SAC Ralhrang Nih TNLA Sinah Tinta Kaimi TKF Phu Minung Pa 10 An Tlaih Hna
=============================
Yangon ramthen, chungah a cangmi puahralnak he pehtlaiin TKF phu chuntel minung 10 cu SAC ralhrang nih tette thilri he an tlaih hna tiah theih a si. Mah tlaih a tong mi TKF phu minung pa 10 hna cu TNLA sinah bomb lei in tintan a kai mi an si ii Yangon ah bomb puah nak a tuah mi kan tlaih hna SAC ralhrang nih thanhnak an tuah.
Mipi nih thawngpang peek ningah June thla ni 14 ah Yangon ramthen, Insein pengkulh, Insein park ah TKF phu chungtel Kaung Thiha Naing (Zin Yaw), Nyein Su Yee Phyo (Wai Yan), LA Yawng le Wa Wa Oo (Pan Pan), Insein pengkulh, Ywama nichuah lei sangah Nyan Lin Htet ( Ko Ngan), Aung Min Khan ( Takhuati) le Htet Nanda Theint (Nanda) hna cu,
kutin tuah mi Remote bomb lungkhat, Sound Box chungah khumhmi remote bomb lungkhat, Keypad phoen pakhat le puanzaam (Flage) he an tlaih hna tiah theih a si. JUne thla ni 16 ah Thant Zin Aung (KT Boss) le Inn Wan hna cu Dagon khuathar ah bomb puah dingin timhlamhnak an ngeih lio ah ,
SAC ralhrang phu nih an hmuh hna caah zaam ding in an tlik hna caah SAC ralhrang nih meithla in an kah hn ai Inn Wan cu a nunnak a liam ii Than Zin Aung cu kutin tuah mi bomb in an tlaih chih tiah theih a si. Tlaih a tong mi Thant Zin an tlaih hnu ah SAC ralhrang nih hlethlainak an tuah ii Yangon Union Young Organization-YUYO in Lwin U Maung, Chit Ko Ko (Chit Min Hliang) han cu SAC ralhrang nih kan tlaih than hna tiah thanhnak an tuah.
Tlaih a tong mi Chit Ko Ko cu May thla ni 17 ah SAC ralhrang nih taksapurin an thah tiah theih a si. A tu tlaih a tong mi hna cu Nu pa (6), Pa (4), fonh in minung 10 hna cu kutin tuah mi remote bomb lung (2), Sound Box chungah khumh mi remote bomb lung (1), Keypad phone Pa(1), Arfi pakhat aa tel mi puanzaam(flag) pakhat he an tlaih hna tiah theih a si.
Sagaing ramțhen, Boețalyi peng Kodaw palik sakhan cu a voi 4 nak kan kah hna i SAC ralkap 6 an thi tiah Black Dragon Special Task Force phu Nihin July 1 an thanh. Hi Sakhan hi June thlachung ahkhan voi 3 kahdoh an tong cang. June 28 zanlei Sml 3:30 hrawngah Boțalyn peng Kodaw palik sakhan chungah 40 mm lung 6, 40mm lung 4 in kah an si tiah Black Gragon Special Task Force phu nih cathanh chungah an langhter. Cu kahdohnak ah KaNaung People’s Defence Force le Black Dragon Special Task Force phu hna an i bawm.
Mon ramkulh, ThaTone(သထုံ) peng ToneBuLay(ထုံးဘိုလေး) khua pawng ah SAC ralkap le PDF an i kap i, PDF ralkap 2 an nunnak liam, tiah ThaTone pengkomh PDF ṭuanvo ngeitu pakhat nih a chim. June 26 ahkhan SAC ralkap le KNLA ṭangṭi phu kahdohnak a chuak i, PDF ralkap Thi Ha Zaw le Si Thu Aung an nunnak liam hi a si. PDF ralkap pahnih hna cu ThaTone pengkomh KNLA Brigade 1, Battalion 1, PDF No. 1 Battalion ralkap an si, tiah ṭuanvo ngeitu nih a chim.
An nunnak liammi PDF ralkap pahnih hna cu, khuapau dohthlennak ah pasal ṭha an si i, an i pekchanhnak le tuanbia an ṭialmi pehzulh dingin kan i zuam lai, tiah KNU ThanTone Partnership Oversight Committee nih cathanh an chuah. ThaTone peng ToneBuLay khua kahdohnak ah SAC ralkap nih inn 150 leng mei in an khangh i khuami 10 nak tlawm lo an thah hna. Atu lio hi ThanTone peng ah kaphnih kahdohnak a zual tuk caah tualchung mi 3000 leng an zam, tiah theih a si.
Karen ramkulh le Shan ramkulh ramri Hpekhong peng LywiMaKu(လွယ်မကူး) khua le LywiHe(လွယ်ဟယ်) khua ah, umhmun khuarmi SAC ralkap cu nihin zinglei ah Central Division Special Operations Sniper phu le Fighter phu nih Sniper in an kah hna caah SAC ralkap 7 an thi, Central Division Special Operations nih cathanh an chuah.
