BreakingNews: Thantlang USDP party Hluttaw candidate Pu Siang Lian Hmung cit mi motor SAC ralkap nih an kah 2021 September 18 zinglei sang, Thantlang in Lahva lei ah a kalmi Pu Siang Lian Hmung aa citmi Skat motor pakhat cu SAC mithat phu hna nih Thantlang bus station pawng ah an kah i suimilaam 9:55AM tiang an thawngpang theih a si rih lo.
Hi kong ah min langhter duh lo khuami pakhat nih, “Thantlang in Zahnak lei ah a kal mi motor a si. Motor hi Pu Hram Luai le Pu Siang Lian Hmung te chung nih an i cit mi a si. An i hliam maw hliam lo zeihmanh thawng fiang kan thei rih lo,” tiah a chim. Pu Siang Lian Hmung hi USDP party in 2020 thimnak ah Thantlang Peng mee hmun in aa zuammi a si. TheHakhaPost
YLA nih Lairam ah phuhrung lo tein rak thutdir khawh a si tiah cathanh an chuah Myanmar ram buainak ruang le kahdohnak ruang ah mah inn le lo ah um ngam lo in a zaam mi hna nih, “Kan lairam ah phuhrung lo tein thutdir khawh a si,” tiah Young Lai Assiociation, Sub-Headquarter, Sangau nih 2021 September 17 zaan ah cathanh a chuah. YLA, Sub-Headquarter, Sangau Peng chung ahhin a khua in khua 13 a um i, hi khua 13 chung ah Myanmar ramchung buainak in a zaam mi minung 700 leeng an si cang tiah theih a si.
YLA nih cathanh an chuah mi chung ah, “Myanmar ram tualchung buainak ruang i kan hmun le kan ram ah a rak zaam mi nan dihlak innka kaupi in kan in honpiak hna. Nan thutdirnak le nan khuasak nakding zong remhcia in ser a si. Nan tahhramnak mitthli le lungsivang in nan umnak vialte hi kan nih nan unau Lairam i khua a sa mi ca zong hin kan mitthli le lungsivanghnak a si ve ko ti kha rak kan hngalhpiak ulaw, zeitik caan poh Lairam ah nan ca ah hmunhma timhcia tein a um ko i, nan I dornak thladem si ding in rak kan fuhpanh uh,” tiah an tial.
YLA, Sub-Headquarter, Sangau Peng khua 13 a si mi, Sangau I, Sangau II, Sangau III, Sangau IV, Pangkhua, Sentetfiang, Thaltlang, Ceural, Rawlbuk, Lungtian-I, Lungtian-II, Vartek le Vartekkai khua hna ah a rak lut rih lo mi zong nih zalong te le I phuhrung lo tein nan rak luh, nan rak I dor naklai YLA nih thawng kan in thanh hna tiah an cathanh chung ah an telhchap. Myanmar ramchung buainak ruang ah Thantlang in siseh, khuate in siseh a tam deuh cu Mizoram Aizawl, Sangau Peng le Thingsai chung ah a lut mi a thong leeng an si cang tiah thawng kan theih. _ TheHakhaPost
Mizoram Aizawl khuapi chung ah vok zuat lo ding in AMC nih mizapi sin ah nawl hal Aizawl Municipal Corporation (AMC) nih Mizoram khualipi a si mi Aizawl khuapi chung ah vok le ar zuat ti lo ding in mizapi sin ah nawl a hal tiah Vanglaini Meidia nih 2021 September 18 ah a tial. Vok le ar zuat ti lo ding in nawl an halnak kong he pehtlai in AMC Lutlai Mayor Lalrinenga nih, “Vok le Ar zuatnak nih hin khuapi thianhlimnak a hrawh. Khuapi a thurhhnawmhter. Cun, mizapi ngandamnak zong a hnursuang ngai mi a si.
Aizawl khuapi, Aizawl mizapi kan ngandamnak a that khawh nakhnga le Aizawl khuapi atu nakin kan sersiam khawh than nakhnga mizapi nih vok le ar hi khuapi chung ah kan zuatpiak hram hlah uh,” tiah mizapi sin ah nawl a hal. Cun, Aizawl khuapi ca ah thanchonak tampi zong tuah ding a um rih, rengh ding le siamremh ding zong tampi a umrihnak kong zong mizapi sin ah chimphuannak an ngei. Photo: Credit TheHakhaPost
Leave a Reply