A Poi Tuk E; Mithahnak A Chuak Dozens In An Nunnak A Liam!!

Sagiang Pengkulh Chunglawngah Mi Thahnak Ni20 Chungah Voi 8 A Chuak I Minung 16 An Nunnak A Liam Pinah Minung Pa 2 Nih Hliam An Tuar
===============================
Sagaing ramthen chungah Sagaing khuapi le Minmuu khuapi pengkulh chung le khuate hna ah June ni 5 ni in ni 20 chungah mi thahnak voi 8 a chuak ii a thi mi hi 2 Dozens deng an sinak kong cu mi bomtu phu sinin theih a si. Sagaing hmunhma ah thah a tongmi mi ruak pa 4 in voihnih, ruak pa 3 in voikhat, Minmuu hmunhma ah miruak pa 2 in voikhat, ruak pa 1 in voihnih hmuh an si.” tiah tuanvo ngeitu chimphuan nak in theih a si.

Cupin ah Sagaing khuapi mibomchantu phu nih a tu thla ni 5, Sagaing pengkulh PaanChi khuate ah hngakchia pa 2 telin an chungkhar ningin thah an ton caah minung pa 4 an nunnak a liam ii minung pa 2 nih hliam an tuar tiin an chim. Mah hnu June ni 15 Sagiang pengkulh, Paduu khuate dawr pakhat ah thil a zuar mi nuva hna pa 2 le thil cawtu minung pa 2 thah an tong tiah theih a si.

June thla ni 16 Sagiang pengkulh, Kywe Lu khuate lettama pa 2 hna cu lettama thilri cawknak ah an kal lio ah thah an tong tiah theih a si. June thla ni 18, Sagaing ramthen, Khinkha khuate pawl lodum ah loriantuantu minung pa 3 thah an tong tiah theih asi. Sagaing pengkomh, Minmuu pengkulh khuate hna ah pehzulhin mi thahnak a chuak tiah theih a si.

Tu thla ni 23, Minmuu khuapi, AungZayya sangah a um mi U Kyaw Naing zong thah a tong tiah theih a si. JUne thla ni 15, Minmuu pengkulh thiamthiam a si mi Alakappa khuate pawng lodum ah loriantuantu muva pa 2 thah an tong tiah theih a si. June thla ni 5 in tuni ni 20 chungah Sagaing pengkomh chungah mithahnak voi 8 a chuak i minung 16 an nunnak a liam ii minung pa 2 hliam an tuar tiah theih a si.

Chin ramkulh, Paletwa peng, Youkchaungwa khuapawng, June 27 ah Myanmar ralkap le Arakan Army (AA) karlak ah kahdohnak chuah loin SAC ralkap anmah le anmah kha AA ralkap ruat sual in zinglei sml 11:00am hrawng ah an i kah caah a thimi an um tiah AA biachimnak nawl a ngeitu Khine Thukha nih Western News ah a chim.

“Kahdohnak a chuak lo. Kanmah he kahdohnak a chuakmi a si lo. SAC ralkap nih anmah le anmah an i kah sualmi a si. Anmah le anmah ṭihnak in an khah ruangah mi palh sual in an i kapmi a si. A thimi zong an um tiah kan theih”. SAC ralkap anmah le anmah an i kah sual ruangah khatlei le khatlei hriamngan in sml cheu hrawng an i kap tiah AA biachimnak nawl a ngeitu Khine Thukha nih a peh. Paletwa peng, Youkchaungwa khua pawnghrawng ah SAC ralkap nih hmunhma an khuar i anmah le anmah an i kap sualmi a si ko lai tiah Abaungtha khua i himnak hmun ah a ummi khuami pakhat nih Western News ah a chim.

