A cang cuahmah mi hmanh kan tuahremh khawh rih lo lioah a cang rih lomi kong i!!

Lungrualnak In Teinak Ah,
===================
SAC ralkap cu nawlpeknak pakhat tang i an um caah lung i rual lo bu zongin an i funtom kho. Chinram dohthlennak ralkap hna hi nawlpeknak pakhat tangah kan um khawh lo caah i lungrual kan herh tuk. Nawlpeknak pakhat tangah um cu ahopaoh nih kan duhmi a si nain atu kan dirhmun ah cun a si kho lomi a si.

Asinain thachiat ding a si lo. A ruang cu nawlpeknak pakhat tangah um lo bu zongin kan hmuitinh ah lung i rual khawh a si ko. Mirang phungthluk ah “Maimomh hmanh nih an i lungrual ahcun Chiandeih zong an hren khawh (When spiders unite, they can tie down a lion)” ti a um. Dohthlennak ralkap hna kan i lungrual ahcun kan thiamnak le hriamnam hme hmanh seh law uknak ṭhalo hi kan tei khawh ko.

Lungrual timi cu ruahnak le hmuhning i khah viar khi a si lem lo, hmuhning le ruahnak i dan buin rianṭuanṭi khawh hi LUNGRUAL cu a si. Chinram ah pengtlang hoih in hriamtlai kan um cio i kan ruahnak le hmuhning aa dang liangluang ko lai. Asinain thil pakhat ah surlu bang kan i funtom dih ko. Cucu uknak ṭhalo tei a si. Zeiruangah dah tangka kan thawh? Zeiruangah dah hriam kan tlaih? Cucu kan i fian cio mi a si.

Atu i kan dirhmun cu kan Laiholh i “Thlan kam ah dir/thih ri le nun ri ah um” timi kha a si. Thlan kam ah kan dir bu hmanh in kan i lungrual khawh lo ahcun Chin miphun nih kan ca le holh chungin LUNGRUALNAK timi biafang hi kan hlonh a hau hnga! Nihin ah cun uknak ṭhalo tei ding hi i hmaithlak cio ko usih. A tei hmanh kan tei hlan ah tei hnu i covo le umdan ding kong ruah len a hau lo. Uknak ṭhalo hi kan tei hmasa a hau. Kan tei hnuah a simi paoh si te ko seh.

Kanmah le kanmah kan i doh zong a si kho, kan tei hlan nakin kan buai deuh zong a si kho. Asinain cucu a si rih lomi an si, a si khomi lawng a si. Atu i kan ton cuahmah mi le a tak in a cang cuahmah mi tu hi i hmaithlak phot ko usih. Kawl nih “A hnu i buainak cu a hnuah tuahremh ding a si (နောက်ပြသနာ နောက်မှရှင်း)” an ti bantukin kan tei hnuah a cangmi cu kan tei hnuah tuahremh ding a si ko lai.

A cang cuahmah mi hmanh kan tuahremh khawh rih lo lioah a cang rih lomi kong i kan buai ahcun zeitindah lohma a kal khawh hnga! Hmailei ca cu ruah phung, tuaktan phung a si, asinain thaizing ca na ruah tuknak ah nihin na rian tlolh ding a si lo. BC chan lio i Latin caṭialthiam Publilius Syrus nih “Lungrualnak a umnak paoh ah teinak a um zungzal (Where there is unity there is always victory)” tiah a rak chim. American ramkhel thiamsang Thomas Paine zong nih “Milu zat ah si loin kan lungrualnak ah kan ṭhawnnak cu a um (It is not in numbers, but in unity, that our great strength lies)” tiah a chim ve.

Lungrualnak kong cu tampi chim len a hau lo, a ṭhatnak kan theih dih. A ṭhatnak kan theih cio ko caah a tak in i rual cang usih. Hmailei ah zeidah kan lawh lai ti chim khawh a si lo. A zungzal in lungrual khawh zong a si fawn lo. Asinain tutan khuapau dohthlennak ah kan lung aa rual ahcun kan miphun tuanbia aa thleng hrimhrim lai ti tu cu ka chim ngam. Crd-The Chin Post

Monywa Peng Ah SAC Ralkap Drone In Bomb Thlakhnawh An Ton Caah SAC Chungtel Pahnih An Thi! Sagaing ramṭhen, Monywa peng Tawpu khua in a chuakmi SAC ralkap le pyusawhti cu drone in bomb kan thlakhnawh hna caah pahnih an thi, tiah KUG Battalion G Y Z in ṭuanvo ngeitu nih a chim.

Nizan November 11 zing sml 9:35 hrawngah Monywa peng um pyusawhti khua tiah a min a thangmi Tawpu khua in a chuakmi SAC ralkap le pyusawhti cu, thingkung tang an i dinh lioah drone in bomb kan thlakhnawh hna hi a si, tiah KUG nih an langhter. Cu bomb puahnak ah pyusawhti hruaitu pakhat telh in SAC ralkap chungtel pakhat a thi i, 5 hliamhma an pu. Cu chungah pathum hi an hliamhma a fak ngaingai, tiah KUG in ṭuanvo ngeitu nih a chim.

Bomb puahhnawhnak ah KUG Battalion G Y Z le Companny 1, Eagle Brothers Revolution Force, Companny 2 ၊ Dragon Brothers’ People’s Defence Force hna i bawm in an doh hna, tiah theih a si. Monywa peng Tawpu khua cu pyusawhti an tam ngaingai nak khuate pakhat a si i, PDF ralkap an thah hna pinah khuate inn hna zong mei in an khanghpiak hna, tiah theih a si.

Tualchung Mi Mipe(မြေပဲ) A Firtu Pyusawhti 6 Kah Thah An Tong! Magway ramṭhen, Myaing peng Tayetkan khua in pyusawhti 10 cu khuami an mipe dum ah mipe an firpiak hna i cu lioah kan kah hna, tiah Myaing PDF in bawino Letyar nih a chim. Tayetkan khua thlanglei farlong 3 hrawng a hlatnak ah a ummi khuami an mipe dum ah nihin November 12 zinglei sml 6:00 hrawngah pyusawhti nih mipe an phawi lio le an fir lioah an kah hna, tiah theih a si.

“Khuami an mipe dum ah pyusawhti 10 cu an kal i mipe an phawi lioah kan kah hna. A hmun ah pyusawhti 6 cu an thi colh i pakhat cu a luat. Tayetkan khua um SAC ralkap pawl nih 60mm le 40mm in an kan kah ko nain kanmah lei a thimi le aa hliammi kan um lo,” tiah bawino Letyar nih cun a chim chap.

Cu kahdohnak ah Myaing PDF, Pyituh Aaman PDF, Mung Taing Phu le MUGBS hna i bawm in an kah hna, tiah theih a si. A luancia November 9 lio zong ah Pauk biaceih zung chungah thongtla phortu palik pawl cu, Myaing peng PDF nih kutcheh bomb in an rak puahhnawh hna caah palik pakhat a thi i pathum hliamhma fak ngai an rak pu. Crd-The Chin Post

Be the first to comment

Leave a Reply

Your email address will not be published.


*