A Poi Tuk E; American Ramah Mibupi Laak Ah Meithal Kahnak A Chuak!

291234650_1702455476795591_8309927039616747795_n

American ram, Chicago khuapi Ah Meithal Kahnak A Chuak Thimi Le Hliam Tuarmi An um
===========================
American ram, Chicago khuapi, June ni 4 ah tuah mi zalonnak ni ah mibuu pawl cu methal tlai pakhat nih a kah nak ruangah minung pa 6 nak tlawmlo an nunnak a liam ii minung 30 leng nih hliam an tuarnak kong cu Police phu nih an chim. Mah kahdohnak ruangah hngakchia telin mi tampi cu tihphan ruangah an tli zaam hna tiah Police nih an chim.

Suimilam tem caan sau a ruah an kawl hnu ah meithal tlaitu kum 22 a si mi pa pakhat cu Police nih an tlaih khawh tiah theih a si. Sianginn cacawnnak, Biakinn le mibuu in umnak le dawr hna ah Ameriacan ram ah cun ni fatin tiawk in a chuak peng tiah theih a si ii a tu Chicago khuapi ah a chuak mi meithal kahnak hi hi a donghnak bik a chuah a si tiah theih a si.

Myaing Peng Ah Rallam A Sialtu SAC Ralkap Kah An Si I, 3 An Thi!: Nihin July 5 ah Myaing peng chaklei khua hna ah rallam a sialtu SAC ralkap hna cu tualchung PDF nih an kah hna caah SAC ralkap 3 an thi, tiah Myaing Villages Revolution Front (MVRF) nih an thanh. MVRF in rianngeitu pakhat nih cun, “Tayatkaan(သရက်ကန်) camp in Myaing peng chaklei khua hna ah rallam a sialtu SAC ralkap 60 he kan i kap i, SAC ralkap 3 tluk an thi. Zinglei Sml 7:40 in Sml 9 hrawng tiang kan i kap. kanmah lei hliam tuar um lo tein hnu kan tolh kho,” tiah a chim.

Kahdohnak Ah NuaHṭugyi Um SAC Ralkap 3 An Thi I, 9 Hliam An Tuar: Mandalay ramṭhen NuaHṭugyi(နွားထိုးကြီး) khuachung ah umhmun khuarmi SAC ralkap cu July 4 zaan suimilam 7 hrawng ah NuaHṭugyi PDF nih an kah hna i, cu kahdohnak ah cun SAC ralkap 3 an thih lengah midang 9 hliam an tuar, tiah NuaHṭugyi(နွားထိုးကြီး) PDF nih an thanh.

Wetlet Pengchung Kahdohnak Ah SAC Ralkap 40 An Thi I, PDF in Ralkap 11 Nunnak A Liam!: Sagaing ramṭhen Wetlet pengchung kahdohnak ah tualchung hriamtlai phu PDF in ralkap 11 an nunnak a liam i, SAC ralkap lei in minung 40 hrawng an thi, tiah Shweboo pengkomh battalion 15, Tiger King pah-kah-phah phu nih nihin July 5 ah cathanh an chuah. SAC ralkap hna cu minung thazaang 150 hrawng he Wetlet peng WetLayYuai(ဝက်လည်ရွဲ) khua ah July 2 ah rallam an sial i PDF battalion 15, ṭat-khuai 1 nih bomb puahhnawh in an doh hna caah SAC ralbawi pakhat le ralkap dang pakhat an thi i, 3 nih hliam an tuar, tiah an langhter.

SAC ralkap nih hriamnam thazaang faak ngai in an hman caah le hriamnam thazaang an i thlau tuk caah, tualchung hriamtlai phu lei cu hnu an tolh, tiah theih a si. July 3, zinglei suimilam 6:00 hrawng ah Minyua(မင်းရွာ) khua zaanriak in umhmun a khuarmi SAC ralkap hna nih khuachung mipi umnak innlo cu a voi hnihnak an khangh ṭhan caah Tiger King battalion 15 le tualchung hriamtlai phu 15 fonh nih zinglei suimilam 8:30 in chun suimilam 12:00 tiang an kah hna.

“Battalion 15, tualchung hriamtlai phufonh le SAC ralkap kahdohnak ah tualchung hriamtlai phufonh lei in nunnak liammi zong an um. Minyua khuami minung 5 telh in khuami cheukhat zong thah an tong,” tiah GZ Special Task Force-Wetlet in Ko Ye Khae nih a chim.