June 23 zong ah LywiMaKu umhmun khuarmi SAC ralkap pawl cu thiamhlei phu le Sniper phu nih an kah hna caah SAC ralkap 2 an thi. June 29 ah Hpekhong peng LywiMaKu umhmun khuarmi SAC ralkap pawl cu Sniper phu le Fighter phu i bawm in an kah hna caah ralkap 5 an thi, tiah theih a si.
Karen ramkulh, Myawaddy peng, Okerihta sakhan kahdohnak bawmh ding ah a ra mi SAC ralkap hna rallam cu nizan June 30 zinglei ah KNDO BuKyi Alsewa ( အယ်စေးဝါး) hruaimi phu hna nih an kah hna i SAC ralkap a thimi an tam, hriamnam tampi an lak khawh tiah theih a si. SAC ralkap nih Okerihta sakhan cu an sunghlo nak ding caah bawmtu tampi a thlah i vanlawng zong voi tampi a hman . Okerihta SAC ralkap sakhan kahdohnak bawmh dingin a ra mi hna cu nizan zing ah BuKyi Alsewa hruaimi phu hna nih lamtan in an kah hna caah hriamngan tel in hriamhme hna le kuan tampi an lak khawh.
KNU Brigade 6 hmunram, LayKeyGaw tlangpar ah June 29 zanlei ah hriamngan in an kah hnuah voihnih kheng te rallam a sialmi SAC ralkap le Cobra phu kahdohnak ah, SAC ralkap 2 an thi i, 7 hliamhma an pu. Cobra phu in ralkap pakhat hriamngan kuan nih a khen caah a nunnak liam, tiah theih a si. June 29 zanlei sml 6:00 hrawng ah SAC ralkap cu 40 mm, 81mm le 120 mm hriamngan an hman i, Cobra phu he zan sml 10:00 tiang hrawng kahdohnak a chuak i hnu ah an kir.
Zan sml 11:00 hrawng ah SAC ralkap cu rallam an sial ṭhan i, an hnu leiin hriamngan in an kah piak hna. June 30 zinglei sml 1:00 hrawng ah Cobra ralkap pakhat cu hriamngan kuan khennak in a nunnak liam, tiah Cobra nih cathanh an chuah. Cobra phu nih hmunhma humhimnak an lak lioah SAC ralkap nih an kal takmi 60mm bomb lung 1, 40mm bomb lung 1, RPG kuan 1 le zen thluan 1 an chuh hna, tiah theih a si.
Shwebo Ah Hriam Keng Lo PDF 9 Thah An Tong!: Sagaing ramṭhen, Shwebo peng Kyonseih(ကွန်ဆိပ်) khua pawng ah GZ Special Task Force (Wetlet) in PDF 9 cu SAC ralkap kut in an nunnak liam, tiah GZ Special Task Force (Wetlet) le an chungkhar hna nih June 30 ah RFA ah an chim. PDF chungtel hna cu June 29 chun ah khan Wetlet peng in, Shwebo peng lei panh in Ayadaw peng ah sii-ai thlopbul lei cawng ding in an kal lio ah SAC ralkap nih an tlaih hna i, an thah hna, tiah GZ Special Task Force (Wetlet) in rianngeitu Bo GZ nih a chim.
“Thah a tong mi hna cu hriamthil an i put lo i, sii-ai thlopbul cawng ding in a kal mi an si. Hlathlainak kan ngeih hnu ah lampi a him ko tiin kan thlah mi hna an si. SAC ralkap nih zeitin an tlaih hna cu kan fiang lo. Nizaan ah tlaih an tong ti tiang lawng thawng kan theih khawh i, an hmanthlak kan hmuh hnu lawng ah kanmah lei an si kan hngalh khawh hna,” tiah a chim.
Thah a tong mi nu hna cu kum 14 a si mi Ma Pah Pah Khine(မပပခိုင်), Ma Win Ei Kyaw(မဝင်းအိကျော်) kum 15, Ma Naing Naing Aung(မနိုင်နိုင်အောင်) kum 24 le Ma Thit Thit Hlaing(မသစ်သစ်လှိုင်) an si. Pa ah cun kum 17 a si mi Ko Pho Thong(ကိုဖိုးထောင်) le Ko Bong Kyaw(ကိုဘုန်းကျော်), Kum 21 a si mi Ko Thein Tan U(ကိုသိန်းသန်းဉီး), kum 27 a si mi Ko Aung Kyaw Moe(ကိုအောင်ကျော်မိုး) le Ko Pho Nyin(ကိုဖိုးငြိမ်း) hna an si.
Mino hna thah an ton cu chim awk ṭha lo in ka lung a fak tuk hringhran, tiah PDF nu a thi mi hringtu nu pakhat nih lungfaak ngai in a chim. SAC lei nih PDF 9 thihnak kong he pehtlai in an thanh mi a um rih lo.
Leave a Reply