Pakokko Thonginn In Ramkhel Lei Thongtla Mi 5 Cu PDF Nih An Chanhchuah Hna
======================
Magway ramṭhen, Pakokko pengkomh thonginn in a zaam mi ramkhel lei thongtlami 5 cu tualchung hriamtlai phu nih an chanhchuah hna i, a himnak ah chiah an si cang, tiah Young Force (UG) nih an thanh. Pakokko pengkomh thong inn in a zaammi hna cu dohthlennak a tuahtu ralkap chungtel 2 le ramkhel lei sualphawtnak in tlaih a tong mi 3 an si. September 10 ah khan chanhchuah an si i, a himnak hmun ah kalter an si cang, tiah theih a si.
Ramkhel lei thongtla minung 5 hna cu anmah te timhtuahnak in a zaammi an si i, Pakokko peng tualchung hriamtlai phu pah-kah-phah le Local PDF a si mi Pakokko peng tualchung hriamtlai phu PPDF, Young Force (UG), Pakokko pah-kah-phah phuhnih fonh, Pakokko Ranger, RSO(PKU) le tualchung hriamtlai phu dang hna he i bawm in thongtla a zaam mi pawl cu an va an bawmh hna, tiah theih a si.
Magway Ramṭhen, Yaw Hmunram PDF Sakhan Pakhat Cu SAC Ralkap Nih An Khangh! : “Hriamnam thazaang aa thlau tuk caah kan sakhan pakhat cu SAC ralkap pawl nih an kan hrawhpiak,” tiah Magway ramṭhen, Yaw hrambunh The Youth Force (Saw&Kyaukhtu) nih nihin September 11 ah cathanh an chuah.
“Nizaan September 10 ah ṭat-mah 77 in minung thazaang 90 he rallam sialtu SAC ralkap hna cu TYF hmunram chung ah an lut i, Kyaukhtu hrambunh in hriamngan an thlah, hmaitonh i kahdoh ding ah kan thazaang aa thlau tuk caah kan sakhan cu kan chuahtak,” tiah TYF in ṭuanvo ngeitu nih a chim. TYF phu hna cu an him dih nain, an kaltakmi sakhan le thlam hna cu SAC ralkap nih an khangh dih. Cun, cu sakhan pawng ah a ummi tualchung mi hna thlaam le leeng zong an khangh dih hna, tiah TYF nih an langhter.
Kalaymyo, Pyidawtha Khuami Hauh Khan Pau Cu Hriamtlai Phu Pakhat Nih SAC Ralkap Sin Ah An Kalpi: Sagaing ramṭhen, Kalaymyo Pyidawtha khua nih khuanu khuapa can ah an hmanmi U Hauh Khan Pau(kum 45) cu aho si theih lo mi hriamtlai phu pakhat nih nizaan September 9 chunhnu suimilam 2:00 hrawng ah an tlaih i, SAC ralkap sin ah an kalpi tiah tualchung mi nih an chim. Cun, SAC ralkap lei ah ṭang in thawngthanhnak a tuah tawntu telegram nih PDF chungtel Hauh Khan Pau cu pistol pakhat le kuan he kan tlaih, tiah an langhter.
“September 9, chunhnu suimilam 2:00 hrawng ah U Hauh Khan Laung cu khuachung ah aa chawh lio ah, private motor pakhat in minung 5 hrawng nih biahalnak zong tuah hmasa loin, an tukvelh hnu ah an kalpi. A tlaitu hna zong aho an si theih a si lo. U Pau cu khuachung ah i bochan mi upa pakhat a si leng ah ZYA-Zomi mi bawmchantu phu i hruaitu pakhat zong a si. A mah cu midai te a si, zei bantuk hriamtlai phu he hmanh pehtlaihnak a ngeimi a si lo. Atu bantuk a ruang um loin tukvelh le tlaihkhih a tonmi kong ah a chungkhar zong nih an cohlan khawh ding a si lo leng ah khuachung mipi kan ngaihchia tuk,” tiah U Pau tlaih a ton lio ah a hmutu tualchung mi pakhat nih a chim.
North Korea He Pehtlaihnak Tuah Kan I Zuam – White House, North Korea cu ralmit in kan zoh lo, palai lei in pehtlaihnak ngei kho ding in kan i zuam cuahmah, tiah White House chimphuannak nawlngeitu Karine Jean-Pierre nih september 9 ah a chim. North Korea President Kim Jong Un nih cun mah le mah i runvennak ding ah Nuclear hmannak nawl cu phungning tein a thanh hnu ah Nuclear kong ah hnu kir awk kan ṭha ti lo tiah a chim. Nuclear hriamnam zonternak(Denuclearization) biaruahnak khamnak upadi zong a chuah.
US nih cun North Korea tlerhkhonhnak cu tawlrel khawh kan i zuam i, a hawikom ram pawl he naihniam tein caihhmainak kan ngei. Korea ram ah Nuclear hriamnam thazaang a zor khawh nakhnga zong kan i zuam cuahmah ko, tiah Karine Jean-Pierre nih cun a chim chap. N. Korea nih cun an ram cu amah tein Nuclear hriamnam aa tawlrel kho mi ram ah a thanh i, Pyongyang nih Nuclear hriamnam cu kan thlah lai lo, US lehrulhnak ding ah kan herh tiah, Kim Jong Un nih cun a chim.
Sagaing Ramṭhen, Butalin Peng Palik Sakhan In Ralkap 2 Nih An Hriamnam He CDM An Tuah! Sagaing ramṭhen, Butalin peng, Kutaw(ကူတော်) palik sakhan in SAC ralkap 2 nih September 5 ah khan Donepian(ဒုံးပျံ) Local PDF sin ah meithal 2 he CDM an tuah, tiah theih a si. CDM a tuahtu SAC ralkap 2 nih cun MA2, MA1 meithal 2, kuan 400, kutcheh bomb lung 5 le bomb hmanh phun lung khat an i put caah Donepian(ဒုံးပျံ) Local PDF nih minung pakhat ah sing 50 veve laksawng an pek hna i, a himnak hmun ah an kalter hna, tiah theih a si. Crd-The Chin Post
Leave a Reply