A Poi Tuk E, SAC Ralhrang Nih CDF Bomtu An Tlaih Tthan Hna E!!

Nizaan zaan suimilam 10:30 hrawngah Sagaing ramthen, Tamu chung ag Gate a hngak mi SAC ralhrang hna nih CDF he pehtlainak nan ngei CDF bomtu na si tiah an ti ii Daw Cin Nu ii a inn ah an lauhhnawh ii hlethlainak an tuah tikah Daw Cin Nu, a fa nu a si mi Pann Wa le Than Lam Pann hna cu an pathum in an inn cia ah luhhnawh in MG-1 kutpuah bomb lung 9 le hrimnam dangdang he an tlaih hna tiah thawngtheih a si.

SAC nih nawlngeihnak an laak hnu February 2021 in March 2022 tiang ah minung 3165 cu thah an si i, peng 86 ah inn 19,635 khangh an si cang, tiah Media Monitor Collective nih cathanh a chuah. SAC ralkap nih ramkulh le ramṭhen chung um peng 86 in khua 400 leng ah cun meikhanghnak an tuah i, Sagaing ramṭhen ah inn 12,687, Magwe ramṭhen ah inn 4304, Chin ramkulh ah inn 1376, Kayah ramkulh ah inn 360, Shan ramkulh thlanglei ah inn 329, Kayin ramkulh ah inn 166, Shan ramkulh chaklei ah inn 137, Mandalay ramṭhen chung ah inn 118, Kachin ramkulh ah inn 58, Tanintaryi ramṭhen ah inn 37, Mon ramkulh ah inn 30, Bago ramṭhen nitlaklei ah inn 26, Yangon ramṭhen ah inn 4, Bago nichuahlei ah inn 3 hna cu an ciam dih, tiah theih a si.

SAC ralkap nih khua an hrawh ruangah minung 1,21,0846 cu inn le lo kaltak in a himnak hmun ah an zaam. SAC ralkap nih khuate hna cu an duh poh in an kah tawn caah minung 1112 hliam an tuar tiah an langhter fawn. Khuate lei zong ah sualnak ngei lo minung 16,251 an tlaih hna i , minung 1353 cu ralkham ah an hman hna, tiah Media Monitor Collection nih cathanh a chuah ning in theih a si.

Myanmar ram pumpi huap in June 5 nikhat chung kahdohnak ah SAC ralkap 88 an thi i, PDF 1 a nunnak a liam ve tiah Khit Thit Media nih a thanh. Khit Thit Media nih cazin a khawmhsuat ning ah SAC ralkap a thi mi hna cu, Magwe ramṭhen, GanGaw ah 8, Paohah 1, Sagaing ramṭhen, Sagaing – Monyua ah 5, PhaungPin ah 30, Kani ah 15, Kayah ramkulh, Demoso ah 6, Kayah ramkulh Pruso ah 1, Kayin ramkulh Battalion 5 ah 2 tiin an dihlak 88 an thi i Sagaing ramṭhen ChaungOo ah PDF 1 a nunnak a liam ve.

Kani Peng Kahdohnak Ah SAC Ralkap 5 An Thi: Sagaing ramṭhen, Kani peng Tapyitaw(သပြေတော) le Ungpinsaih(အုန်းပင်ဆိပ်) khua kar ah SAC ralkap cu, June 5 ah bomb kan puahhnawh hna. Taung khua luh lai ah kan i kap ṭhan i SAC ralkap 5 an thi, tiah CGDF nih cathanh an chuah. SAC ralkap pawl cu tilawng 8 in an kal i, Chindwin tiva an hrawng. Aitaung(အိုင်တောင်) ah an i din i, tlang lam in an kal ṭhan, tiah theih a si. Taung khua luh lai kahdohnak cu sml cheu hrawng a rau i, SAC ralkap 5 hrawng an thi. PDF lei in 3 hliamhma an pu, tiah an langhter. Cu kahdohnak ah cun CGDF, ALPHA Special Force LE ṭangṭi phu hna an i bawm, tiah theih a si. SAC ralkap pawl nih, Ungpinsaih khua an khangh i, PDF nih an phalh manh caah in 10 lawng a kaang, tiah theih a si.

Nigeria ram Catholic Khrihfa Biakinn pakhat cu June 5 ah misual pawl nih meithal in an kah caah a chung um minung 50 nunnak a liam, tiah Marca le media dangdang nih an thanh. Ondo ramkulh um, Saint. Francis Catholic Khrihfa Biakinn ah Pentecost puai an tuah i, cu lio ah cun misual phu nih an kah hna, tiah theih a si. A thimi hna chung in ngakchia tam ngai zong an i tel tiah media nih an langhter. Nawlngeitu hna nih a thi mi cazin an langhter lo nain minung 50 leng an si lai, tiah Nigeria House of Representatives, Adelegbe Timileyin nih a chim.

Catholic Khrihfa Biakinn a kaptu hna hnulei ah mizei dah an um ti cu hngalh a si rih lo. Ondo ramkulh cu lo rianṭuan mi hna le caw zuatu hna karah buaibainak a tam ngai, tiah theih a si. Hi kong he pehtlai in vawleicung Catholic khrihfabu nawlngeitu sang bik Pope francis zong nih Nigeria Catholic Biakinn i a cangmi kong ah a ngaihchiatnak bia a chim i, nunnak a liam mi hna le an chungkhar ca ah thla a campiak hna kong a chim.

Kaya(Karenni) ramkulh, Demoso peng Myoma sang Fimcawnnak (Education) zung kam ah motor in humhimnak a latu SAC ralkap le Demoso PDF(DMO-Local PDF) camp 3 in C,D,E Battalion, Companny cheukhat le 1102 Battalion cu June 5 ah an i kap, tiah theih a si. Chun hnu sml 1 in 2 tiang kan i kap i SAC ralkap 6 an thi, kanmah lei in a thimi kan um lo, tiah DMO-Local PDF nih cathanh an chuah. Kahdohnak a daih in SAC ralkap nih hriamngan voi tam tuk an kah caah mizapi inn cheukhat an rawk, tiah theih a si.

Cu bantuk ṭhiam in Sagaing-Monywa(စစ်ကိုင်း – မုံရွာ) lam, Sagaing peng Chaikyi(ချိုင်ကြီး) khua pawng ah June 5 zing sml 8:00 hrawng ah kan phummi bomb an fimhlawm dih in hman an thlak cuahmah lioah bomb a puak i, SAC ralkap 5 an thi, tiah Sagaing Guerrilla phu nih cathanh an chuah.

Post Views: 33

A Poi Tuk E, SAC Ralhrang Nih CDF Bomtu An Tlaih Tthan Hna E!!

Be the first to comment

Leave a Reply Cancel reply