Nunnak a liammi PDF chungtel 11 hna cu PaDaukChung(ပိတောက်ခြုံ) pah-kah-phah, Magway phu, GwayPinKung(ဂွေးပင်ကုန်း) phu, HliatSi(လျှပ်စီး) pah-kah-phah phu le YuaTitKung(ရွာသစ်ကုန်း) LDF chungtel hna an si. Minyua khuami 5 telh in khuami cheukhat zong thah an ton caah mipi lei in nunnak a liammi 20 hrawng an si, tiah theih a si. Nihnih chung kahdohnak ah SAC ralkap lei in minung 40 hrawng an thi, tiah Tiger King battalion 15 nih cun an langhter.

Magwe Ramṭhen Ah Sehzung Rianṭuantu Hna Thlahlawh Ks. Sing 2500 le A Photu Motor Misual Nih An Fir! Magwe ramṭhen, Pakokko peng PanṬaiChung(ပန်းတိုင်းခြုံ) khua pawng ah ummi PanṬaiChung(ပန်းတိုင်းခြုံ) thilṭhitnak sehzung rianṭuantu hna thlahlawh a phortu motor cu nihin July 5, zinglei suimilam 11:00 hrawng ah, lampi ah misual he an i tong i, phaisa Kyats sing 2500 chuh an tong, tiah Pakokko khuami nih an chim.

“Kan theih ning ah cun zinglei suimilam 11:00 hrawng ah PawngLawngKan(ပေါင်းလောင်ကန်) khua pawng ah hriam a tlai mi minung 7 nih phaisa phortu motor cu an kham i, bia an hal hna hnu ah, motor chung ummi dihlak minung 7 cu an ṭumter hna i phaisa le motor cu an i kalpi,” tiah Pakokko peng palik he naihniam in a ummi pakhat nih a chim. Nizaan July 4 zong ah Pakokko khuachung um Shan Ekari(ရှမ်းဧကရီ) sui zuarnak dawr cu misual nih an luhhnawh, tiah theih a si.

Uknak Laak Hnu In NLD Party Zung Pawl Cu Voi 100 Leng Doh An Tong!: SAC nih uknak an laak hnu in ram pumpi ah ummi NLD zung pawl cu July 1 tiang ah voi 106 tiang doh le hrawhpiak an tong, tiah NLD party nih July 5 ah an thanh. Party zung pawl an doh le an hrawh mi lakah sang, khua, peng, ramkulh le ramthen zung lengah central zung zong aa tel, tiah NLD lei nih an langhter.

“NLD zung hrawh mi hna lakah Sagaing ramṭhen cu a tam bik a si. Yangon, Sagaing, Tanintharyi, Pago, Mandalay, Magwe le Mon ah zung tam bik cu hrawhpiak an si,” tiah San Chaung(စမ်းချောင်း) peng NLD party hruaitu nih a chim. Party zung an hrawhpiak hna caan cu mi choklet an tlawm lio caan ah a si, tiah NLD lei nih an chim.

Party zung hrawh a si pinah MP palai 119 le Party chungtel minung 224 hna i an innlo zong hrenhpiak le laakpiak an si, tiah an cathanh ah cun an langhter. Atu zong ah NLD party nawlngeitu theihpinak tel lo in zung chung luh an i tim i, cucu kan kan duh lo, an luh ahcun phung ning tein hmalaknak kan tuah lai, tiah an chim fawn.

Yangon i NLD central zung cu 2021 February, March le June thla ahkhan luhhnawh an rak tong i, bomb le a puak khomi hriam in an rak cheh hna. Cu kong he pehtlai in taza a cuaitu central committee chungtel U Ba Myo Thein(ဦးဘမျိုးသိန်း) le U Soe Lay(ဦးစိုးလေး) cu phungrelnak 17(1) in thong thlak an si.

Yangon Ah USDP Party Chungtel Nu 2 Kahthah An Tong!: Nizan July 4 ah Yangon Hledan dawr pawng i meithal kah a tongmi nu pahnih cu an pahnih in an thi cang, tiah USDP party chimphuannak nawlngeitu Dr. Nanda Hlah Myint nih July 5 ah a chim. Meithal kah a tongmi nu 2 hi Hledan dawr ah thingthei a zuarmi USDP party chungtel an si. SAC ralkap sin i thawng an pek tawn caah aho si hngalh lo mi hriamtlai phu nih meithal in an kah hna, tiah Dr. Nanda Hlah Myint nih a chim.

SAC ralkap nih nawlngeihnak an laak hnu ah USDP party chungtel minung 1700 hrawng cu SAC ralkap sin thawngpetu ah puh in thah an tong cang, tiah USDP party lei nih an thanh. AAPP nih July 4 cathanh a chuahning ah SAC ralkap nih uknak an laak khumkhat leng chung ah SAC ralkap uk duh lo in cawlcanghnak a tuahtu minung 2057 thah an si cang i, minung 14,458 tlaihkhih an tong, tiah an langhter.

A Poi Tuk E; American Ramah Mibupi Laak Ah Meithal Kahnak A Chuak!

Be the first to comment

Leave a Reply Cancel reply