A fek hmanh a kheu cang mi Min Aung Hlaing cu a tap bak ko!!

Hramhram in uknak lak a si hnu ah SAC nih sakhaan 90 hrawng an sung, Min Aung Hlaing Cu A Rak Tlun In A Tap Bak!
======
Myanmar ram ah SAC nih hramhram in uknak a lak hnu thok in thlangchung hriamtlai phu pawl le mipi hriamtlai phu pawl nih kahdoh ruangah SAC sakhaan 90 hrawng an sung cang tiah theih a si. Cu chungah raltuknak caah a hmunhma a ṭha tukmi pawl an i tel bantuk in ralram ah a ummi ralkap hna caah eidin, hriam bawmhnak le hmunhma tlaih khawhnak caah a biapi tukmi sakhaan pawl an i tel.

Atu langhtermi cazin hi hramhram in uknak lak a si hnu 2022 February thok in 2022 September thla tiang kumkhat le cheu chungah an lak khawhmi a si tiah Ethnic Armed Organization (EAOs) sin in The Irrawaddy nih a hlathlai khawhmi a si. Kachin ram ah SAC sakhaan a tlawmbik 20 hrawng, Chin ramkulh ah sakhaan 3, Kayah ah sakhaan 19, Karen ram ah sakhaan 12 le Rakhine ram ah sakhaan 36 an sung tiah EAOs sin in theih a si.

Kachin ram; 2021 March thla dongh lei ah Kachin Independence Army (KIA) nih China-Myanmar ramri raltuknak ah a hmunhma a rem tukmi Alaw Bum sakhaan cu a rak lak. Cu sakhaan cu Kachin ram, Bhamo pengkomh, Dawthponeyan peng ah a ummi a si i ralkap nih 1987 ah an rak lakmi sakhaan pakhat a si. Cu hnu ah KIA nih Karenni People Defense Force (KPDF) a dirh i SAC sakhaan pawl a lak thluahmah.

KIA he aa pehtlaimi nih an chimnak ah hramhram in uknak lak a si hnu ah KIA nih Kachin ram Hpakan peng ah SAC sakhaan 5, Puta-O peng ah sakhaan 3, Danai peng ah sakhaan 2, Bhamo pengkomh ah sakhaan 3, Waimaw peng ah sakhaan 3 le Shwegu peng ah sakhaan cheukhat a lak i Shwegu peng cheukhat sakhaan hna cu doh hau loin anmah tein an chuak tiah theih a si.

Karenni ram; Karenni ram ah SAC kahdohnak sakhaan 14 le Palek sakhaan 5 an sung tiah Karenni National Progressive Party (KNPP) sin in theih a si. KNPP Secretary (1) Khu Denial nih Karenni Army (KA) phufonh nih Mese peng, Hpasawng peng, Hpruso peng, Bawlakhe peng, Demoso peng le Sharrtaw peng chung i kahdohnak sakhaan le palek sakhaan pawl an lak khawh tiah The Irrawaddy ah a chim. Cu chungah minung 30/40 hrawng an umnak sakhaan aa tel i cheukhat cu 10/20 hrawng an umnak zong a um. 2021 ahcun sakhaan 4 lawng an lak khawh nain 2022 ahcun tam deuh an lak khawh cang tiah a chim.

Chin ramkulh; Chin ramkulh ah SAC nih nih a tlawmbik sakhaan 3 an sung tiah Myanmar ram buainak a hlathlaitu nih an chim. Chin hriamtlai phu hna nih an lakmi sakhaan pawl cu Thantlang peng, Lungler khua sakhaan le Mindat peng, M’Kuiimnu khua ralkap le palek sakhaan aa fonhmi le Suntaung khua palek sakhaan hna an si.

India-Myanmar ramri Thantlang peng, Lungler khua ah a ummi SAC sakhaan cu Chin National Army (CNA) le CDF nih 2021 September thla ah a rak lak. Mindat khua hnulei M’kuiimnu khua ah a ummi ralkap le palek 30 leng an umnak sakhaan cu CDF-Mindat nih 2021 July ah an rak lak. Cun Mindat peng Suntaung sakhaan zong CDF-Mindat nih kah lai an phan ruangah an zaamtak.

Karen ram; Cun kahdohnak atu le atu a chuahnak Karen ram zongah SAC nih an sakhaan 12 nak tlawm lo an sung tiah Karen National Union (KNU) cazin in theih a si. KNU battalion 5 hram an bunhnak Hpapun pengkomh ah Tawlayhta, Timuhta le Kyaukhyat sakhaan hna SAC nih a sung i KNU battalion 6 hram an bunhnak Dupalaya pengkomh ah Mawkhi le Thaebawbu sakhaan hna an sung. KNU battalion 3 hram an bunhnak Mone peng ah SAC nih Kawpin sakhaan, Kyaungsu sakhaan, Kyaungpya sakhaan, Aunglaung sakhaan le Kyunpin sakhaan tiah sakhaan 5 a sung.