“A hramthok cun meithal in an i kap. Cun, hriamngan nih a zulh. Caan sau ngai an i kap. SAC le AA karlak kahdohnak ah kan ruah. A si lo. SAC ralkap anmah le anmah an i kapmi a si” tiah a chim. A luancia May 26 ah Abaungtha khuapawng ah SAC le AA karlak ah sml 2 chung hrawng kahdohnak a rak chuak i Abaungtha khuabawi le innhra ukbawi cu SAC ralkap nih an rak tlaih hna.

Cun, May 30 zinglei sml 10 hrawngah Abaungtha khuami zapi ngawt in Supauk tlang ah an tlaih/velh hna hnu ah khuami cheukhat an thlah ṭhan i khuami a cheu hrawng cu SAC nih LIB 289 ah an rak hren hna. A rak luat ṭhanmi khuami hna cu SAC ralkap nih khuachung ah hmunhma an khuar ruangah khuachung um ngam ti loin an zaam tiah theih a si.

Myanmar ram pumpi in mipi himnak phu cu June thla dongh ah dirh dih ding tiah Ministry of Home Affairs nih nawl a pek hna. “Tu thla dongh ah Myanmar ram pumpi in himnak lakpiaktu phu timcia tein um ding in nawlpek a si. A um hrimhrim a herhmi phu a si” tiah pengkomh council chungtel pakhat nih Khit Thit ah a chim. Min Aung Hliang nih 2022 March 3 ah tuahmi SAC meeting ah YMBA, mipi ralkap, palik, ralkap hlun, red cross, meithat phu telh in SAC a cohlangmi vialte aa telmi mipi himnak phu dirh ding in a chimh hna.

Yangon peng, sangkip ah mipi himnak phu cu June 23 le June 25 karlak ah dirh dih ding le SAC nih riankinhmi khuabawi thok in sangkip upa vialte le ralkap hlun pawl chungtel si dih ding in peng palik bawi nih nawl a chuah. “An duhnak cu sang chungah thil pakhat khat a can a si ahcun, mah phu kha hmai ah an chuak lai. Peng palik bawi zong nih June 25 ah a rannak in dirh dih ding in khuabawi sin ah cazin a hal.

Phu tam ngai dirh a si cang. A rannak in an ti caah a si khawhnak in kan dirh. Training zong pek a si lai” tiah chungtel a simi pakhat nih Khit Thit ah a chim. SAC nih ram pumpi in mipi ralkap a dirh ko nain hma a kal lo caah atu bantuk in mipi himnak phu min in phu a dirh ṭhan hi a si tiah theih a si.

Mipi umnak khaan pakhat hriamngan nih a khen tiah Kyiv khuabawi Vitali Klitschko nih a chim. G7 tiah theihmi vawlei cung ram rumbik 7 Germany ram ah tonnak an ngeih ni ah atu bantuk in a tuk hi a si. Tonnak ah Russia raltuknak kong a biapi in ceih a si. Ukraine President Volodymyr Zelenskyy cu tonnak ah June 27 ah ka kai ve lai tiah June 25 ah a rak chim.

Ni chuahlei Ukraine Sievierodonetsk khua in Ukraine ralkap pawl hnu an kir i nikhat a rauh hnu ah Russia nih Ukraine khualipi a rak kah hi a si. Sievierodonetsk a pawng Lysychansk khua zong Russia nih a lak cang tiah Ukraine nih a chim. Luhansk hmunhma a himnak ding ahcun Russia he kan hriam aa tlukruan a hau tiah Ukraine General Valeriy Zaluzhniy nih American hriamtlai phu pawl a hruaitu General Mark Milley cu June 25 ah phone a chawnh.

Ukraine hmunhma kip kha Russia nih hriamngan in a kah i Belarus ram lei in a raami a si tiah thawng a chuak. Russia President Vladimir Putin le Belarus President Aleksandr Lukashenko cu Saint Peterburg khua ah tonnak an ngeih hlan deuh ah atu bantuk in a kah hi a si.

Post Views: 61

A Poi Tuk E; Mithahnak A Chuak Dozens In An Nunnak A Liam!!

Be the first to comment

Leave a Reply Cancel reply