Russia Thilphor Vanlawng IL76TD Cu Naypyidaw Ah A Ṭum!
=============================
July 25, ah Russia vanlawng, IL76TD thilphor vanlawng cu Naypyidaw ah a ṭum i July 26 ah a chuak ṭhan tiah theih a si. Nihin July 27 ah Russia thilphor vanlawng IL76TD cu a phan ṭhan i thaizing July 28 ah a kir ṭhan lai. Cun, July 29 ah cu vanlawng cu a ra ṭhan lai i July 31 ah a kir ṭhan lai, tiah theih a si. Naypyidaw ah ṭum mi Russia vanlawng pawl nihhin Ralkap hriamthil an phorh lai, tiah zumh a si.
“SAC ralkap nih vanlawng le helicopter an hman tuk caah vanlawng datsii i zat lonak le kuan, hriamthil i zat lonak a phan. Russia le Ukraine an i kah hnu in ah ramkip chawlehthalnak a tlak tuk caah Russia zong Dollar an herh tuk cang i, Dollar rak laak ding in Naypyidaw tiang an rak phan. Cu bantuk buainak ruangah cun SAC nih hriamthil an ngeih khawhnak ding ah dollar an tlaihnak hi a si,” tiah Operation Spitfire nih an thanh.
SAC Ralkap Serchuahmi Dagon Beers Cu Zomi PDF le KPS Nih An Tlaih!: Zomi-PDF le Kalay-KPS phufonh nih SAC ralkap serchuahmi Dagon beers cu kan tlaih, tiah Zomi PDF nih cathanh an chuah. PDF nih Hmunram kilveng in checkhlatnak an tuah lio ah, SAC ralkap serchuahmi Dagon beers le thilri dangdang a phortu motor pakhat cu July 26 ah kan tlaih, tiah an cathanh chuahmi ah an langhter.
Cu thil a phortu motor le a khaltu cu thlah an si nain, SAC ralkap thilchuah hna cu kan tlaihnak hmun ah kan hrawh dih, tiah Zomi PDF nih an langhter. “Atu tan ah cun motor le a khaltu cu thlah an si nain, hmailei ah SAC ralkap thilchuah a phortu poh cu SAC ralkap tuahser ning bantuk in lehrulh an si lai,” tiah an langhter chih.
Kalaymyo he a pehtlaihnak Laitlang lei khuakip ah SAC ralkap thilchuah Myanmar beer, Dagon beer le Red ruby hna cu tualchung hriamtlai phu nih phihkhamnak an tuah, tiah theih a si. SAC ralkap uknak a dohtu mizapi nih SAC ralkap thilchuahmi pohpoh cu hman lo ding in le tualchung hriamtlai phu hna zong nih SAC ralkap thilchuah vialte cu hman lo ding in phihkhamnak an tuah, theih a si.
India Ram Bihar Ramkulh Ah Țek A Tlak Ruang Ah Nikhat Chung Lawng Ah Minung 20 An Thi, India ram nichuahlei, Bihar ramkulh chung pengkomh 8 ah țek tlak ruang ah nikhat chung lawng ah minung 20 an thi tiah theih a si. July 27 le 28 ah Bihar ramkulh chaklei kap zong ah thlichia le ruah a fak kho mi a si tiah khuacaan lei zohthaim hna nih an ruahdamh.
Tualchung mi hna nih ramkulh pawngkam zohkhenhnak lei rian ngeitu nih zulhphung an sermi zulh cio ding in State Chief Minister Nishikuma nih forhfialnak a chim. A thi mi chungkhar hna caah Lu man rupees 40000 cio pek an si tiah chief minister nih July 26 ah a chim. India ram ah thlichia hran i ruah a sur lio caan i țek a tlak nih tlak ruang ah kum tin minung a za leng in an thi tawn tiah theih a si. Țek tlaknak ruang ah a thi mi an tamnak a ruang pakhat cu ramdang nak in buliding leng ah rian a țuan mi an tam deuh caah a si tiah thiamsang hna nih an chim.