Rakhine ram; Rakhine ram ah SAC nih sakhaan 35 a sung tiah Myanmar ram buainak a hlathlaitu cheukhat nih an chim.
SAC nih a sunghmi sakhaan pawl hi Rakhine ram, Maungdaw peng chungah sakhaan 30 le Paletwa peng ah sakhaan 6 an si tiah Myanmar ram buainak a hlathlaitu pakhat nih a chim.

Paletwa peng chungah sakhaan 5 cu 2022 August thla dongh lei ah AA nih a lak i Paletwa ni chuahlei battalion 55 sakhaan cu AA nih a kulh i phihkharnak a tuah ruangah kahdohnak um loin an chuaktak tiah a chim. Maungdaw ah SAC sakhaan an sunghmi hi AA nih phungning tein a thanhmi nakin a tam deuh kho i 30 hrawng a si kho men tiah a ruahdamh.

Sagaing le Magway; SAC nih tlangcung hriamtlai pawl an umnak hmunhma ah a sakhaan a sungh bantuk in PDF pawl an cawlcanghnak Sagaing le Magway ramṭhen hna zongah an sunghmi sakhaan pawl a um ko nain a zat fiang in kan thei lo tiah hlathlaitu pawl nih an chim. Credit: The Chinland Post

Sagaing Ramṭhen, Butalin Peng Inn A Khangtu SAC Ralkap 20 Hrawng Cu Bomb Puahnak In An Thi! Sagaing ramthen, Butalin peng, Dwintaung khua cu nizaan September 6 ah SAC ralkap nih an khangh i, an kirlei ah bomb kan puahhnawh hna, tiah Chindwin Brothers PDF nih nizaan September 6 ah an thanh.

Dwintaung khua in an kirlei ah SAC ralkap 80 cu Laymay(လေးမြေ) khua le Ngaingthumya(ညောင်သူများ) khua karah ah bomb kan puahhnawh hna. Cu bomb puahnak ah cun SAC ralkap 20 an thi i, 5 faak ngai in hliam an tuar. SAC nih hriamngan le hriamhme hmang in an kan kah ve nain kanmah lei hliamtuar um lo tein hnu kan tolh kho, tiah Chindwin Brothers PDF in ṭuanvo ngeitu nih a chim.

Cu kahdohnak ah cun Chindwin Brothers PDF, Daung Generation, Bu Lah Mauk Seik (ဗိုလ်လမုတ်ဆိတ်) le Royal Diamond hna an i bawm, tiah theih a si.

Myinkin Peng Kungmaw Khua Ah PDF Ralkap 2 Thah An Tong, Tualchung Mi 2 SAC Ralkap Nih An Kah Hna: Sagaing ramṭhen, Myinkin peng Kungmaw(ကုန်းမော်) khua cu September 3 ah SAC ralkap nih an luhnawh i, PDF ralkap 2 an thah hna pinah tualchung mi 2 zong meithal in an kah hna, tiah Myinkin PDF nih an thanh.

Thah a tong mi PDF ralkap Mya Din, kum 35 le Soe Min, kum 25 cu meithal in an kah thah hna pinah an tuk, an velh hnanak hma a um, tiah theih a si.

“SAC ralkap pawl cu Kungmaw khua lei in rallam an sial i, khuami 10 leng an tlaih hna. Saihthar(ဆိတ်သာ) khua an phak ah an tlaih ṭhan hna. SAC ralkap nih an duhmi thilri vialte cu an i laak dih. PDF ralkap 2 ruak cu Saihthar khua ah kan hmuh hna. September 6 ah an ruak cu an vui hna,” tiah PDF an langhter.

SAC ralkap le Pyusawhti 100 hrawng cu Myinkin peng ah rallam an sial i, Kani peng lei ah an kal. Myinkin peng cu SAC ralkap nih internet le phone line an phih, tiah tualchung mi hna nih an chim. Nizan September 6 ah Tatchaung(တပ်ချောင်း) khua pawng ah umhmun a khuarmi SAC ralkap pawl cu Myinkin peng PDF nih hriamngan in an kah hna caah ralkap a thimi an um kho, tiah PDF lei nih cun an chim.

Tanintharyi Ah SAC Ralkap Le Phyosawhti 6 Cu PDF Nih An Thah Hna! D-Day kumkhat tlinnak ah tiin Kyunsu ah a ummi Phyosawhti pawl cu kan kah hna i, Phyosawhti 2 an thi, tiah Tanintharyi-PDF nih nihin September 7 ah an thanh.

