Chin ramkulh Kanpetlet Pengah, Ralzaam Pakhat Ti Ah A Paam+Thawngpang Chia Fonh!
==========================
Chin ramkulh, Kanpetlet peng, Yeelaungpan khua, Angia-Kathin(အညာကတင်း) ralzaam camp in ralzaam pakhat Kyaw Than@ U Ha paing 45 cu, nizaan October 4 zaanlei sml 4 hrawngah, Kathin (ကတင်း)tiva ah ti ah a paam tiah theih a si. Kanpetlet Angia-Kathin khua in ralzaam camp a kir lei ah Kathin tiva nih a fenh. Khuami hna nih kan kawl i ralzaam camp kan phak pi ah cun a nunnak a liam cang tiah khuami hna sinin theih a si.
Ti ah a paammi Kyaw Than @ U Ha Paing ruak cu, Angia-Kathin ralzaam camp in, Yeelaungpaing khua ah an tlunpi hnu ah a ruak cu an vui te lai tiah theih a si.
Source:Zalen
Myawaddy-Kawkareik Lampi Ah Motor Pakhat Ai Leh Caah Minung 5 An Nunnak A Liam, Hliamtuar An Tam, Myawaddy-Kawkareik lampi ah “Pwint Nay Chi”(ပွင့်နေခြည်) laam phu nih zulhmi motor cu aa leh caah minung 5 an nunnak a liam i minung 15 leng hliam an tuar tiah theih a si.
Nihin October 5, zaanlei suimilam 4:00 hrawng ah a laam mi phu hna nih an i citmi motor cu break a ṭhatlo caah aa lat tiah theih a si.
“Atu tiang ah nunnak liammi hi minung 5 an si, emergency in zohkhenh mi hi 15 hrawng an si, cu ai hliam mi hna cu sizung ah kalpi an si” tiah mi bawmchanhnak a tuahtu phu chungtel pakhat nih a chim. Cu motor chung ah cun pa 21 le nu 7 an i tel i, cu chung ah pa 15, nu 5 le ngakchia kum 2 tluk nih hliamhma an tuar i, minung 5 an nunnak a liam tiah theih a si.
India Ram Chaklei Ah Bus Ai Leh Caah Minung 25 Nak Tlawmlo An Thi, India ram chaklei Uttarakhand ramkulh ah October 4 zaan ah motor pakhat ai let i minung 25 nak tlawmlo an nunnak a liam tiah theih a si. Cu motor cu horkuang pakhat ah a tla, motor chung cuangmi khualtlawng hi minung 40 nak tlawmlo an si tiah ramkulh ṭuanvo ngeitu hna nih an chim.
Ruahlo piin hi motor lehnak a cannak kong he pehtlaiin ṭuanvo ngeitu hna nih hlathlainnak an tuah tiah theih a si. Motor lehnak a cannak hmun ah ramkulh Disaster Response Team nih minung 21 an bawmhchanh khawh hna. Hi thilcang kong ah nunnak liammi hna chungkhar nan ngaihchiatnak kan in hrawmpi hna tiah prime minister Modi nih a chim.
India ram lam lei zohkhanhnak thazaang dernak ruang ah le lam rawhnak a canruang, lamfehnak a umlo ruang ah le dingrep phung zulhlo ruang ah kum tin in nunnak liammi sing khat leng an si tiah theih a si.
Rakhine ramkulh chung ralzaam mi hna chung in thla 6 tang ngakchia 2000 leng an i tel, Rakhine ramkulh chung kahdohnak ruangah mah umnak hmun kaltak in ralzaam dirhmun a phanmi 82,000 leng an phan tiah AA nih October 4 ah cathanh an chuah. Ramzaam dirhmun in a ummi hna chung ah thla 6 tang le nau chuakka 2100 leng an i tel i, ralzaam camp dihlak 150 leng ah an i dor hna tiah an langhter.
SAC ralkap le AA kar kahdohnak ruangah August thla le September thla thlahnih chung ah ralzaam 6100 leng an karh, siangakchia 10,000 leng zong ralzaam hartong mi hna umnak hmun ah ca an cawng tiah an langhter chih. Ralzaam dirhmun in a ummi an karh na in, ramkip in bawmchantu phu hna cu SAC ralkap nih bawmnak peknak nawl an phih hna caah, ralzaam dirhmun in a ummi hna cu harnak an tong tiah bawmchantu phu hna nih an chim.
SAC Ralkap Nih Matupi Khualuh Chuahnak Dihlak An Phih Caah Khuachung Eidin Thilri An Har, Chin ramkulh thlanglei Matupi khualuh chuahnak gate dihlak cu SAC ralkap nih an phihkham caah eidin thilri khuachung a lutkho ti lo i, zapi zaraan eimi thilman a kai leng ah cheukhat cu eiding a dongcat mi zong an um tiah theih a si.
“Atu tiang khualuh chuahnak an phihkham rih peng caah khuachung ah thil a lut kho tilo, kan ngeih ciami kan ei, a tutiang khualeng chuah zong a ngahlo, tuzarh, hmaizarh tiang an phihkhar rih a si ah cun khuachung ah dat-si zong a cat cang lai” tiah Matupi khuachung ummi pakhat nih a chim.
A luancia September 19 in SAC ralkap nih CDF-Matupi khuapawng kahdohnak a chuah hnu in, SAC ralkap nih Matupi khualuh chuahnak gate dihlak cu an phih dih i, khualtlawnnak nawl le thil phorhnak nawl an kham hna tiah theih a si. Matupi khua luh chuahnak lampi 3 simi Matupi-Mindat, Matupi-Hakha le Matupi-Paletwa kalnak lampi ah SAC ralkap nih gate tuah in mizei hmanh um kalnak nawl an pe hna lo tiah theih a si.
Myanmar Rammi Minung 4 Ah 1 Nih Eidin Kongah Har An Tong, Myanmar rammi minung pali ah minung pakhat nih zatuak 20% in eidin kongah har an tong tiah World Food Programme(WFP) le (FAO) nih an thanh. Eidin kongah har a tongmi hna ramkulh le ramthen hna cu, Chin, Kachin, Rakhine, Shan, Sagaing, Magwe le Kaya hna ah an si i, Yangon le Mandalay zong ah, rian a ngei lomi hna nih cun eidin kongah har an tong ve tiah theih a si. SAC nih hramhram uknak an lak hnuin Myanmar mipi hna nih eidin leiin siseh thil dangdang ah siseh harnak an tong i zatuak in 40% nih eidin kong ah harnak an tong tiah theih a si.
CDF-Mindat Ralkap Hna Nih Mipi Umkal A Fawi Khawh Deuhnak Dingah Lam An Remh!! Mindat peng chungah, ruah a tam i lam a rawk. Mipi nih umkal an i harh ngai caah CDF-Mindat ralkap hna nih mipi umkal a fawizaang deuh khawhnak ding caah nizaan October 4 ah lam an remh piak hna tiah theih a si. CDF-Mindat ralkap pakhat nih cun, ruahsur mincimh ruangah a rawkmi lam cu lung kan phah i kan remhpiak hna tiah a chim. Crd-The Chin Post
Leave a Reply