Nigeria ram chak lei ah a um mi, Khirihfa biakinn pakhat ah a herhmi a ngeitu pawl bomh dingah timhlamhnak ngeihin tuah mi ceihhmainak chungah mibuu pinih dohnak a chuak caah fapawi nu tel in minung 31 an nunnak a liam i minung pa 7 nih hliam an tuar tiah theih a si. Rivers State ah a um mi King Assembly Biakinn ah a herhmi angeitu pawl caah ceihhmainak an tuahnak ah cun mi tampi an itel kho hna tiah theih a si. Mah biakinn ah cun man lo tein thilcawh khawh nak caah tiin Kum fatin te ceihhmainak an tuah peng nak a si tiah theih asi.
Africa nih chawhlehnak thatytha company tampi a ngei ko nain, Nigeria ram cu minung 80 million hrawng sifak in an umnak ram a si i, Mah ceihhmainak an tuah mi cu Nigeria ram ah Sifak pawl nih man lo tein thilcawk khawhnak ding caah kum fatin te an tuah peng mi a si tiah theih a si. May thla ni 28 ah tuah mi,
Ceihhmainak cu zinglei suimilam 9:00 hranwgin thawh dingah timhlamhnak an ngei ko nain mi tampi hna cu zingkaa suimilam 5:00 hrawng in an rak ithawk cang hna ii, tawk an hrenh mi kutkaa cu an boh i mibuu piin an rak lut hna tiah theih a si. Mibuu nih an doh ruangah a thi mi hna laak ah hngakchia hna zong tampi an i tel i minung pa 7 nih hliam an tuar tiah theih a si.
Mibuu pinih doh a ton hnuah a nunnak a liam mi chungkhar pawl nih biakinn leiin tuanvo ngeitu hna cu an doh nak hna kong cu mithmuh tette pawl nih an chim ko nain Biakinn lei in zeihmanh chim phuan mi a um lo tiah theih a si. A tu bantukin Nigeria ram ah mibuu nih doh a ton hi a tu lawng si loin kum 2013 lio zong ah a rak bal cang ii minung 23 an nunnak a liam tiah theih a si.
India ram, Mizoram University ah tukum August thla thok in Burmese subject cawnnak an ngei lai i Hi Burmese subject cawnnak cu Diploma level in cawn a si lai tiah theih asi. Mizoram University ah Burmese subject cachimtu ding zong ah Institute of Chin Affairs (ICA) nih rian a auh, ICA rian ngeitu pakhat nihcun ”Mizoram University nih an University ah Office zong an kan pek, Anmah nih an University ah Burmese ca cawnpiak ding in an kan nawl, An University ah Diploma in Burmese Subject cawnnak ngeih kha an duh caah asi, Diploma in Burmese subject cawnnak cu kumkhat a si lai”, tiah a chim. Cachimtu zong Institute of Chin Affairs (ICA) nih thlahlawh pekding asi lai tiah theih asi i ICA zong nih Mizoram University ah Burmese subject chimtu ding minung auhnak an tuah.
CRPH, NUG, PDF hna he nan i pehtlai ti in SAC ralkap nih inn hrenhpiak mi inn 600 hrawng a si cang tiah theih a si. 2021 February 1 in 2022 May 20 tiang SAC ralkap uknak dohdal ruang ah inn 586 kharpiak an si tiah ISP – Myanmar nih cathanh a chuah.Inn hrenhpiak a tong mi hna chungah a tambik cu mizapi inn hna an si i inn 373 nak tam an si i 63.7 % a si. Hluttaw Palai hna ngeihmi inn 147 nak tam hrenhpiak an tong i 25% hrawng a si.
NLD party chungtel hna le party ngeihmi inn 66 nak tam an hrenhpiak hna i 11.3% a si tiah ISP- Myanmar nih a langhter. Inn hrenh piak nak a tambik nak hmun cu Sagaing ramtthen a si i inn 159 nak tam a si , Yangon ramthen ah 122, Mandalay ramthen ah 88, Magwe ramthen ah 48, Irrawaddy ramthen ah 47 nak tam hernhpiak an tong.
A ra laimi 2022 June thla chungah SAC nih, Chin ram chung ah sianginn on ding in timhtuahnak a ngeih mi hi, vawlei pi theih in kan ram a him cang, a dai cang, a hlan kel ning tein rian kan ṭuan cang, tiah langhter a duh caah a si. Cucaah SAC kuttang sianginn ah nu le pa nih nan fale nan kai ter hrimhrim hna lai lo, Chinland mizapi uknak tang lawng ah sianginn nan kai ter hna lai, tiah Chinland Joint Defense Committee(CJDC) nih cathanh a chuah.
SAC kuttang sianginn cachimtu Non-CDMers hna zong CJDC nih dantatnak kan tuah hna lai, tiah an langhter. Matupi Education Board zong nih, Matupi peng ah SAC kuttang sianginn kai lo ding le Matupi mizapi uknak tang lawng ah sianginn kai ding cathanh a rak chuah cang. Cu bantuk in Mindat mizapi uknak phu zong nih an rak thanh.
Leave a Reply