Tanintharyi ramthen, Kyunsu peng, Petain(ပဲတိုင်) khua, Myeik pengkomh, Bataillon 2 Tat-Khuai 2 le Tanintharyi-PDF hna nih tuzing suimilam 5 hrawng ah an kahdoh hna tiah theih a si. Cu kahdohnak ah cun Phyosawhti hruaitu U Ni Di Du telhin, Phyosawhti 2 an thi i, pakhat hliam a tuar, tiah kan theih.

Cun, September 4 zinglei sml 11 hrawng ah Tanintharyi peng Laythit-Thinchaungwa (ထိန်ချောင်း၀) khua pawng ah rallam sialmi SAC ralkap hna cu kan kahdoh hna i, SAC ralkap 3 le Phyosawhti 1 an thi i, 1 faak ngaiin hliam a tuar. Kanmah tualchung hriamtlai phu lei hliamtuar um lo tein hnu kan tolh kho, tiah tualchung hriamtlai phu hruaitu pakhat nih a chim. Credit: The Chin Post

Relchap, Myinchain Peng Ah PDF Nih SAC Mawtaw Bomb An Puahhnawh I, Ralkap 3 An Thi: Mandalay ramṭhen, Myinchain peng Htisaung(ထီဆောင်း) le Kanpya(ကံပြား) khua kar ah SAC ralkap mawṭaw pakhat cu nihin september 8 zaanlei suimilam 2 le cheu hrawng ah tualchung hriamtlai phu nih bomb an puah hnawh hna i SAC ralkap 3 an thi, tiah ZERO pah-kah-phah phu nih cathanh an chuah. Cu kahdohnak cu Myinchain ZERO pah-kah-phah phu le ZERO POWER tualchung hriamtlai phufonh hna nih an tuahmi si, tiah theih a si.

CDF Paletwa Kut Ah A Ummi SAC Ralkap Sin Thawngpetu Pakhat Cu A Nunnak A Liam!, SAC ralkap sin thawngpetu pakhat cu tlaih a ton lio ah damlonak/zawtfahnak in a nunnak a liam caah a chungkhar he biaruahnnak kan ngei lai, tiah CDF-Paletwa nih cathanh an chuah. Paletwa peng Wading(ဝါဒိန်) khuakomh, Wading(ဝါဒိန်) khua in SAC ralkap sin thawngpetu Pu Aa Khai(kum 65) cu CDF-Paletwa nih an tlaih i an hren lio, August 19 ah a thi, tiah theih a si. Pu Aa Khai cu thabat/thawvamh zawtnak a rak ngeicia mi a si, tiah an ṭial. Tlaih a ton hnu i a thih caah Pu Aa Khai a chungkhar he i caihhmainak le biaruahnak kan ngei lai, tiah CDF-Paletwa nih nihin September 8 ah cathanh an chuah.

Pu Aa Khai cu CDF-Paletwa nih cawlcanghnak a tuahmi kong ah SAC ralkap sin thawngpeknak a tuah caah, 2021 June thla chung ah voikhat, 2022 January thla chung ah a voi hnihnak tiin ralrinnak pek a rak si cang nain, SAC ralkap sin thawngpek a ngol hlei lo, tiah an chim. July 13 ah CDF-Paletwa nih an tlaih nain July 16 zaan ah a zaam, July 17 ah an tlaih ṭhan i, a ngandamnak ding caah felfai tein zohkhenh a si ko nain, July 19 zinglei ah a thi, tiah CDF-Paletwa nih fianhnak an tuah. Pu Aa Khai a chungkhar sin ah pehtlaihnak tuah kan i zuam nain, Paletwa pengchung ah SAC ralkap nih phone line an thah caah pehtlaihnak kan tuah kho lo, tiah CDF-Paletwa nih an langhter.

Karenni Ramkulh In September thla zarhkhatnak Chung Kahdohnak Ah SAC Ralkap 18 An Thi, Karenni ramkulh in September thla zarhkhatnak chung kahdohnak ah SAC ralkap 18 an thi, tiah KNDF nih nihin September 8 ah cathanh an chuah. September thla zarhkhatnak chung ah SAC ralkap hna cu Demoso le Hparuso ah minung thazaang chap in rallam an sial i, motor run in riahcaw thiar khawh an i zuam, tiah KNDF nih an langhter.

Pekhon(ဖယ်ခုံ) pengchung zong ah Pinlaung(ပင်လောင်း) in SAC ralkap motor 40 cu Pekhon hrambunh battalion ah thazaang an chap i, atu cathanh chuah tiang ah Moebye(မိုးဗြ) ah fak ngai in kahdohnak a chuak, tiah an langhter chih.

