi hna nih zeiruangah ah dah Myanmar ah a cang cuahmah mi raldohnak cu a thei lo bantukin nan um ko tiah biahalnak an in tuah hna.
Asinain Myanmar mipi hna cu nifatin ral an doh ko rih. A thimi zong an tam chin lengmang” tiah UN Meṭing ah cun a chim. Cu lawng si loin Myanmar ramchung buainak hi a fak chin lengmang kho i kiangkap ram hna daihnak zong a hnorsuan khawh tiah President Mr. José Ramos-Horta nih cun a chimchap.
President Mr. José Ramos-Horta hi Daw Aung San Suh Kyi bantukin Noble Peace Prize a hmutu a si ve. Tutan a voi 77 nak UN Meeting ah Russia nih Ukraine a tukmi cu ram tampi nih an mawhchiat i an soisel. East Timor cu UN meeting ah Myanmar mipi hna zawnruat in bia a chimtu ram a si.
UN palai hlun hna nih dirhmi Special Advisory Council for Myanmar (SAC-M) zong nih zeiruangah dah Ukraine bantukin Myanmar hi nan bawmh ve lo tiah an rak aupi cang. Tutan UN meeting a kaimi hna nih UN le ASEAN nih Myanmar buainak hi hmualngei tein tuahremh cang u tiah an chim.
Leave a Reply