Misual Phu Khat Nih Ko Jimmy le Ko Pyyo Zeya Thaw Inn Lung In An Cheh, SAC ralkap nih an thahmi Ko Phyo Zeya Thaw le Ko Jimmy hna an inn hmai ah Light Truck mawtaw in minung a phu in an rak phan i biachia holhchia he au khuan buin an inn hna cu lung in an cheh hna. Yangon khuapi Kyauk Tahta ( ေကျာက်တံတား) peng Bo Aung Kyaw lampi cung um Ko Phyo Zeya Thaw i a inn cu misual phu pakhat nih Nihin July 27 chun ah lung in an rak cheh tiah tualchung mi hna sin in theih a si.
” Light Truck mawtaw pakhat in minung 20 hrawng an rak phan i Ko Phyo Zeya Thaw te inn cu lung in an cheh. Biachia phunkip an chimmi hna kan theih. Inn tang ah a dir mawtaw hna zong lung nih an kan khen sual lai tiah a kal dih ” tiah tualchung mi pakhat nih a chim. Ko Jimmy te an inn hmai zong ah Light Truck mawtaw 5, Daina mawtaw 2 in thingtam , hriamnam tling he misual phu pakhat nih lung an rak cheh ve tiah theih a si.
Hi misual phu hna cu khoikaa in an rak chuah ti kan thei lo nain SAC ralkap hna an kuttang rianțuan tu pawl an si lai tiah vengchung mi pakhat nih a chim. ” Palik le SAC ralkap zong nih an rak tlai hna lo. A tu bantuk in an um ngam nak le an tuah ngam nak cu SAC ralkap nih tangka 5000 pek mi fual mi pawl a si lai ” tiah a chim. SAC ralkap Telegram Channel ah an thlah colh tiah theih a si.
KNU Brigade 5 Ah SAC Ralkap Pyi Phyo Aung Cu Hriamnam He A Lut, KNU Brigade 5 hmunram Hpapon(ဖာပွန်) pengkomh chung ah a ummi SAC ralkap Kha La Ya 405 in ralkap Pyi Phyo Aung cu, July 9 zinglei ah KNLA sinah hriamnam he a zam, tiah theih a si.
Pyi Phyo Aung cu Khu Tu Htar, May Way( ခူသူးထာ၊ မယ်ဝေ) hmun ah a ummi SAC ralkap riahcaw a phortu a si i, meithal MA3 zunkhat le a kuan 70 he KNLA sinah a lut, tiah MuTaw thawngpang nih a langhter. Kha Ma Ya 405 cu Tanintharyi ramṭhen, Tayatchaung khua ah umhmun khuar mi an si i HtarWay(ထားဝယ်) Battalion 1 kuttang an si.
India Ram Ah Zu Chia An I Din Sual Caah Minung 28 An Thi, India ram nitlaklei ah Chemical in sermi zu an din ruang ah minung 28 an thi i minung 60 leng cu fahtuar in an um tiah țuanvo ngeitu hna nih July 26 ah an chim. Hi bantuk in thihnak cu Gujarat ramkulh Ahmedabad le Botad khuapi hna ah a cangmi a si i cu ramkulh ah zu chuan le zuar an khap nak hmun a si.
Tu bantuk in thil a cangmi ah hin zu an serchuah nak ah hin zei bantuk chemical thilri a hman ti cu fiang in kan thei kho rih lo tiah nawlngeitu Mukesh Parmar nih a chim. Gujarat ramkulh, Palik bawi Ashish Gupta nih a tu bantuk in thli tein zu an zuarnak kong he pehtlai in lunghrinh mi hna cu kan tlaih hna i kan hren ko hna tiah a chim.
Phungning lo in zu chuanmi an din ruangah an thih nak cu India ram ah a cang bik mi man fawi tein a tha a pin nak caah zu chung in rungrul thahnak sii hna le Chemical thilri hna an cawh tiah theih a si. Phungning lo in zu a zuar mi hna zong ngunkhuai pek lo in sifak mi hna cu zu manfawi tein an zuarh hna i cu bantuk in phungning lo in zu a chuangmi le a zuarmi hna cu India ramchung ah tangka tampi a chuahpi kho tu sehzung riantuan nak a si tiah theih a si. 2020 kum ah India ram chaklei Punjab ramkulh ah a thianghliam lo mi zu an din ruang ah minung 120 leng an thi bal cang .
Leave a Reply