Demoso peng in Hparuso peng ah riahcaw a phortu SAC ralkap motor 5 cu September 3 zinglei suimilam 4:30 hrawng ah KNDF B-15 nih a thlithip in an kah hna i SAC ralkap motor pakhat a rawk, ralkap 3 an thi, motor dang hna cu hnu an tolh tiah theih a si. Cu ni zaan lei ah cun Hparuso peng Htitawku(းသော်ကူး) khua pawng umhmun khuarmi SAC ralkap hna cu KNDF-B15 nih a kah ṭhan hna caah SAC ralkap 2 an thi ṭhan.

September 4, chunhnu ah Hparuso peng Htipawso(းပေါ်ဆို) le Dawngekho(ဒေါညေးခူ) khua ah umhmun a khuarmi SAC ralkap hna cu Karenni ralkap KA, KNDF/B-4, B-5 le B-15 phufonh nih an kahdoh hna caah SAC ralkap 6 an thi. Cun KNDF B-15 nih Hparuso peng, Kadala(ကဒါးလား) khua pawng umhmun khuarmi SAC ralkap cu an kah ṭhan hna caah ralkap 2 an thi ṭhan, tiah theih a si.

Demoso peng Ngwaytaung(ငွေတောင်) khuathar pawng ah rallam sialtu SAC ralkap hna cu KA le KNDF B-10 phufonh nih an kahdoh hna caah kaphnih kar kahdohnak suimilam 4:00 hrawng a chuak i, cu kahdohnak ah cun SAC ralkap pakhat a thih lengah hliamhma tuar an tam, tiah theih a si. Kahdohnak ah cun SAC ralkap hriamnam zeimawzat kan lak, tiah KNDF nih an langhter.

September 7, Bawlakhe(ဘောလခဲ) le Yuatit khua kar lampi cung, SAC ralkap meng 12 sakhan pawng ah Rua saam ding in a chuakmi SAC ralkap hna cu KA, KNDF B-21 nih an kahdoh hna i SAC ralkap 3 an thi, 2 cu fak ngai in hliamhma an tuar leng ah hriamnam zeimawzat an lakpiak hna, tiah theih a si.

Pekhon(ဖယ်ခုံ) pengchung ah September 3 ah khan Kungsone(ကုန်းဆုံ) khuakomh phungki biakinn tlang cung ah umhmun a khuarmi SAC ralkap hna cu KA, KNDF B-3, B-9, B-11 phufonh nih an kahdoh hna caah SAC ralkap pakhat a rak thi. Karenni tuanbia chung ah le khuapau dohthlennak caan chung ah Karenni ramkulh chung in nunnak a liammi ralkap dihlak cu nihin September 8 Martyr’s Day ah upatnak sang bik kan in pek hna, tiah KNDF nih an cathanh chung ah an langhter.

Kalay in Yangon Lei A Zuangmi Vanlawng Ticket Man Cu Ks. 20,000 Leng In A Kai, SAC ralkap le tualchung hriamtlai phu kar kahdohnak a fah lengmang chin ruang ah vanlawng lam cu khualtlawng mi tam deuh nih hman a si caah, a hlan nakin Kalay in Yangon a zuang mi vanlawng ticket man cu Ks. 20,000 a kai. Sinain, Yangon in Kalay vanlawng cuan man cu an kai lo, tiah theih a si.

Kalay in Yangon kalnak vanlawng ticket man cu cuhlan ah a sangbik Ks. 163,000 hrawng a si tawn nain, nizaan September 7 in cun singhnih (200,000ks) tiang a phan. Yangon in Kalay kalnak vanlawng ticket man tu cu Ks. 138,200 in an zuar, tiah theih a si. Kalay in Yangon, KBZ vanlawng ticket hi cuhlan i a man fak bik lio ah Ks 165,000 a rak si nain, atu ah cun Ks. 185,000 a phan cang. Yangon in Kalay lei cu a hlan ah a sangbik Ks. 172,000ks a si i, atu ah cun Ks. 197,000 a phan, tiah theih a si.

Atu bantuk in vanlawng ticket man a kainak kong he pehtlai in vanlawng ticket zuartu pakhat nih cun dollar man a kai tuk caah vanlawng oil man zong a kai i, ticket man a kainak a si, tiah a chim. Thanlwin airlines cu September 10 in aa din cang lai tiah theih a si. Kalay in Yangon vanlawng ticket leng ah Monywa-Homalin vanlawng ticket man zong cu hlan ah cun Ks. 118,000 a rak si nain atu ah cun Ks. 138,000 ah an kai, tiah theih a si.

Be the first to comment

Leave a Reply

Your email address will not be published.


*